സാമ്പത്തിക പ്രതിസന്ധി രൂക്ഷം; ചെലവുകൾ നേരിടാൻ കേരളം 2,000 കോടി കടമെടുക്കുന്നു

തിരുവനന്തപുരം: അതിരൂക്ഷമായ സാമ്പത്തിക പ്രതിസന്ധി തുടരവെ ചെലവുകൾ നേരിടാൻ സംസ്ഥാനം വീണ്ടും കടമെടുക്കുന്നു. 2000 കോടിയാണ്​ ഇക്കുറി കടമെടുക്കുന്നത്​. ഈ മാസം ആദ്യം 2000 കോടി കടമെടുത്തിരുന്നു. അടുത്ത മാസത്തെ ശമ്പള പെൻഷൻ വിതരണം സുഗമമാക്കാൻ ലക്ഷ്യമിട്ടാണ്​ പുതിയ കടമെടുപ്പ്​.

കേന്ദ്ര സർക്കാർ കൊണ്ടു വന്ന കടമെടുപ്പ്​ നിയന്ത്രണം സർക്കാറിനെ പ്രയാസത്തിലാക്കിയിരുന്നു. ക്ഷേമ പെൻഷൻ വിതരണത്തെ വരെ ഇതു​ ബാധിച്ചു. നികുതി വരവ്​ വർധിച്ചെങ്കിലും സാഹചര്യം മെച്ചപ്പെട്ടില്ല. കേന്ദ്ര വിഹിതവും ഇക്കുറി ലഭിച്ചിരുന്നു.

സാമ്പത്തിക വർഷം അവസാന ഘട്ടത്തിലേക്ക്​ നീങ്ങവെ പദ്ധതി ചെലവുകൾക്കും കൂടുതൽ പണം വേണം. ജനുവരി മുതൽ വാർഷിക പദ്ധതി ചെലവ്​ ഉയരും. ഇപ്പോൾ ചെലവ്​ പല വകുപ്പുകളിലും വളരെ താഴെയാണ്​. തീരെ ചെലവിടാത്ത വകുപ്പുകളുമുണ്ട്​. ബജറ്റിലെ വിഹിതം നഷ്ടപ്പെടാതിരിക്കാൻ വകുപ്പുകൾ ശ്രമം തുടങ്ങിയിട്ടുണ്ട്​. ട്രഷറി നിയന്ത്രണം കർശനമായി തുടരുന്നു. ഉയർന്ന തുകയുടെ ബില്ലുകൾ പാസാക്കാൻ സർക്കാറിന്‍റെ മുൻകൂർ അനുമതിയും നിർബന്ധമാക്കി. അടുത്ത ബജറ്റ്​ തയാറാക്കാനുള്ള തയാറെടുപ്പിലാണ്​ നിലവിൽ ധനവകുപ്പ്​.

കടമെടുക്കാതെ ഒരു മാസവും മുന്നോട്ടു പോകാൻ നിലവിൽ സർക്കാറിനാകുന്നില്ല. അനാവശ്യ ചെലവുകൾ ഒഴിവാക്കാനും സാമ്പത്തിക നിയന്ത്രണം കൊണ്ടുവരാനുമുള്ള തീരുമാനങ്ങളൊന്നും ഇനിയും ഫലപ്രദമായിട്ടില്ല. 2000 കോടി രൂപയുടെ കടപ്പത്രം പുറപ്പെടുവിക്കുന്നതിന്​ ധനവകുപ്പ്​ വിജ്ഞാപനമിറക്കി. ഇതിന്‍റെ ലേലം നവംബർ 29ന്​ മുംബൈയിലെ റിസർവ്​ ബാങ്ക്​ ഓഫിസിൽ നടക്കും. തൊട്ടടുത്ത ദിവസം പണം സർക്കാറിന്​ ലഭിക്കും.