വാക്​സിനെടുത്തവർ ഇന്ന്​ ദുരിതാശ്വാസ നിധിയിലേക്ക്​ നൽകിയത്​ 22 ലക്ഷം, ഇതാണ്​ കേരളത്തിന്‍റെ കരുത്ത്​ -മുഖ്യമന്ത്രി

തിരുവനന്തപുരം: സംസ്​ഥാനത്ത്​ സൗജന്യമായി വാക്​സിൻ സ്വീകരിച്ചവർ, വ്യാഴാഴ്ച മുഖ്യമന്ത്രിയുടെ ദുരിതാശ്വാസ നിധിയിലേക്ക്​ 22 ലക്ഷം രൂപയാണ്​ നൽകിയതെന്നും ഇതാണ്​ കേരളത്തിന്‍റെ കരുത്തുമെന്നും മുഖ്യമന്ത്രി പിണറായി വിജയൻ. വ്യാഴാഴ്ച ​ൈവകീട്ട്​ 4.30 വരെയുള്ള കണക്കാണിത്​.

നമ്മുടെ നാടിന്‍റെ പ്രത്യേകതയാണിത്​. ഇത്തരത്തിൽ കേരളത്തിന്‍റെ കൂട്ടായ്​മ മുമ്പും തിരിച്ചറിഞ്ഞതാണ്​. ഇത്തരം പ്രവർത്തനങ്ങളിലൂടെയാണ്​ നമുക്ക്​ പ്രതിസന്ധികളെ തരണം ചെയ്യാൻ കഴിയുന്നത്​​. പ്രതിസന്ധി ഘട്ടത്തിൽ സർക്കാറിനൊപ്പം നിൽക്കുകയാണ്​ ജനങ്ങൾ​. വരും ദിവസങ്ങളിൽ ദുരിതാശ്വാസ നിധിയുമായി ബന്ധപ്പെട്ട്​ ചർച്ചകൾ നടത്തി കൂടുതൽ കാര്യങ്ങൾ വ്യക്​തമാക്കുമെന്നും മുഖ്യമന്ത്രി പറഞ്ഞു.

രോഗികൾ വർധിച്ച സാഹചര്യത്തിൽ​ ഓക്​സിജൻ സൗകര്യമുള്ള കൂടുതൽ ആംബുലസുകൾ ഒരുക്കിയിട്ടുണ്ട്​. എറണാകുളത്ത്​ കടുത്ത നടപടികളാണ്​ സ്വീകരിക്കുന്നത്​. കണ്ടെയ്​ൻ​െമന്‍റ്​ സോണിൽ ഏർപ്പെടുത്തിയ നിയന്ത്രണങ്ങൾ പാലിക്കപ്പെടുന്നുവെന്ന്​ ഉറപ്പുവരുത്തും. കോവിഡ്​ പ്രോ​​ട്ടോകോൾ പാലിക്കാതെ വഴിയോര കച്ചവടം നടത്തുന്നവർക്കെതിരെ നടപടി ഉണ്ടാകും.

പൊലീസ്​ പരിശോധന കർശനമാക്കും. ഇതര സംസ്​ഥാന തൊഴിലാളികൾക്കിടയിൽ പരിഭ്രാന്തി പരത്താനായി ചിലർ വ്യാജപ്രചാരണം നടത്തുന്നുണ്ട്​. ഇതിനെതിരെ കർശന നടപടി ഉണ്ടാകും. തൊഴിലാളികൾക്ക്​ മാർഗനിർദേശങ്ങൾ നൽകും.

തൃശൂർ പൂരം മാതൃകാപരമായി കോവിഡ്​ മാനദണ്ഡങ്ങൾ പാലിച്ച്​ നടത്തും. പൊതുജനങ്ങളെ പ​ങ്കെടുപ്പിക്കാതെ പൂരം നടത്താനുള്ള ഒരുക്കം പൂർത്തിയായി. ശക്​തമായ പൊലീസ്​ സുരക്ഷയിലാകും പൂരം.

കൂട്ടംകൂടാതെ നോമ്പ്​ തുറ നടത്താനുള്ള നിർദേശം നൽകിയിട്ടുണ്ട്​. വയനാട്​ ജില്ലയിലെ അതിർത്തികളിൽ കൂടുതൽ ക്രമീകരണം ഏർപ്പെടുത്തി. അന്തർസംസ്​ഥാന യാത്രക്കാർക്കായി​ ബോർഡർ ഫെസിലിറ്റേഷൻ സെന്‍റർ തുറന്നിട്ടുണ്ട്​. ആർ.ടി.പി.സി.എആർ ടെസ്റ്റ്​ നടത്താൻ ആവശ്യമായ കിയോസ്​കുകൾ സ്​ഥാപിച്ചു.

രോഗവ്യാപനം ശക്​തമായ സാഹചര്യത്തിൽ കൂടുതൽ പേർ കോവിഡ്​ ബ്രിഗേഡിന്‍റെ ഭാഗമാകണമെന്ന്​ മുഖ്യമന്ത്രി അഭ്യർഥിച്ചു. കോവിഡ്​ രണ്ടാം വ്യാപനം നേരിടാനുള്ള ക്രമീകരണങ്ങൾ ചർച്ച ചെയ്യാൻ ഏപ്രിൽ 26ന് രാവിലെ 11.30ന്​​ വിഡിയോ കോൺഫറൻസ്​ മുഖേന​​ സർവകക്ഷി യോഗം ചേരും.

വാക്​സിൻ ലഭ്യമാക്കണമെന്ന്​ ആവശ്യപ്പെട്ട്​ കേന്ദ്രത്തിന്​ അയച്ച കത്തിന്​ മറുപടി ലഭിച്ചിട്ടില്ല. ഇക്കാര്യത്തിൽ ശുഭപ്രതീക്ഷ കൈവെടിഞ്ഞിട്ടില്ല. അഥവാ നിഷേധ രൂപത്തിലാണ്​ മറുപടി വരുന്നതെങ്കിൽ നമ്മൾ വൈകിപ്പോകും. അതിനാലാണ്​ കമ്പനികളിൽനിന്ന്​ വാക്​സിൻ നേരിട്ട്​ വാങ്ങാൻ നടപടി ആരംഭിച്ചത്​ -മുഖ്യമന്ത്രി കൂട്ടിച്ചേർത്തു.