തനിക്കെതിരെ എവിടെയും കേസില്ല; മാറിനിന്നത് സർക്കാറിന്റെ താൽപര്യം സംരക്ഷിക്കാൻ -സജി ചെറിയാൻ

ചെങ്ങന്നൂർ: ഭരണഘടന വിരുദ്ധമായോ നിയമവിരുദ്ധമായോ ഒന്നും പറഞ്ഞിട്ടില്ലെന്നും തന്റെ പേരിലുണ്ടായിരുന്ന രണ്ട് പരാതിയിലും തീർപ്പായെന്നും നിയുക്തമന്ത്രി സജി ചെറിയാൻ. ചെങ്ങന്നൂരിലെ എം.എൽ.എ ഓഫിസിൽ മാധ്യമങ്ങളോട്​ സംസാരിക്കുകയായിരുന്നു അദ്ദേഹം.

തനിക്കെതിരെ എവിടെയും കേസില്ല. പൊലീസ് ആറു മാസം അന്വേഷിച്ച്​ കഴമ്പില്ലെന്ന് കണ്ടെത്തിയതാണ്. ഭരണഘടന വിരുദ്ധമായി ഒന്നും പറഞ്ഞിട്ടില്ലെന്നും തെളിഞ്ഞു.

മന്ത്രിസ്ഥാനത്ത്​ കടിച്ചുതൂങ്ങിയില്ല. മാറിനിന്നത് സർക്കാറിന്റെയും പാർട്ടിയുടെയും താൽപര്യം സംരക്ഷിക്കാനാണ്. ധാർമികത മുൻനിർത്തിയാണ് രാജിവെച്ചത്.

തടസ്സഹരജിയിൽ കോടതി തുടർനടപടികൾ സ്വീകരിക്കും. എല്ലാ കാര്യങ്ങളിലും പോസിറ്റിവായ സമീപനം വേണമെന്നും അദ്ദേഹം പറഞ്ഞു.