നീതു വരാതിരിക്കാൻ കാരണം മാനസിക പ്രയാസമായിരിക്കാം, ഞങ്ങളെ ഇനിയും ബന്ധപ്പെടാവുന്നതാണ്​ -രമ്യ ഹരിദാസ്​

വടക്കാഞ്ചേരി (തൃശൂർ): വീടില്ലാതെ പുറ​േമ്പാക്കിൽ കഴിയുകയാണെന്ന്​ കത്തെഴുതിയ നീതുവിന്​ തന്നെ​യോ എം.എൽ.എ അനിൽ അക്കരയെയോ കൗൺസിലർ സൈറാബാനു ടീച്ചറെയോ ബന്ധപ്പെടാമെന്ന്​ രമ്യ ഹരിദാസ്​ എം.പി. ഒരുപക്ഷേ, വീടില്ലാതെ ഒറ്റമുറിയിൽ താമസിക്കുന്ന നീതുവിന് മാനസികമായ പ്രയാസമായിരിക്കാം ഇന്ന് എത്തിച്ചേരാൻ സാധിക്കാതെ പോയ​െതന്നും രമ്യ ​ഫേസ്​ബുക്കിൽ കുറിച്ചു.

വീടില്ലാതെ പുറ​േമ്പാക്കിൽ കഴിയുകയാണെന്ന്​ കത്തെഴുതിയ നീതു ജോൺസന്​ വീടും സ്​ഥലവും നൽകാൻ അനിൽ അക്കര എം.എൽ.എ ചൊവ്വാഴ്​ച രാവിലെ റോഡരികിൽ രണ്ടര മണിക്കൂർ കാത്തുനിന്നിരുന്നു. എന്നാൽ, വീടുവാങ്ങാൻ നീതുവോ കുടുംബമോ നീതുവിനെ പരിചയമുള്ളവരോ വന്നില്ല. ഒടുവിൽ 11.30ഓടെ എം.എൽ.എയും വടക്കാഞ്ചേരി മങ്കര വാർഡ്​ കൗണ്‍സിലര്‍ സൈറാബാനു ടീച്ചറും രമ്യഹരിദാസ്​ എം.പിയും മടങ്ങി.

ലൈഫ്​ മിഷൻ പദ്ധതിയുടെ ഉപഭോക്താവ്​ എന്ന രീതിയിലാണ്​ മങ്കരയിലെ നീതു ജോണ്‍സണ്‍ എന്ന വിദ്യാര്‍ഥിനി അനിൽ അക്കരക്ക്​ കത്തെഴുതിയിരുന്നത്​. വടക്കാഞ്ചേരിയില്‍ ലൈഫ് മിഷന്‍ പദ്ധതിയില്‍ ഉള്‍പ്പെട്ട കുടുംബത്തിലെ പെണ്‍കുട്ടിയുടേതെന്ന തരത്തില്‍ സ്ഥലം എം.എൽ.എ ആയ അനില്‍ അക്കരക്ക്​ എഴുതിയ കത്ത് സമൂഹമാധ്യമങ്ങളില്‍ വൈറലായിരുന്നു. ലൈഫ്​മിഷൻ അഴിമതിക്കെതിരെ എം.എൽ.എ രംഗത്തുവന്നത്​, നഗരസഭ പുറമ്പോക്കില്‍ ഒറ്റമുറിയില്‍ താമസിക്കുന്ന തങ്ങൾക്ക്​ അടച്ചുറപ്പുള്ള വീടെന്ന സ്വപ്​നത്തിന്​ വിലങ്ങുതടിയായതായി കത്തിൽ ബോധിപ്പിച്ചിരുന്നു.

കത്തെഴുതിയ ​നീതു ജോൺസൺ ആരാണെന്നറിയാനും അവർക്ക്​ വീട്​ നൽകുവാനുമാണ്​ എം.എല്‍.എയും കൗണ്‍സിലര്‍ സൈറാബാനു ടീച്ചറും വടക്കാഞ്ചേരി മങ്കരയിലെ റോഡരികില്‍ കാത്തുനിന്നത്​. ഒമ്പതു മണിമുതൽ 11 വരെ നിൽക്കാനായിരുന്നു തീരു​മാനം. ഇക്കാര്യം കഴിഞ്ഞ ദിവസം തന്നെ സമൂഹമാധ്യമങ്ങളിൽ മുൻകൂട്ടി അറിയിച്ചിരുന്നു. എന്നാൽ, 11 മണിവരെ ആരും വരാത്തതിനെ തുടർന്ന്​ 11.30 വരെ കാത്തുനിന്നു.​ നീതുവിനോ നീതുവിനെ നേരിട്ടറിയുന്നവർക്കോ തങ്ങളെ സമീപിക്കാമെന്നും പെൺകുട്ടിക്ക്​ വീടും സ്ഥലവും നൽകുമെന്നും അനിൽ അക്കര ഫേസ്​ബുക്​ ലൈവിൽ വ്യക്തമാക്കിയിരുന്നു.