നാടക നടൻ വേദിയില്‍ കുഴഞ്ഞുവീണ്​ മരിച്ചു; സംഭവം ‘വാർത്ത’ എന്ന നാടകം അരങ്ങിൽ അവതരിപ്പിക്കവേ

അമ്പലപ്പുഴ: നാടകനടൻ ചമ്പക്കുളം വൈശ്യംഭാഗം പുതുവന ലഗേഷ്​ രാഘവന്‍ (​62) വേദിയില്‍ കുഴഞ്ഞുവീണ്​ മരിച്ചു. തിങ്കളാഴ്ച രാത്രി കൊല്ലം അഞ്ചാലുമ്മൂട്ടിൽ, അമ്പലപ്പുഴ അക്ഷരജ്വാലയുടെ ‘വാർത്ത’ എന്ന നാടകം അരങ്ങിൽ അവതരിപ്പിക്കവേയാണ്​ കുഴഞ്ഞുവീണത്.

20 വർഷമായി മലയാള പ്രഫഷനൽ നാടകത്തിൽ അഭിനയിച്ചുവരുകയാണ്​. പൊലീസ് വകുപ്പിൽ ജോലി ചെയ്തു വരുന്നതിനിടെ ആരോഗ്യ വകുപ്പില്‍ ജോലിയില്‍ പ്രവേശിച്ചിരുന്നു. വിരമിച്ച ശേഷം മുഴുസമയവും പ്രഫഷനൽ നാടകത്തിൽ ചുവടുറപ്പിച്ചു.

രണ്ടു വർഷമായി പത്മശ്രീ തിലകന്റെ അക്ഷരജ്വാലയിൽ അഭിനയിച്ചു വരുകയായിരുന്നു. ഭാര്യ: രാജലക്ഷ്മി. മക്കൾ: ഐശ്വര്യ, അമൽ. മരുമകൻ: അനന്തു. സംസ്കാരം ബുധനാഴ്ച രണ്ടിന് വീട്ടുവളപ്പിൽ.