സമ്പത്തുകാലത്ത്​ ചുറ്റിലും ആളുകളുണ്ടായിരുന്ന ഒരു പ്രവാസിയുടെ മടക്കമിങ്ങനെ; കണ്ണു നനയാതെ വായിച്ചു തീർക്കാനാകില്ലിത്​

പ്രവാസിയായ നായരേട്ടന്​ ചുറ്റും സമ്പത്തുകാലത്ത്​ നിറയെ ആളുകളുണ്ടായിരുന്നു. ആവശ്യങ്ങളുമായി വന്നവർക്കൊന്നും നിരാശരായി മടങ്ങേണ്ടിയും വന്നിട്ടില്ല. ഒടുവിൽ, കടക്കാരെ ഭയന്ന്​ ഒരു കഷ്​ണം കയറിൽ അദ്ദേഹം ജീവിതം അവസാനിപ്പിച്ചപ്പോൾ, മൃതദേഹം നാട്ടിലേക്കയക്കാനുള്ള പെട്ടി വാങ്ങാൻ പോലുമുള്ള പണം ബാക്കിയുണ്ടായിരുന്നില്ല. കണ്ണു നനയാതെ കേട്ടിരിക്കാനാകാത്ത ഒരു പ്രവാസിയുടെ ദുരന്ത കഥയാണിത്​. ഗൾഫിലെ സന്നദ്ധ പ്രവർത്തകനായ അഷ്​റഫ്​ താമരശേരിയാണ് യു.എ.ഇയിൽ കഴിഞ്ഞ ദിവസം മരിച്ച പ്രസന്നൻ നായരുടെ ദുരന്തകഥ പുറം ലോകത്തോട് പറഞ്ഞത്​.

തിരുവനന്തപുരം സ്വദേശി പ്രസന്നൻ നായർ 1980 കളുടെ തുടക്കത്തിൽ ഗൾഫിലെത്തിയതായിരുന്നു. തുടക്കത്തിൽ ചെറിയ ജോലികൾ ചെയ്​തിരുന്ന പ്രസന്നൻ നായർ പിന്നീട്​ ടെക്​സ്റ്റയിൽ മേഖലയിൽ ബിസിനസ്​ തുടങ്ങുകയും വലിയ തോതിൽ വിജയിക്കുകയും ​ചെയ്​തു. നാട്ടിലേക്ക്​ മടങ്ങുന്ന പ്രവാസികളുടെ പ്രധാന ഷോപ്പിങ്​ കേന്ദ്രമായിരുന്ന അക്കാലത്ത്​ പി.പി നായർ എന്ന പ്രസന്നൻ നായരുടെ കച്ചവട കേന്ദ്രം.

ബിസിനസിൽ വിജയിച്ചതോടെ മറ്റുള്ളവർക്ക്​ സാധ്യമായ സഹായങ്ങൾ ചെയ്യാനും പി.പി. നായർ മുന്നിലുണ്ടായിരുന്നു. സഹായം തേടിയെത്തുന്ന ആരെയും അദ്ദേഹം വെറും കയ്യോടെ മടക്കിയില്ല.

എന്നാൽ, പിന്നീട്​ പി.പി. നായർക്ക്​ തിരിച്ചടികളുടെ കാലമായിരുന്നു. കച്ചവടത്തിൽ തകർച്ച തുടങ്ങി. വിശ്വസിച്ച പലരെയും ഏൽപിച്ച പണം തിരിച്ചുകിട്ടിയില്ല. യഥാസമയം പണം കിട്ടാതായതോടെ കടമെടുക്കേണ്ടി വന്നു. കേസുകളും പ്രശ്​നങ്ങളും പിറകെയെത്തി. കോവിഡ്​ പ്രതിസന്ധി കൂടി എത്തിയതോടെ തകർച്ച പുർണമായി.

കടക്കാരെ അഭിമുഖീകരിക്കാനാകാത്തതിനാൽ പുറത്തിറങ്ങാൻ തന്നെ മടിയായി നായർക്ക്​. ഇതിനിടയിൽ, പി.പി നായർ തന്‍റെ പ്രശ്​നങ്ങൾ സാമൂഹിക പ്രവർത്തകനായ അഷ്​റഫ്​ താമരശേരിയെ ഫോണിൽ വിളിച്ച്​ പങ്കുവെക്കുകയും ചെയ്​തു. ജീവിതം അവസാനിപ്പിക്കാൻ കരുതുന്നു എന്നാണ്​ അദ്ദേഹം പറഞ്ഞതെന്ന്​ അഷ്​റഫ്​ താമരശേരി ഒാർക്കുന്നു. ഒരിക്കലും അങ്ങനെ ചെയ്യരുതെന്നും പ്രശ്​നങ്ങൾക്ക്​ പരിഹാരമുണ്ടാകുമെന്നും പി.പി നായ​രോട്​ പറഞ്ഞതായും അഷ്​റഫ്​ താമരശേരി ഒാർക്കുന്നു. അഭിമാനിയായ നായരേട്ടൻ ഒരാഴ്ചക്കകം സ്വന്തം ജീവൻ അവസാനിപ്പിക്കുകയായിരുന്നുവെന്ന്​ അഷ്​റഫ്​ താമരശേരി പറയുന്നു.

പ്രസന്നൻ നായരുടെ മൃതദേഹം നാട്ടിലേക്കയക്കാനുള്ള നടപടികൾ പൂർത്തിയാക്കിയത്​ അഷ്​റഫ്​ താമരശേരിയാണ്​. സമ്പത്തു കാലത്ത്​ കൂടെ നിറയെ ആളുണ്ടായിരുന്ന പ്രസന്നൻ നായരുടെ ദുരിത സമയത്ത്​ ഒരാളും കൂടെയുണ്ടായിരുന്നില്ല. മൃതദേഹം നാട്ടിലേക്ക് അയക്കുവാൻ പെട്ടി വാങ്ങുവാൻ പോലും പണമില്ലായിരുന്നു. വിവരമറിഞ്ഞ്​ രണ്ട്​ മലയാളി ബിസിനസുകാർ രംഗത്തെത്തുകയും അവരുടെ സഹായത്തോടെ മൃതദേഹം നാട്ടിലേക്കയക്കുകയുമായിരുന്നെന്ന്​ അഷ്​റഫ്​ താമരശേരി പറയുന്നു.

ജീവിതത്തിൽ നൻമകൾ ഏറെ ചെയ്​ത പ്രസന്നൻ നായരുടെ അവസാന യാത്രയിൽ സഹായവുമായെത്തിയത്​ പേരു വെളിപ്പെടുത്താത്ത രണ്ട്​ മലയാളികളാണ്​. അജ്ഞാതരായ ആ രണ്ട്​ പേരിലൂടെ പ്രസന്നൻ നായരുടെ നൻമകൾ അദ്ദേഹത്തിന്​ തിരിച്ചു ലഭിക്കുകയായിരുന്നെന്ന്​ അഷ്​റഫ്​ താമരശേരി സാക്ഷ്യപ്പെടു​ത്തുന്നു.

DISCLAIMER: ആത്മഹത്യ ഒന്നിനും പരിഹാരമല്ല.