റോഡിലെ കുഴിയിൽ വീണ് യുവാവിന്‍റെ മരണം: ഹൈകോടതി അടിയന്തര റിപ്പോർട്ട്​ തേടി

കൊച്ചി: റോഡിലെ കുഴിയിൽ വീണ് യുവാവ് മരിച്ച സംഭവത്തിൽ ഹൈകോടതി ഇടപെടൽ. പൈപ്പിടാൻ ജല അതോറിറ്റി കുഴിച്ച കുഴിയിൽ വീണ്​ എറണാകുളം കങ്ങരപ്പടി സ്വദേശി ശ്യാമിൽ ജേക്കബ്​ മരിക്കാനിടയായ സംഭവത്തിൽ ജില്ല കലക്ടർ അടിയന്തരമായി റിപ്പോർട്ട്​ നൽകാൻ ജസ്റ്റിസ്​ ദേവൻ രാമചന്ദ്രൻ ഉത്തരവിട്ടു. ഫെബ്രുവരി രണ്ടിനുണ്ടായ അപകടത്തിൽ ഗുരുതരമായി പരിക്കേറ്റ ശ്യാമിൽ നാലിനാണ്​ മരിച്ചത്​.

റോഡുകളുടെ ശോച്യാവസ്ഥ സംബന്ധിച്ച ഹരജികൾ പരിഗണിക്കവെ കങ്ങരപ്പടി സംഭവം അമിക്കസ്​ക്യൂറി കോടതിയുടെ ശ്രദ്ധയിൽപെടുത്തുകയായിരുന്നു. മുമ്പ്​ പാലാരിവട്ടത്ത് റോഡിലെ കുഴിയിൽ വീണ് യുവാവ് മരിച്ച സംഭവത്തിലെ ഹരജി കോടതിയുടെ പരിഗണനയിലുണ്ട്. ഇതേതുടർന്ന്​ ഒട്ടേറെ ഉത്തരവുകൾ പുറപ്പെടുവിച്ചിരുന്നു.

എന്നിട്ടും ഒന്നും മാറുന്നില്ലെന്ന് കോടതി വാക്കാൽ കുറ്റപ്പെടുത്തി. റിബ​ൺ കെട്ടി കുഴിമറക്കാനുള്ള ശ്രമം നടന്നതല്ലാതെ എം.ജി റോഡിലെ തുറന്ന കാന അടക്കാൻപോലും നടപടിയുണ്ടായില്ല. ഇത്തരം അപകടങ്ങളുണ്ടായാൽ മറ്റു രാജ്യങ്ങളിൽ ഏറെ തുക നഷ്​ടപരിഹാരമായി നൽകേണ്ടി വരുമെന്നും കോടതി ചൂണ്ടിക്കാട്ടി.