ആർ.എസ്.എസ് ദേശീയ നേതൃത്വവുമായി ഒാർത്തഡോക്സ് -‍യാകോബായ പ്രതിനിധികൾ ചർച്ച നടത്തി

കൊച്ചി: സഭാതർക്കം പരിഹാരമില്ലാതെ തുടരുന്നതിനിടെ ആർ.എസ്​.എസ്​ കാര്യാലയത്തി​െലത്തി ഓർത്തഡോക്​സ്​, യാക്കോബായ വിഭാഗം ബിഷപ്പുമാരു​െടയും നേതാക്കളു​െടയും ചർച്ച. രാവിലെ ഓർത്തഡോക്​സ്​ വിഭാഗവും ഉച്ചക്കുശേഷം യാക്കോബായ വിഭാഗവുമാണ്​ കൊച്ചി എളമക്കരയിലെ ആർ.എസ്​.എസ്​ ആസ്ഥാനത്ത്​, ഗുജറാത്തി ൽനിന്നുള്ള ദേശീയ സഹസർ കാര്യവാഹ് മൻമോഹൻ വൈദ്യയുമായി ചർച്ച നടത്തിയത്​. പള്ളിത്തർക്കവുമായി ബന്ധപ്പെട്ട വിഷയങ്ങൾക്ക്​ പുറമെ നിലവിലെ മറ്റ്​ രാഷ്​ട്രീയ സ്ഥിതിഗതികളും ചർച്ച ചെയ്തെന്നാണ്​ ചർച്ചക്കുശേഷം പുറത്തിറങ്ങിയ സഭാ നേതാക്കൾ പറഞ്ഞത്​.

ഓർത്ത‍‍ഡോക്സ് സഭയുടെ അഹമ്മദാബാദ് ഭദ്രാസന ചുമതലയുള്ള ബിഷപ് ഗീവർഗീസ് മാർ യൂലിയോസ്, കൊച്ചി ഭദ്രാസന ചുമതലയുള്ള ബിഷപ്​ യാക്കോബ് മാർ ഐറേനിയോസ് എന്നിവരാണ് രാവിലെ ചർച്ച നടത്തിയത്​. സഭ മെത്രാപ്പോലീത്തൻ ട്രസ്​റ്റി ജോസഫ്​ മാർ ഗ്രിഗോറിയോസ്​, കുര്യാക്കോസ്​ മാർ തെയോഫിലോസ്, ഫാ. റീബാപോൾ വട്ടവേലിൽ​ എന്നിവരാണ്​​ യാക്കോബായ സഭക്കുവേണ്ടി ചർച്ചക്കെത്തിയത്.

സഭാ വിഷയത്തിൽ രണ്ടറ്റത്ത്​ നിൽക്കുന്ന ഇരുവിഭാഗത്തെയും ഈ തെരഞ്ഞെടുപ്പിൽ തങ്ങ​ൾക്കൊപ്പം നിർത്തുകയെന്ന ബി.ജെ.പി അജണ്ടയുടെ ഭാഗമായാണ്​ ചർച്ച നടത്തിയതെന്നാണ്​ അറിയുന്നത്. ഓർത്തഡോക്​സ്​ വിഭാഗവുമായുള്ള ചർച്ചക്ക്​ നിലവിൽ ആർ.എസ്​.എസുമായി അടുത്ത ബന്ധം പുലർത്തുന്ന അഹമ്മദാബാദ്​ ബിഷപ്​ മുഖേനയാണ്​ പാർട്ടി നേതൃത്വം വഴിയൊരുക്കിയത്​.

സഭയോടുള്ള സംസ്ഥാന സർക്കാർ നിലപാടിൽ എതിർപ്പും യു.ഡി.എഫ്​ നിലപാടിൽ വിശ്വാസ്യത കൽപിക്കുകയും ചെയ്യാത്ത ഓർത്തഡോക്​സ്​ സഭ ഒപ്പം നിന്നാൽ മൂന്ന്​ മണ്ഡലത്തിലെങ്കിലും എൻ.ഡി.എക്ക്​ വിജയസാധ്യത കൂട്ടാമെന്നാണ്​ കണക്കുകൂട്ടൽ. പള്ളികൾ തങ്ങൾക്ക്​ വിട്ടുനൽകണമെന്ന സുപ്രീംകോടതി ഉത്തരവ്​ നടപ്പാക്കണമെന്ന ആവശ്യമാണ്​ ​ഓർത്തഡോക്​സ്​ സഭക്കുള്ളത്​. അതേസമയം, നേരത്തേ മുഖ്യമന്ത്രി നേരിട്ടും ഉപസമിതിയുടെ നേതൃത്വത്തിലും നിരവധി തവണ നടന്ന ചർച്ചകളിൽനിന്ന്​ സഭാ പ്രതിനിധികള്‍ വിട്ടുനിന്നിരുന്നു.

സുപ്രീംകോടതി വിധി തങ്ങ​ൾക്കെതിരല്ലെന്ന്​ കരുതുന്ന യാക്കോബായ സഭയെയും കൂടെ നിർത്താനുള്ള തന്ത്രത്തി​െൻറ ഭാഗമായാണ്​ അവരെയും ചർച്ചക്ക്​ വിളിച്ചത്​്. നേരത്തേ മുതൽ പ്രധാനമന്ത്രിയുടെ ഇടപെടലിനെത്തുടർന്നെന്ന പേരിൽ മിസോറം ഗവർണർ പി.എസ്.​ ശ്രീധരൻ പിള്ള യാക്കോബായ സഭയുമായി ചർച്ച നടത്തുന്നുണ്ട്​. ഇതി​െൻറ തുടർച്ചയായാണ്​ ആർ.എസ്​.എസ്​ കാര്യാലയത്തിലെ ചർച്ച​. സംസ്ഥാന സർക്കാറിനൊപ്പം നിന്നിരുന്ന യാക്കോബായ വിഭാഗത്തിലെ ഇപ്പോൾ പ്രകടമായ ചാഞ്ചാട്ടം മുതലെടുക്കുകയാണ്​ ചർച്ചയു​െട ലക്ഷ്യം. പ്രശ്​നപരിഹാരത്തിന്​ സാധിച്ചാൽ ദീർഘകാലാടിസ്ഥാനത്തിൽ തന്നെ സംസ്ഥാനത്ത്​ പാർട്ടിക്ക്​ അത്​ ഗുണം ചെയ്യുമെന്നും ബി.ജെ.പിയും ആർ.എസ്​.എസും കണക്ക​ുകൂട്ടുന്നു.