ഭക്ഷ്യകിറ്റ്​ കേന്ദ്രസർക്കാർ നൽകിയതാണെന്ന വ്യാജ പ്രചാരണം നടക്കുന്നു -പിണറായി

കണ്ണൂർ: ​കോവിഡുകാലത്ത്​ സംസ്ഥാന സർക്കാറിന്‍റെ ഭക്ഷ്യകിറ്റ്​ വിതരണം​ കേന്ദ്രസർക്കാറി​േന്‍റതെന്ന്​ വ്യാജ പ്രചാരണം നടക്കുന്നുണ്ടെന്ന്​ മുഖ്യമന്ത്രി പിണറായി വിജയൻ​. കേന്ദ്രസർക്കാർ നൽകിയതാണെങ്കിൽ മറ്റ്​ സംസ്ഥാനങ്ങളിലും ഇതുപോലെ കിറ്റ്​ കൊടുക്കേ​​ണ്ടെ. കോൺഗ്രസിന്‍റെ എത്ര എം.പിമാർ കർഷക സമരത്തിന്​ പോയെന്നും പിണറായി ചോദിച്ചു.

പല സംസ്ഥാനങ്ങളിലും ​ബി.ജെ.പിയെ പ്രതിരോധിക്കുന്നതിനായാണ്​ കോൺഗ്രസിനെ ജയിപ്പിച്ചത്​. എന്നാൽ, കോൺഗ്രസ്​ നേതാക്കൾ കൂട്ടത്തോ​െട ബി.ജെ.പിയിലേക്ക്​ പോയി. കോൺഗ്രസിനെ വിശ്വസിക്കാൻ കഴിയുന്ന സാഹചര്യമല്ല നിലനിൽക്കുന്നതെന്നും അദ്ദേഹം പറഞ്ഞു.

നിയമസഭ തെരഞ്ഞെടുപ്പിൽ കേരളത്തിലെ ജനങ്ങൾ എൽ.ഡി.എഫിനൊപ്പ​മാണ്​. എൽ.ഡി.എഫിന്‍റെ ജനപ്രീതിയിൽ എതിരാളികൾക്ക്​ ആശങ്കയുണ്ട്​. അതിനാലാണ്​ ചില പ്രതീകങ്ങളെ ഉയർത്തികൊണ്ടുവരാൻ ശ്രമിക്കുന്നത്​. കോൺഗ്രസ്​ ബി.ജെ.പിക്കെതിരായ പോരാട്ടമായി ഉയർത്തിക്കാണിക്കുന്നത്​ നേമത്തെയാണ്​. എന്നാൽ, കഴിഞ്ഞ തെരഞ്ഞെടുപ്പിൽ നേമം നിയമസഭാ മണ്ഡലത്തിൽ നഷ്​ടമായ വോട്ടുകളെ കുറിച്ച്​ കോൺഗ്രസ് ആദ്യം​ പറയണമെന്നും അദ്ദേഹം ആവശ്യപ്പെട്ടു.

കൃത്രിമമായി വാർത്തകൾ സൃഷ്​ടിച്ച്​ ചർച്ചകൾ വഴിതിരിച്ച്​ വിടാനാണ്​ ശ്രമം. കോൺഗ്രസും ബി.ജെ.പിയും നേമത്ത്​ തെരഞ്ഞെടുപ്പിൽ പരസ്​പരം സഹകരിച്ചു. കേന്ദ്രസർക്കാർ സ്ഥാപനങ്ങളിൽ എട്ട്​ ലക്ഷത്തോളം ഒഴിവുകളിൽ നിയമനം നടത്താനുണ്ട്​​. എന്നാൽ, അതിനെ വിമർശിക്കാതെ പി.എസ്​.സിയെ മാത്രമാണ്​ പ്രതിപക്ഷം വിമർശിക്കുന്നത്​. ഇത്​ ഇരു പാർട്ടികളും തമ്മിലുള്ള ധാരണയുടെ ഭാഗമാണെന്നും അദ്ദേഹം പറഞ്ഞു.