സി.പി.എമ്മിലെ അത്രയൊന്നും പ്രതിഷേധമില്ല, സ്​ത്രീകൾക്ക് കൂടുതൽ​ സീറ്റ്​ നൽകുന്നതിൽ പരിമിതികളുണ്ടായി -രമേശ്​ ചെന്നിത്തല

തിരുവനന്തപുരം: സ്​ഥാനാർഥി പട്ടിക പുറത്തിറക്കിയതുമായി ബന്ധപ്പെട്ട്​ സി.പി.എമ്മിലെ അത്രയൊന്നും പ്രതിഷേധം കോൺഗ്രസിൽ ഉണ്ടായിട്ടില്ലെന്ന്​ പ്രതിപക്ഷ നേതാവ്​ രമേശ്​ ചെന്നിത്തല. 'ചെറുപ്പക്കാർക്ക്​ ഏറെ അവസരം നൽകിയ പട്ടികയാണ്​ കോൺ​ഗ്രസി​േന്‍റത്​. ഒരു കാലഘട്ടത്തിലും ഇതുപോലെയൊരു മാറ്റം ഉണ്ടായിട്ടില്ല. രാഹുൽ ഗാന്ധിയുടെ ആഗ്രഹങ്ങളും കാഴ്ചപ്പാടുകളും പ്രതിഫലിപ്പിക്കുന്നതാണ്​ പട്ടിക.

ഈ ലിസ്റ്റിന്‍റെ മേന്മ കേരള രാഷ്​ട്രീയത്തിൽ ചലനമുണ്ടാക്കും. ഗുണപരമായ മാറ്റങ്ങൾ വരും. യുവത്വം പ്രസരിപ്പിക്കുന്ന പട്ടികയാണിത്​​. ഇത്​ കോൺഗ്രസിന്‍റെ ദിശാമാറ്റത്തിന്‍റെ സൂചനയാണ്​. നിരവധി ​പ്രഗൽഭരാണ്​ പട്ടികയിൽ ഉൾപ്പെട്ടിരിക്കുന്നത്​.

കോ​ൺഗ്രസ്​ വലിയൊരു പാർട്ടിയാണ്​. അതിനാൽ ഒരു മണ്ഡലത്തിൽ തന്നെ അർഹരായ മൂന്നും നാലും പേരുണ്ടാകും. അതിൽ ഒരാളെ മാത്രമോ മത്സരിപ്പിക്കാൻ കഴിയൂ. മറ്റുള്ളവർക്ക്​ പാർട്ടിയിൽ വിവിധ തലങ്ങളിൽ പ്രവർത്തിക്കാൻ അവസരം നൽകും.

മുതിർന്നയാളുകളുടെ സേവനം പാർട്ടി ഫലപ്രദമായി വിനിയോഗിക്കും. കൂടുതൽ കാലഘട്ടം മത്സരിച്ചു എന്നത്​ അയോഗ്യതയല്ല. അവരെയും ഉപയോഗപ്പെടുത്തും. അതാണ്​ ഹൈകമാൻഡിന്‍റെ നിർദേശം.

എവിടെയെങ്കിലൂം ചെറിയ തോതിൽ പ്രതിഷേധം ഉണ്ടായിട്ടുണ്ടെങ്കിൽ അ​െതല്ലാം താൽക്കാലികം മാത്രമാണ്​. യു.ഡി.എഫിന്‍റെ പട്ടികയാണ്​​ മികച്ചത്​. അതിന്‍റെ പ്രാധാന്യം ജനങ്ങൾക്കും പ്രവർത്തകർക്കും ബോധ്യപ്പെടും. കേരളത്തിലെ അഴിമതി ഭരണത്തിനെതിരെ ഒരുമിച്ച്​ പോരാടേണ്ട സമയമാണിത്​.

ബി.ജെ.പിയെ അക്കൗണ്ട്​ തുറക്കാൻ അനുവദിക്കില്ല. കെ. മുരളീധരൻ നേമത്ത്​ മത്സരിക്കുന്നത്​​ കൂട്ടായ തീരുമാനത്തിന്‍റെ അടിസ്​ഥാനത്തിലാണ്​. സി.പി.എമ്മും​ ബി.ജെ.പിയും പലയിടത്തും ധാരണയിൽ എത്തിയിട്ടുണ്ട്​. മലമ്പുഴയിൽ ആരാണ്​ സ്​ഥാനാർഥിയെന്ന്​ ഇതുവരെ ആർക്കും മനസ്സിലായിട്ടില്ല. മഞ്ചേശ്വരത്തും ഈ കൂട്ടുകെട്ടുണ്ട്​.

കോൺഗ്രസ്​ പട്ടികയിൽ പരമാവധി സ്​ത്രീകൾക്ക്​ പ്രാതിനിധ്യം നൽകാൻ ശ്രമിച്ചിരുന്നു​. എന്നാൽ, പല പരിമിതികൾ ഉണ്ടായി. അതിനാൽ ഒമ്പതുപേർക്ക്​ മാത്രമേ നൽകാനായുള്ളൂ. വിജയസാധ്യത കൂടി കണക്കിലെടുത്താണ് പട്ടിക തയാറാക്കിയത്​.​ മാർച്ച്​ 20ന് യു.ഡി.എഫ്​​ പ്രകടന പത്രിക പുറത്തിറക്കും -രമേശ്​ ചെന്നിത്തല പറഞ്ഞു.