ഭക്ഷണം കഴിച്ച്​ കൈ കഴുകാൻ പോയ കഞ്ചാവ്​ കേസ്​ പ്രതി രക്ഷപ്പെട്ടു; അഞ്ച്​ മണിക്കൂറിന്​ ശേഷം വീണ്ടും പിടിയിൽ

മലപ്പുറം: അറസ്​റ്റിലായതിന്​ ശേഷം എക്​സൈസിനെ വെട്ടിച്ച്​ കടന്നുകളഞ്ഞ കഞ്ചാവ്​ കേസ്​ പ്രതിയെ അഞ്ച്​ മണിക്കൂറിന്​ ശേഷം വീണ്ടും പിടികൂടി. ​വ്യാഴാഴ്ച ഉച്ചക്ക്​ 2.15നാണ്​ ​ മലപ്പുറം സിവിൽ സിവിൽ സ്​റ്റേഷനിലെ എക്​സൈസ്​ ഓഫിസിനു സമീപത്ത്​ നിന്ന്​ പ്രതിയായ ഒഡീഷ സ്വദേശി ഹഡിപ മാച്ചോ (20) രക്ഷപ്പെടുന്നത്​.

ഭക്ഷണം കഴിച്ചതിനു ശേഷം കൈ കഴുകാൻ ശുചിമുറിയിൽ കയറിയപ്പോൾ ​ഉദ്യോഗസ്ഥരുടെ കണ്ണുവെട്ടിച്ച്​ രക്ഷ​പെടുകയായിരുന്നു. പ്രതി സിവിൽ സ്​റ്റേഷന്​ പിറകിലെ ശാന്തീതിരം പാർക്കിന്‍റെ ഭാഗ​ത്തേക്ക്​ പോയിട്ടുണ്ടാകുമെന്ന നിഗമനത്തിൽ ജില്ലയിലെ എക്​സൈസിന്‍റെ ലഭ്യമായ എല്ലാ ഫോഴ്​സിനെയും വിളിപ്പിച്ചാണ്​ വ്യാപക തിരച്ചിൽ നടത്തിയത്​.

സമീപത്തെ സി.സി.ടി.വികൾ പരിശോധി​​ച്ചെങ്കിലും പ്രതിയെ കുറിച്ച്​ സൂചന കിട്ടിയിരുന്നില്ല. ഇതിനിടെ രാത്രി 7.30ഓടെ കടലുണ്ടിപുഴയിൽ നിർമാണം നടക്കുന്ന നഗരസഭയുടെ നമ്പ്രാണി റെഗുലേറ്ററിന് സമീപം കൂട്ടിയിട്ട കല്ലുകളിൽ പ്രതി മറഞ്ഞിരിക്കുന്നത്​ ഉദ്യോഗസ്ഥരുടെ ശ്രദ്ധയിൽപ്പെട്ടു.

എക്​സൈസ്​ സംഘത്തെ കണ്ടപാ​ടെ പുഴയിലിറങ്ങി നീന്തി രക്ഷ​പ്പെടാൻ ശ്രമിച്ച പ്രതിയെ എക്​സൈസ്​ സംഘം പുഴയുടെ അക്കരെ എത്തി സാഹസികമായി പിടികൂടുകയായിരുന്നു. വ്യാഴാഴ്ച രാവിലെ 10 കിലോ കഞ്ചാവുമായി വേങ്ങരയിൽ നിന്നാണ്​ രക്ഷപ്പെട്ട ഹഡിപ മച്ചോയും കൂടെയുണ്ടായിരുന്ന യുവാവിനെയും പൊലീസ്​ കസ്റ്റഡിയിലെടുത്തത്​. ഇരുവർക്കുമെതിരെ ​കേസ്​ രജസ്റ്റർ ചെയ്ത്​ തുടർനടപടികൾ സ്വീകരിക്കുമെന്ന്​ എക്​സൈസ്​ അറിയിച്ചു. ​