നടിയെ ആക്രമിച്ച കേസ്​; തുടരന്വേഷണം പൂർത്തിയാക്കാൻ മൂന്ന്​ മാസംകൂടി വേണമെന്ന്​ അന്വേഷണസംഘം

കൊച്ചി: നടിയെ തട്ടിക്കൊണ്ടുപോയി ആക്രമിച്ച കേസിൽ സംവിധായകൻ ബാലചന്ദ്ര കുമാറിന്‍റെ വെളിപ്പെടുത്തലി​ന്‍റെ അടിസ്ഥാനത്തിൽ നടക്കുന്ന തുടരന്വേഷണം പൂർത്തിയാക്കാൻ മൂന്ന്​ മാസംകൂടി വേണമെന്ന്​ അന്വേഷണ സംഘം. അനുവദിച്ച സമയപരിധി അവസാനിച്ച സാഹചര്യത്തിലാണ്​ കൂടുതൽ സമയം ആവശ്യപ്പെട്ട്​ അന്വേഷണസംഘം വിചാരണ കോടതിയെ സമീപിച്ചത്​.

അതിനിടെ, കോടതിയുടെ കസ്റ്റഡിയിലുള്ള ലൈംഗികാതിക്രമ ദൃശ്യങ്ങൾ അടങ്ങിയ മെമ്മറി കാർഡ്​ അനധികൃതമായി ഉപയോഗിച്ചെന്ന് കാണിച്ച്​ വ്യാഴാഴ്ച അഡീഷനൽ സെഷൻസ് കോടതിയിൽ പ്രോസിക്യൂഷൻ റിപ്പോർട്ട് നൽകി. എന്നാൽ, അന്വേഷണം പൂർത്തിയാക്കി റിപ്പോർട്ട് സമർപ്പിക്കാൻ പ്രത്യേക നിർദേശം നൽകിയിട്ടും ഫെബ്രുവരി ഒന്ന്​ മുതൽ മാർച്ച് ഒന്ന്​ വരെ നടത്തിയ അന്വേഷണത്തെക്കുറിച്ച് റിപ്പോർട്ടിൽ ഒരു പരാമർശവുമില്ല. ഈ സാഹചര്യത്തിൽ അന്വേഷണത്തിന്​ കൂടുതൽ സമയം അനുവദിക്കാൻ കഴിയില്ല. ഈ മാസം പത്തിനോ അതിനുമുമ്പോ അന്വേഷണ വിശദാംശങ്ങൾ അടങ്ങിയ റിപ്പോർട്ട് നൽകണമെന്ന്​ കോടതി കർശന നിർദേശം നൽകിയിട്ടുണ്ട്​.

ആക്രമണത്തി​ന്‍റെ ദൃശ്യങ്ങൾ കോടതിയിൽനിന്ന് ചോർന്നതിൽ ആശങ്കയറിയിച്ച്​ നേരത്തേ സുപ്രീംകോടതിക്കും മുഖ്യമന്ത്രിക്കും നടി കത്തയച്ചിരുന്നു. കോടതിയുടെ കസ്​​റ്റഡിയിലുള്ള മെമ്മറി കാർഡ് മറ്റൊരു കമ്പ്യൂട്ടർ ഉപയോഗിച്ച് ആക്‌സസ് ചെയ്തതാണെന്ന് സംശയിക്കുന്നതായാണ്​ പരാതിയിലുള്ളത്​. ഇക്കാര്യം അന്വേഷിച്ചുവരുകയാണ്​. നടൻ ദിലീപ് ഉൾപ്പെടെ ഒമ്പത് പ്രതികളാണ് വിചാരണ നേരിടുന്നത്. 2017 ഫെബ്രുവരി 17നാണ് തൃശൂരിൽനിന്ന് കൊച്ചിയിലേക്കുള്ള യാത്രക്കിടെ നടിയെ തട്ടിക്കൊണ്ടുപോയി ആക്രമിച്ചത്​.