കേരളത്തിൽ ക്രിസ്ത്യാനികളോട്​ സംഘ്​പരിവാറിന്​ സ്​നേഹം, മറ്റിടങ്ങളിൽ ആക്രമണം -പിണറായി

പാലക്കാട്​: കേരളത്തിൽ സ്​നേഹം പ്രകടിപ്പിച്ച്​ ചുറ്റിത്തിരിയുന്ന സംഘ്​ പരിവാറുകാർ മറ്റിടങ്ങളിൽ ക്രിസ്ത്യൻ സമൂഹത്തെ വലിയതോതിൽ ആക്രമണത്തിന്​ ഇരയാക്കുന്നതായി മുഖ്യമന്ത്രി പിണറായി വിജയൻ. സി.പി.എം പാലക്കാട്​ ജില്ല സമ്മേളനം ഉദ്​ഘാടനം ചെയ്യുകയായിരുന്നു അദ്ദേഹം.

കേരളത്തിലെ ശക്തമായ മതനിരപേക്ഷ സാമൂഹിക അന്തരീക്ഷമാണ്​ സംഘ്​പരിവാറിനെ ഇത്തരം നീക്കത്തിൽനിന്നും പിന്തിരിപ്പിക്കുന്നത്​. അതുകൊണ്ടാണ്​ രാഷ്ട്രീയ ലാഭം മോഹിച്ച്​ സംഘ്​പരിവാറുകാർ ഇവിടെ ക്രൈസ്തവരോട്​ സ്​നേഹത്തോടെ നീങ്ങുന്നത്​.

ക്രൈസ്തവർ വലിയതോതിൽ മതപരിവർത്തനം നടത്തുന്നുവെന്നാണ്​ ആരോപണം. എന്നാൽ, ക്രിസ്ത്യൻ ജനസംഖ്യ ഇപ്പോഴും 2.3 ശതമാനം മാത്രമാണ്​​. ഫാഷിസ്റ്റ്​ കാഴ്ചപ്പാട്​ മുന്നോട്ടുവെക്കുന്ന പ്രസ്ഥാനമാണ്​ ആർ.എസ്​.എസ്​.

ആഭ്യന്തര ശത്രുക്കളായി അവർ കാണുന്നത്​ മുസ്​ലിംകളെയും ക്രൈസ്തവരേയും കമ്യൂണിസ്റ്റുകളെയുമാണ്​. ന്യൂനപക്ഷ വേട്ടയിലൂടെ രാജ്യത്തെ മതനിരപേക്ഷത തകർക്കാനാണ്​ ശ്രമം. മതാടിസ്ഥാനത്തിലുള്ള പൗരത്വ നിയമഭേദഗതിയും മുസ്​ലിം വിവാഹ മോചനം ക്രിമിനൽ കുറ്റമാക്കിയതും ഗോവധ പ്രശ്​നവുമെല്ലാം വർഗീയ ധ്രുവീകരണം ലക്ഷ്യമിട്ടുള്ളതാണ്​.

ബി.ജെ.പിയുടെ ബി ടീം ആകുകയാണ്​ കോൺഗ്രസ്​. ഹിന്ദുത്വ രാഷ്ട്രീയത്തിനെതിരെ പ്രത്യയശാസ്ത്രപരമായ പ്രതിരോധം തീർക്കുന്നതിന്​ പകരം ബി.ജെ.പിയുമായി സമരസപ്പെടുന്ന സമീപനമാണ്​ കോൺഗ്രസിന്‍റേത്​. കേരളത്തിന്‍റെ വികസനം തകർക്കാൻ യു.ഡി.എഫും ബി.ജെ.പിയും ജമാഅത്തെ ഇസ്​ലാമിയും കൂട്ടുചേർന്നിരിക്കുകയാണെന്ന്​ പിണറായി ആരോപിച്ചു.

എൽ.ഡി.എഫ്​ വീണ്ടും അധികാരത്തിൽ എത്തിയത്​ വികസന നേട്ടംകൊണ്ടാണെന്ന്​ തിരിച്ചറിഞ്ഞ ഇവർ, ഇനി ഇവിടെ ഒരു വികസനവും വേണ്ടെന്നും എല്ലാത്തിനേയും എതിർക്കണമെന്നും തീരുമാനിച്ചിരിക്കുകയാണ്​. കേന്ദ്ര സർക്കാറിനെ ഉപയോഗിച്ചും പദ്ധതികളെ തടയാൻ ശ്രമിക്കുന്നു.

ബി.ജെ.പിയും യു.ഡി.എഫും ഒത്തുചേർന്നാണ്​ കെ-റെയിലിനെ തകർക്കാൻ നീക്കം നടത്തുന്നത്​​. ഇതിന്‍റെയെല്ലാം കൂടെ ജമാഅ​ത്തെ ഇസ്​ലാമിയുമുണ്ട്​. ഇസ്​ലാമിക രാഷ്ട്രവാദവുമായി നടക്കുന്ന ജമാഅത്തിന്‍റെ പരിസ്ഥിതി സ്​നേഹവും ജനാധിപത്യവാദവും തുറന്നുകാട്ടണമെന്നും പിണറായി പറഞ്ഞു.