ത​ന്‍റെ മധ്യസ്​ഥതയിലല്ലാതെയും ആർ.എസ്​.എസ്​-സി.പി.എം ചർച്ച നടന്നിട്ടുണ്ടാകാം​ -ശ്രീ എം

കോഴിക്കോട്​: ത​ന്‍റെ മധ്യസ്​ഥതയിലല്ലാതെയും ആർ.എസ്​.എസ്​-സി.പി.എം ചർച്ചകൾ നടന്നിട്ടുണ്ടായിരിക്കാമെന്ന്​​ യോഗാചാര്യൻ ശ്രീ എം. ചർച്ചക്ക്​ അടിത്തറയിടുക മാത്രമാണ്​ താൻ ചെയ്​തത്​. ചർച്ചകൾക്കുശേഷം മൂന്ന്​ - നാല്​ വർഷം അക്രമ സംഭവങ്ങൾ കുറയുകയും വലിയ മാറ്റങ്ങളണ്ടാവുകയും ചെയ്​തതായി ശ്രീ എം മീഡിയാവൺ ചാനലിന്​ അനുവദിച്ച അഭിമുഖത്തിൽ വ്യക്​തമാക്കി.

ഒരു രാഷ്​ട്രീയ പാർട്ടിയിലും അംഗമല്ലെന്നും ആർ.എസ്​.എസിൽ അംഗത്വം എടുക്കുകയോ ശാഖയിൽ പ​ങ്കെടുക്കുകയോ ചെയ്​തിട്ടില്ലെന്നും അദ്ദേഹം വ്യക്​തമാക്കി. ഓർഗ​നൈസറിൽ പ്രവർത്തിക്കുകയോ അതി​ന്‍റെ ലേഖകനാവുകയോ ചെയ്​തിട്ടില്ല. നിഷ്​പക്ഷ നിലപാട്​ എടുക്കുന്നയാളാണ്​ ഞാൻ. ആർ.​എസ്.​എസ്​ സഹയാത്രികനാണെന്നത്​ ​ജീവിതത്തിൽ ആദ്യമായി കേൾക്കുന്നതാണ്​. അതേസമയം, എന്തൊക്കെ പറഞ്ഞാലും ആർ.എസ്.​എസ്​ ദേശീയ വാദികളാണ്​.

ഇന്ത്യയിലിരുന്ന്​ ഞാൻ പാകിസ്​താനിയാണെന്ന്​ പറയുന്ന കൂട്ടത്തിലല്ലെന്ന്​ ശ്രീ എം വ്യക്​തമാക്കി. തിരുവനന്തപുരത്ത്​ യോഗാ ​കേന്ദ്രം തുടങ്ങാൻ സർക്കാർ ഭൂമി അനുവദിച്ചത്​ സമാധാന ചർച്ചക്കുള്ള പ്രത്യുപകാരമായല്ല. ചർച്ചകൾ നടന്നത്​ വളരെ മുമ്പാണ്​. ചീഫ്​ സെക്രട്ടറിക്ക്​ ഞങ്ങൾ നൽകിയ അപേക്ഷയിൽ സർക്കാർ സ്​ഥലം അനുവദിച്ചു തന്നതാണ്​. നഗരത്തിന്​ പുറത്ത്​ സ്​ഥലം അനുവദിക്കണമെന്ന്​ മാത്രമാണ്​ സത്​സങ്​ ഫൗണ്ടേഷൻ അഭ്യർത്ഥിച്ചത്​​.

ഇപ്പോൾ അനുവദിച്ചതായി പറയുന്ന സ്​ഥലം എവിടെയാണെന്ന്​ പോലും തനിക്ക്​ അറിയില്ല. അതി​ന്‍റെ സർക്കാർ ഉത്തരവ്​ ഇതുവരെ കിട്ടിയിട്ടില്ല. വിവാദമായ സാഹചര്യത്തിൽ അപേക്ഷ പിൻവലിക്കുന്നുണ്ടോ എന്ന ചോദ്യത്തിന്​ പിൻവലിച്ചാൽ ആരോപണങ്ങൾ​ സത്യമാവുമെന്ന്​ അദ്ദേഹം പറഞ്ഞു.