'ഇങ്ങനെയൊന്നും ആടിനെ കെട്ടല്ലേ' ! ടെൻഷൻ അടിക്കാൻ പോലും സമയം കിട്ടിയെന്ന്​ വരില്ലെന്ന്​ കെ.എസ്​.ഇ.ബി

ആടിനെ വളർത്തുന്നവർ കേരളത്തിൽ ധാരാളമാണ്​. പുല്ല്​ തിന്നാനും മറ്റുമായി പറമ്പുകളിലും മറ്റും കെട്ടുകയും ചെയ്യാറുണ്ട്​. എന്നാൽ ഇവിടെ ഒരാൾ കെട്ടി കെട്ടി ഒടുവിലെത്തിയത്​ ഹൈ ടെൻഷൻ ലൈനിന്‍റെ എ ബി സ്വിച്ച് ഹാൻഡിലിൽ. ആരും കയറാത്തത്​ കൊണ്ട്​ കൂടുതൽ പച്ചപ്പ്​ കണ്ടപ്പോൾ കെട്ടിപ്പോയതാകും. പക്ഷെ ആടിന്‍റെയും ആളിന്‍റെയും ആയുസിന്​ ഇത്​ നല്ലതല്ലെന്നാണ്​ സോഷ്യൽ മീഡിയ പറയുന്നത്​.

കെ.എസ്​.ഇ.ബി പേജിലൂടെയാണ്​ അധികൃതർ അപടകരമായ രീതിയിൽ ആടിനെ കെട്ടിയിട്ടതിന്‍റെ ചിത്രം പങ്കുവെച്ചിരിക്കുന്നത്​. ഫേസ്​ബുക്ക്​ പോസ്റ്റിന്‍റെ പൂർണരൂപം

ആടിനെ മേയ്ക്കാൻ കെട്ടിയത് കെ എസ് ഇ ബിയുടെ ഹൈ ടെൻഷൻ ലൈനിന്റെ എ ബി സ്വിച്ച് ഹാൻഡിലിൽ! അപകടമുണ്ടാവാൻ മറ്റെന്ത് വേണം?
വൈദ്യുതി പ്രതിഷ്ഠാപനങ്ങളിൽ ഒരു കാരണവശാലും കന്നുകാലികളെ കെട്ടുകയോ അയകെട്ടി തുണി വിരിക്കുകയോ ചെയ്യരുത്.
അൽപ്പം ജാഗ്രത വലിയ അപകടം ഒഴിവാക്കും!