ടൂർ കമ്മിറ്റി വേണം, പൊലീസിനെയും ആർ.ടി.ഒ​യെയും അറിയിക്കണം; സ്കൂൾ വിനോദയാത്രക്ക് ഇനി കർശന നിയന്ത്രണം

തിരുവനന്തപുരം: സ്കൂളുകളിലെ പഠനയാത്രകൾക്ക്​ കടുത്ത നിയ​ന്ത്രണങ്ങൾ ഏർപ്പെടുത്തി പൊതുവിദ്യാഭ്യാസ വകുപ്പ്​ മാർഗനിർദേശം പുറപ്പെടുവിച്ചു. വടക്കഞ്ചേരി ദുരന്തത്തിന്‍റെ സാഹചര്യത്തിലാണ്​ പുതുക്കിയ നിർദേശങ്ങൾ. കുട്ടികളുടെ രക്ഷിതാക്കളിൽനിന്ന്​ സമ്മതപത്രം മുൻകൂർ വാങ്ങണം. ഗതാഗത വകുപ്പ്​ നിർദേശിക്കുന്ന മാനദണ്ഡങ്ങൾ പാലിക്കുന്ന വാഹനമേ ഉപയോഗിക്കാവൂ. രൂപമാറ്റം വരുത്തിയതും ആഡംബര ലൈറ്റുകളും ആരോചകശബ്​ദം പുറപ്പെടുവിക്കുന്നതുമായ വാഹനം പാടില്ല. നിയമപ്രകാരം അനുവദനീയമായ എണ്ണം കുട്ടികളേ വാഹനങ്ങളിൽ പാടുള്ളൂ. യാത്ര തുടങ്ങുംമുമ്പ്​ ആർ.ടി.ഒ, ​ജോയിന്‍റ്​ ആർ.ടി.ഒ എന്നിവരെ വിവരം അറിയിക്കണം. യാത്ര പുറപ്പെടുംമുമ്പ്​ ബന്ധപ്പെട്ട പൊലീസ്​ സ്​റ്റേഷനിൽ വാഹനത്തെക്കുറിച്ചടക്കം വിവരങ്ങൾ അറിയിക്കണം. വാഹന രേഖകൾ യാത്ര പുറപ്പെടുംമുമ്പ്​ സ്കൂൾ അധികൃതർ പരിശോധിച്ച്​ ഉറപ്പാക്കണം. അധ്യാപക വിദ്യാർഥി അനുപാതം 1: 15 ആകണം. രാത്രി പത്തിനും രാവിലെ അഞ്ചിനും ഇടയിൽ യാത്ര പാടില്ലെന്നും മാർഗനിർദേശത്തിൽ പറയുന്നു.

സ്കൂളുകളിൽ വിദ്യാർഥി കൺവീനറും അധ്യാപക പ്രതിനിധിയും പി.ടി.എ പ്രതിനിധിയും ഉൾ​െപ്പട്ട ടൂർ കമ്മിറ്റി രൂപവത്​കരിക്കണം. യാത്രകൾ സ്കൂൾ മേലധികാരിയുടെ പൂർണ നിയന്ത്രണത്തിലാകണം. യാത്രാവിവരം ഉപജില്ല-വിദ്യഭ്യാസ ജില്ല-ഡി.ഡി.ഇ, അടക്കം അധികൃതർക്ക്​ സമർപ്പിക്കണം. യാത്രയിൽ പ​ങ്കെടുക്കുന്ന കുട്ടികളുടെ രക്ഷിതാക്കളുടെ യോഗം ചേരണം. ഒരു അക്കാദമിക വർഷം പരമാവധി മൂന്ന്​ ദിവസമേ പഠനയാത്ര പാടുള്ളൂ. സ്കൂൾ പ്രവൃത്തിദിനമല്ലാത്ത ദിവസവും ഇതിൽ ഉൾപ്പെടുത്തണം.

എല്ലാ വിഭാഗത്തിൽപെട്ട കുട്ടികൾക്കും പ​ങ്കെടുക്കാൻ കഴിയുന്നവിധം സ്ഥലങ്ങൾ നിശ്ചയിക്കണം. വിദ്യാർഥികളിൽനിന്നും അമിതതുക ഈടാക്കരുത്​. വിദ്യാഭ്യാസ പ്രാധാന്യമുള്ള സ്ഥലങ്ങളും സ്ഥാപനങ്ങളും യാത്രക്ക്​ തെരഞ്ഞെടുക്കണം. ജലയാത്രകൾ, വനയാത്രകൾ, വന്യമൃഗ സ​ങ്കേതകൾ എന്നിവടങ്ങളിൽ സന്ദർശിക്കുമ്പോൾ മുൻകൂർ അനുതി നേടണം. അംഗീകൃത ടൂർ ഓപർമാരെ മാത്രം ഉപയോഗിക്കണം. പുകവലി, ലഹരി ഉപയോഗം പാടില്ല. സ്വകാര്യത ലംഘിക്കുന്ന തരത്തിൽ ചിത്ര-വിഡിയോകൾ പകർത്താനോ പങ്കുവെക്കാനോ പാടില്ല. യാത്ര കഴിഞ്ഞ്​ റി​പ്പോർട്ട്​ വിദ്യാഭ്യാസ അധികൃതർക്ക്​ നൽകണം.