യുവാവിനെ തട്ടിക്കൊണ്ടുപോയി ക്രൂരമായി മർദിച്ചതായി പരാതി

മാനന്തവാടി: യുവാവിനെ തട്ടിക്കൊണ്ടുപോയി സദാചാര ഗുണ്ടകൾ ക്രൂരമായി മർദിച്ചതായി പരാതി. കൊറോത്തെ മാന്തോണി അജ്​നാസിനാണ് (21) മർദനമേറ്റത്. നാദാപുരത്തുള്ള പതിനഞ്ചോളം വരുന്ന സംഘമാണ് തട്ടിക്കൊണ്ടുപോയി മർദിച്ചത്. ഗുരുതര പരിക്കേറ്റ അജ്​നാസിനെ മാനന്തവാടി മെഡിക്കൽ കോളജ്​ ആശുപത്രിയിൽ പ്രവേശിപ്പിച്ചു. കോറോത്തെ ഫ്ലഷ്മാർക്ക് സ്ഥാപനത്തിലെ ജീവനക്കാരനാണ് അജ്​നാസ്.

ചൊവ്വാഴ്ച രാവിലെ ഒമ്പതിന് ഒരു കാര്യം സംസാരിക്കാനുണ്ടെന്നു പറഞ്ഞ്​ ബൈക്കിൽ പിന്തുടരാൻ ആവശ്യപ്പെടുകയായിരുന്നു. കുറച്ച് ദൂരം പിന്നിട്ടപ്പോൾ ബൈക്ക് നിർത്താൻ ആവശ്യപ്പെട്ടു. തുടർന്ന്​ അജ്നാസിനെ ബലമായി വാഹനത്തിൽ പിടിച്ചുകയറ്റുകയായിരുന്നു. പിന്നീട് നാദാപുരത്തെ ഒരു വീട്ടിലെത്തിച്ച് മർദിക്കുകയായിരുന്നുവെന്ന്​ അജ്​നാസ്​ പറഞ്ഞു. ഇടതു കാൽമുട്ട് ഡ്രിൽ ഉപയോഗിച്ച് തുളക്കുകയും കമ്പികൊണ്ട് തലക്കും കാലിനും അടിച്ച്​ ഗുരുതര പരിക്കേൽപിക്കുകയും ചെയ്​തു. വെള്ളം നിറച്ച വീപ്പയിൽ മുക്കി കൊല്ലാൻ ശ്രമിച്ചതായും അജ്നാസ് 'മാധ്യമ'ത്തോട്​ പറഞ്ഞു.

സംഘത്തിലെ ഒരാൾ കോറോം സ്വദേശി അജ്മലിനെ നാദാപുരത്തേക്ക് വിളിച്ചുവരുത്തി അവശനായ അജ്നാസിനെ കൂടെ വാഹനത്തിൽ കയറ്റിവിടുകയായിരുന്നു. പൊലീസിൽ പരാതി നൽകരുതെന്നും വാഹനാപകടത്തിൽ പരിക്കുപറ്റിയതാണെന്ന് പറയണമെന്ന്​ നിർദേശിക്കുകയും ചെയ്​തു. നാദാപുരം ഗവ. ആശുപത്രിയിൽ പ്രവേശിപ്പിച്ച അജ്നാസിനെ വിദഗ്ധ ചികിത്സക്കായി മാനന്തവാടി മെഡിക്കൽ കോളജ്​ ആശുപത്രിയിലേക്കു​ മാറ്റുകയായിരുന്നു.

നാദാപുരം സ്വദേശികളായ വലയാലത്ത്​ ഫൈസൽ, സഹോദൻ വലയാലത്ത്​ റഷീദ്, എളന്തുടത്ത് മുഹമ്മദ്‌ എന്നിവരും കണ്ടാലറിയാവുന്ന പതിനഞ്ചോളം പേരും ചേർന്നാണ് തട്ടിക്കൊണ്ടുപോയി കൊല്ലാൻ ശ്രമിച്ചതെന്നും മൊബൈൽ ഫോണും ബൈക്കും പണവും കവർന്നതായും അജ്നാസ് പറഞ്ഞു. പൊലീസിൽ പരാതി നൽകി​.