വാണിജ്യ പാചകവാതക സിലിണ്ടറിന്‍റെ വില കുത്തനെ കൂട്ടി

കൊച്ചി: വാണിജ്യാവശ്യത്തിനുള്ള പാചക വാതകത്തിന്​ വില കുത്തനെ കൂട്ടി. ചൊവ്വാഴ്ച 105 രൂപയാണ്​ വർധിപ്പിച്ചത്​. കൊച്ചിയിൽ 19 കിലോ സിലിണ്ടറിന്റെ വില 2031.50 രൂപയായി. 1926.50 രൂപയിൽനിന്നാണ്​ വർധന. അഞ്ച് കിലോ സിലിണ്ടറിന്റെ വില 27 രൂപയും കൂടി. 14 കിലോ വരുന്ന ഗാർഹിക സിലിണ്ടറിന്‍റെ വില 906.50 രൂപയായി തുടരും.

ആറുമാസത്തിനിടെ 19 കിലോ സിലിണ്ടറിന്‍റെ വിലയിൽ 294.50 രൂപയാണ്​ വർധിച്ചത്​. ഫെബ്രുവരി ഒന്നിന്​ വാണിജ്യാവശ്യത്തിനുള്ള സിലിണ്ടറിന്‍റെ വില എണ്ണക്കമ്പനികൾ 91.50 രൂപ കുറച്ചിരുന്നു. എല്ലാ മാസവും ഒന്നിന്​ പ്രാബല്യത്തിൽ വരുന്ന തരത്തിൽ പാചകവാതക വില പുതുക്കാറുണ്ട്​. ഫെബ്രുവരിക്ക്​ മുമ്പ്​ അഞ്ച്​ മാസത്തിനിടെ അഞ്ചു പ്രാവശ്യമാണ്​ വില കൂട്ടിയത്​. ഹോട്ടലുകളും കാന്‍റീനുകളും ഉൾപ്പെടെ വാണിജ്യ സിലിണ്ടർ ഇന്ധനമായി ഉപയോഗിക്കുന്ന ഇടങ്ങളിലെല്ലാം ചെലവ്​ കൂടുമെന്നതിനാൽ വിലവർധനവിന്​ കാരണമാകും.

അന്താരാഷ്ട്ര തലത്തിൽ അസംസ്കൃത എണ്ണ വില ബ്രന്‍റ്​ ഇനം ബാരലിന്​ 100 ഡോളറിൽതന്നെ നിൽക്കുന്നത്​ ഇന്ത്യയിലും പെട്രോൾ, ഡീസൽ വില വർധിപ്പിക്കാൻ ഇടയാക്കും. റഷ്യ-യുക്രെയ്​ൻ സംഘർഷത്തിന്​ അറുതിയാകാതെ അസംസ്കൃത എണ്ണ വിലയിൽ കാര്യമായ കുറവുണ്ടാകാനിടയില്ല. അഞ്ച്​ സംസ്ഥാനങ്ങളിലെ തെരഞ്ഞെടുപ്പ്​ അവസാനിക്കുന്ന മാർച്ച്​ ഏഴിന്​ ശേഷം ഇന്ധനവില വർധിപ്പിച്ചേക്കും. എൽ.പി.ജി, പെട്രോൾ, ഡീസൽ എന്നിവക്ക്​ പുറമെ സി.എൻ.ജി വിലയും കൂടുമെന്ന്​ റിപ്പോർട്ടുകളുണ്ട്​. ഇത്​ രൂക്ഷമായ വിലക്കയറ്റത്തിലേക്ക്​ നാടിനെ തള്ളിവിടുമെന്നാണ്​ ആശങ്ക.

കഴിഞ്ഞ വർഷം നവംബർ മുതൽ പെട്രോൾ, ഡീസൽ വില വർധിപ്പിച്ചിട്ടില്ല. അസംസ്കൃത എണ്ണവിലയുമായി ഏകീകരിക്കാൻ പെട്രോൾ, ഡീസൽ എന്നിവക്ക്​ 10 ശതമാനവും പാചക വാതകത്തിന്​ 30 ശതമാനവും വില ഉയർത്തുമെന്നാണ്​ കണക്കുകൂട്ടൽ.