ബ്രൂവറിക്ക് വെള്ളം നൽകാനാവില്ലെന്ന് ജല അതോറിറ്റി; ‘മലമ്പുഴയിൽ നിന്ന് വെള്ളം കൊണ്ടുവരാൻ മദ്യകമ്പനിയുമായി ചർച്ച നടത്തിയിട്ടില്ല’

പാലക്കാട്: എലപ്പുള്ളി ബ്രൂവറി യൂനിറ്റിന് ആവശ്യമായ വെള്ളം നൽകാമെന്ന യാതൊരു ഉറപ്പും ഒയാസിസ് കമേഴ്സ്യലിന് നൽകിയി​ട്ടില്ലെന്ന് ജല അതോറിറ്റി. എഥനോൾ നിർമാണ യൂനിറ്റിനുള്ള ടെൻഡറിനു വേണ്ടിയെന്ന് പറഞ്ഞാണ് സമീപിച്ചത്. കിൻഫ്ര വ്യവസായിക ആവശ്യത്തിന് സജ്ജീകരിക്കുന്ന പദ്ധതിയിൽ നിന്ന് വെള്ളം നൽകുന്നത് പരിഗണിക്കാമെന്ന് മാ​ത്രമേ അറിയിച്ചിട്ടുള്ളൂവെന്നും സൂപ്രണ്ടിങ് എൻജിനീയര്‍ പറഞ്ഞു.

വ്യവസായിക ആവശ്യത്തിന് കി​ൻഫ്ര മുതൽ മുടക്കിയ പ്രതിദിനം 10 ലക്ഷം ലിറ്റർ വെള്ളമെത്തിക്കുന്ന പദ്ധതിയുണ്ട്. ഇതിന്റെ പൈപ്പ് ലൈൻ നടപടി പൂർത്തിയായിട്ടില്ല. നിലവിൽ ഇതിൽ നിന്ന് വ്യവസായിക ആവശ്യത്തിന് വെള്ളമെടുക്കുന്നുമില്ല. ഈ സാഹചര്യത്തിൽ ആ പദ്ധതിയിൽ നിന്ന് ‘സ്​പെയർ’ ചെയ്യാമെന്നു മാത്രമാണ് ​2023 ജൂണിൽ കമ്പനിയുടെ ടെൻഡർ ആവശ്യത്തിന് നൽകിയ കത്തിൽ അന്നത്തെ ചീഫ് എൻജിനീയർ സൂചിപ്പിച്ചത്.

എഥനോൾ നിർമാണ കമ്പനിക്ക് ടെൻഡറിൽ പ​ങ്കെടുക്കാനുള്ള അവസരത്തിനുള്ള റിപ്പോർട്ട് എന്നതിലുപരി മദ്യനിർമാണ കമ്പനിയാണെന്നോ മലമ്പുഴയിൽ നിന്ന് വെള്ളം കൊണ്ടു വരുന്നത് സംബന്ധിച്ചോ ഒരു ചർച്ചയും കമ്പനിയുമായി നടത്തിയിട്ടില്ല.

കി​ൻഫ്ര സ്വന്തം മുതൽമുടക്കിലൊരുക്കുന്ന പദ്ധതിയുടെ കാര്യം ജല അതോറിറ്റിക്ക് മാത്രം തീരുമാനിക്കാനാവില്ല. കിൻഫ്രയുടെ സമ്മതം കൂടി ആവശ്യമാണ്. കൂടാതെ, പദ്ധതിയുടെ പൈപ്പ് ലൈൻ പൂർത്തിയാകുന്ന മുറക്ക് പരിഗണിക്കാമെന്ന് മാത്രമേ സൂചിപ്പിച്ചിരുന്നുള്ളൂവെന്നും സൂപ്രണ്ടിങ് എൻജിനീയര്‍ മാധ്യമപ്രവർത്തകരെ അറിയിച്ചു.