സന്നിധാനത്ത് ഷോക്കേറ്റ സിംഹവാലൻ കുരങ്ങിന് രക്ഷകരായി വനംവകുപ്പ്

ശബരിമല: സന്നിധാനത്ത് വൈദ്യുതാഘാതമേറ്റ് വീണ സിംഹവാലൻ കുരങ്ങിന് രക്ഷകരായി വനംവകുപ്പ്. പ്രാഥമിക ചികിത്സ നൽകി കുരങ്ങിന്റെ ജീവൻ രക്ഷപ്പെടുത്തിയ ശേഷം കാട്ടിലേയ്ക്ക് തിരികെവിട്ടു. ഇന്ന് രാവിലെ 11.15 ഓടെ സന്നിധാനത്തെ വനം വകുപ്പിന്റെ ഇൻസ്പെക്ഷൻ ബംഗ്ലാവിന് സമീപമായിരുന്നു സംഭവം.

വൈദ്യുതി ലൈനിൽ നിന്ന് ഷോക്കേറ്റ് കുഞ്ഞ് സിംഹവാലൻ കുരങ്ങ് നിലംപതിക്കുകയായിരുന്നു. ഇടതു കൈക്ക് പൊള്ളലേറ്റ കുരങ്ങിന് അസിസ്റ്റന്റ് ഫോറസ്റ്റ് കൺസർവേറ്റർ മുഹമ്മദ് അൻവറിന്റെ നേതൃത്വത്തിൽ സി പി ആർ നൽകി. പിന്നീട് ചാക്കിലാക്കി വനം വകുപ്പ് ഓഫീസിൽ എത്തിച്ചു.

പൊള്ളലേറ്റ ഭാഗത്ത് മരുന്ന് പുരട്ടി. അടിയന്തിരമായി പ്രാഥമിക ശുശ്രൂഷ നൽകിയതിനാലാണ് കുരങ്ങിന്റെ ജീവൻ രക്ഷിക്കാനായത്. പിന്നീട് കുരങ്ങിനെ കാട്ടിലേയ്ക്ക് തിരികെ വിട്ടു.