മോൻസൺ മാവുങ്കലിന്‍റെ വാടകവീട്ടിലെ മോഷണം കെട്ടുകഥയെന്ന്​

കൊച്ചി: പുരാവസ്തു തട്ടിപ്പ്​ കേസ് പ്രതി മോൻസൺ മാവുങ്കലിന്‍റെ വാടകവീട്ടിൽനിന്ന്​ 20 കോടിയുടെ വസ്തുക്കൾ മോഷണംപോയെന്ന പരാതി കെട്ടുകഥയെന്ന നിഗമനത്തിൽ ​പൊലീസ്​. വീട്​ ഒഴിയുന്നത്​ വൈകിപ്പിക്കാനുള്ള തന്ത്രമാണ്​ ഇതെന്ന്​ പൊലീസ്​ സംശയിക്കുന്നു.

എറണാകുളം കലൂരിലെ വീട്ടിൽനിന്ന്​ കോടികളുടെ വസ്തുക്കൾ നഷ്ടപ്പെട്ടെന്നായിരുന്നു പരാതി. തട്ടിപ്പ് വസ്തുക്കൾ സൂക്ഷിച്ചിരിക്കുന്ന വീട്​ ക്രൈംബ്രാഞ്ചിന്‍റെ കസ്റ്റഡിയിലാണ്. ഒരു ദിവസത്തെ പരോളിലിറങ്ങിയ പ്രതിയുമായി പൊലീസ് പരിശോധന നടത്തിയപ്പോഴാണ് 20 കോടിയുടെ വസ്തുക്കൾ നഷ്ടപ്പെട്ടതായി കണ്ടെത്തിയതെന്ന്​​ ഇയാളുടെ അഭിഭാഷകൻ പറഞ്ഞത്​.

സി.സി ടി.വി പൊളിച്ചുമാറ്റിയ നിലയിലാണ്​. വീടിന്‍റെ ഉടമസ്ഥർ നോർത്ത് പൊലീസിൽ പരാതി നൽകിയിട്ടുണ്ട്. രണ്ടാഴ്ച മുമ്പ്​ മോൻസന്‍റെ അഭിഭാഷകൻ വീട്ടിൽ നേരിട്ടെത്തി പരിശോധിച്ചപ്പോൾ സാധനങ്ങൾ നഷ്ടപ്പെട്ടതായി പരാതി ഉന്നയിച്ചിരുന്നില്ല. മോൻസൺ മാവുങ്കൽ ജയിൽ സൂപ്രണ്ട് മുഖേനയും പരാതി നൽകുമെന്ന് അഭിഭാഷകൻ മാധ്യമങ്ങളോട് പറഞ്ഞു.