സംസ്ഥാനം 1500 കോടി കൂടി കടമെടുക്കുന്നു

തിരുവനന്തപുരം: സാമ്പത്തിക വർഷം അവസാനിക്കാൻ 20 ദിവസം മാത്രം ശേഷിക്കെ, 1500 കോടി രൂപ കൂടി കടമെടുക്കാൻ സംസ്ഥാന സർക്കാർ തീരുമാനിച്ചു. ഇതിനായി പുറപ്പെടുവിച്ച കടപ്പ​ത്രത്തിന്‍റെ ലേലം മാർച്ച്​ 14ന്​ റിസർവ്​ ബാങ്കിന്‍റെ മുംബൈ ഓഫിസിൽ നടക്കും.

സാമ്പത്തിക വർഷം അവസാനിക്കാറായിട്ടും വാർഷിക പദ്ധതികൾ ഇഴഞ്ഞുനീങ്ങുകയാണ്​. കേന്ദ്ര സർക്കാർ കടമെടുപ്പിന്​ നിയന്ത്രണം കൊണ്ടുവന്നതും തിരിച്ചടിയായി. ട്രഷറിയിൽ നിന്ന്​ ബില്ലുകൾ മാറാൻ കടുത്ത നിയന്ത്രണമേർപ്പെടുത്തിയിട്ടുണ്ട്​. മാർച്ചിൽ ശമ്പള ദിവസങ്ങൾ കഴിഞ്ഞിട്ടും നിയന്ത്രണം തുടരുകയാണ്​.

10​ ലക്ഷത്തിന്​ മുകളിലുള്ള ബില്ലുകൾക്ക്​ ധനവകുപ്പിന്‍റെ പ്രത്യേക അനുമതി വേണം. ട്രഷറിയിൽ പരമാവധി പണമെത്തിക്കാനുള്ള ശ്രമവും ധനവകുപ്പ്​ നടത്തുന്നുണ്ട്​. പദ്ധതി പ്രവർത്തനത്തിനു​ പുറമെ, അടുത്ത മാസത്തെ ശമ്പള-പെൻഷൻ വിതരണത്തിനും പണം കണ്ടെത്തണം.