ബോബി ചെമ്മണ്ണൂരിന്റെ അഭിഭാഷകനെ കോടതി വിളിപ്പിച്ചു; എന്തുകൊണ്ട് ജാമ്യം നൽകിയി​ട്ടും പുറത്തിറങ്ങിയില്ല?

കൊച്ചി: ജാമ്യം ലഭിച്ചിട്ടും ജയിലിൽനിന്ന്​ ഇറങ്ങാതിരുന്ന ബോബി ചെമ്മണൂരിന്‍റെ നടപടി സ്വമേധയാ അടിയന്തര പരിഗണനക്കെടുത്ത്​​ അതിരൂക്ഷമായി വിമർശിച്ച്​ ഹൈകോടതി. രണ്ടുപ്രാവശ്യം മാറ്റിവെച്ച്​ മൂന്നുതവണയായി പരിഗണിച്ച കേസിന്‍റെ അവസാനം നിരുപാധിക മാപ്പപേക്ഷ വന്നതോടെ​ ജാമ്യം റദ്ദാക്കലടക്കം തുടർനടപടികളിലേക്ക്​ കടക്കാതെ വിഷയം അവസാനിപ്പിക്കുകയായിരുന്നു. സഹതടവുകാരിൽ ചിലരുടെ വക്കാലത്ത്​ പിടിച്ച്​ കോടതി ഉത്തരവിനെ അവഹേളിക്കുന്ന നടപടിയാണ്​ ബോബിയിൽ നിന്നുണ്ടായതെന്ന്​ വിലയിരുത്തി ജസ്റ്റിസ്​ പി.വി. കുഞ്ഞികൃഷ്ണൻ സ്വീകരിച്ച നടപടികളാണ്​ കോടതിക്കകത്തും പുറത്തും ബുധനാഴ്ച നാടകീയ നിമിഷങ്ങൾക്ക്​ വഴിയൊരുക്കിയത്​.

നടി ഹണി റോസിനെ ലൈംഗികമായി അധിക്ഷേപിച്ച കേസിൽ ​പ്രതിയായ ബോബി ചെമ്മണൂരിന്​ ഇതേ ബെഞ്ചാണ്​ ചൊവ്വാഴ്ച ഉപാധികളോടെ ജാമ്യം അനുവദിച്ചത്​. എന്നാൽ, ജാമ്യത്തുക കെട്ടിവെക്കാൻ പണമില്ലാത്തതിനാൽ ജയിലിൽ തുടരേണ്ടിവരുന്ന ചില സഹതടവുകാർക്ക്​ ഐക്യദാർഢ്യം പ്രഖ്യാപിച്ച്​ ചൊവ്വാഴ്ച ജയിൽ വിടാതിരുന്ന ബോബിയുടെ നടപടി വാർത്തയായിരുന്നു. ഈ പശ്ചാത്തലത്തിലാണ്​ കോടതി വിഷയം ബുധനാഴ്ച രാവിലെതന്നെ സ്വമേധയാ പരിഗണിച്ചത്​.

10.15ന്​ ഹരജി പരിഗണിക്കാനിരിക്കെ 9.50ന്​ ബോബി ജയിലിന്​ പുറത്തിറങ്ങിയതോടെ നാടകീയത വർധിച്ചു. കോടതി നടപടികൾ ആരംഭിച്ചയുടൻ ഇക്കാര്യവുമായി ബന്ധപ്പെട്ട്​ അഭിഭാഷകരോട്​ കോടതി വിശദീകരണം തേടുകയാണ്​ ആദ്യം ചെയ്തത്​. ജാമ്യം ലഭിച്ചശേഷം എന്താണ്​ സംഭവിച്ചതെന്ന ചോദ്യത്തോടെയായിരുന്നു കോടതിയുടെ തുടക്കം. ജാമ്യഉത്തരവും റിലീസിങ്​ ഓർഡറും എത്താൻ വൈകിയതിനാലാണ്​ ഇറങ്ങാനാവാതിരുന്നതെന്നും കുറച്ചുമുമ്പ്​ പുറത്തിറങ്ങിയതായും അഭിഭാഷകൻ അറിയിച്ചു.

എന്നാൽ, ജാമ്യഉത്തരവ്​ നേര​ത്തേ ലഭ്യമാക്കിയിട്ടും സഹതടവുകാരിൽ ചിലർക്ക്​ ഐക്യദാർഢ്യം പ്രകടിപ്പിച്ച്​ മാധ്യമശ്രദ്ധക്കുവേണ്ടി ഒരുദിവസം കൂടി ജയിലിൽ തുടർന്ന ബോബിയുടെ നടപടി കോടതിയെ തരംതാഴ്ത്തലാണെന്നടക്കം അതിരൂക്ഷമായി വിമർശനങ്ങളുന്നയിച്ച കോടതി, ജാമ്യം റദ്ദാക്കാൻ നോട്ടീസ്​ നൽകുമെന്ന മുന്നറിയിപ്പ്​ നൽകി. ബുധനാഴ്ച രാവിലെ ഒമ്പതിനുശേഷമാണ്​ റിലീസിങ്​​ ഓർഡർ​ കിട്ടിയതെന്ന്​ ബോബിക്കുവേണ്ടി ഹാജരായ അഭിഭാഷകൻ വീണ്ടും അറിയിച്ചതോടെ എവിടെയാണ്​ വീഴ്ച സംഭവിച്ചതെന്ന്​ കണ്ടെത്തി അറിയിക്കാൻ നിർദേശിച്ച്​ ഉച്ചക്ക്​ 12ന്​ ഹരജി പരിഗണിക്കാനായി മാറ്റി.

ഇതിനിടെ പുറത്തിറങ്ങിയ ബോബി സഹതടവുകാരുടെ ദുരിതവും താൻ രാത്രി അവിടെ തങ്ങിയത്​ അവർക്കുവേണ്ടിയാണെന്നുമടക്കം കാര്യങ്ങൾ മാധ്യമങ്ങളോട്​ ആവർത്തിച്ചു. 12ന്​ ഹരജി പരിഗണിക്കവേ കൂടുതൽ രൂക്ഷമായ പ്രതികരണമാണ്​ കോടതിയിൽനിന്നുണ്ടായത്​. ബോബിക്കുവേണ്ടി അഭിഭാഷകൻ ക്ഷമ പറഞ്ഞെങ്കിലും അംഗീകരിക്കാതിരുന്ന കോടതി, ബോബി ചെമ്മണൂർ നിരുപാധികം മാപ്പ്​ പറയണമെന്നും ആവശ്യമെങ്കിൽ വിളിച്ചുവരുത്തുമെന്നുമുള്ള നിലപാടെടുത്തു. ജയിലിൽനിന്ന്​ ഇറങ്ങാതിരുന്നതിന്​ എന്താണ്​ യഥാർഥ കാരണമെന്ന്​ ഹരജിക്കാരനോടുതന്നെ ചോദിച്ചിട്ട്​ അറിയിക്കാൻ നിർദേശിച്ച കോടതി, വീണ്ടും ഉച്ചക്ക്​ 1.45ന്​ വിഷയം പരിഗണിക്കാൻ മാറ്റി. ജയിലിന്​ പുറത്തിറങ്ങിയശേഷം മാധ്യമങ്ങളിലൂടെ എന്താണ്​ പറഞ്ഞതെന്ന്​ അറിയിക്കാൻ പ്രോസിക്യൂഷനോടും ആവശ്യപ്പെട്ടു. ഫോണിലൂടെയാ​ണെങ്കിലും വിവരം തേടി അറിയിക്കാൻ നിർദേശിച്ച കോടതി വീണ്ടും ഉച്ചക്കുശേഷം ഹരജി പരിഗണിച്ചു.

സഹതടവുകാരോട്​ ഐക്യദാർഢ്യം പ്രഖ്യാപിച്ചതാണെന്ന്​ പുറത്തിറങ്ങിയശേഷം പറഞ്ഞത്​ മാധ്യമങ്ങൾ ചോദ്യങ്ങളുമായി വളഞ്ഞപ്പോൾ നാവ്​ പിഴയായി സംഭവിച്ചതാണെന്നായിരുന്നു ഉച്ചക്കുശേഷം അഭിഭാഷകന്‍റെ വിശദീകരണം. കോടതിയുടെ മഹത്ത്വത്തെ ഇകഴ്ത്തിക്കാട്ടണമെന്ന ഉദ്ദേശ്യത്തോടെയല്ല പരാമർശങ്ങൾ നടത്തിയത്​. റിലീസിങ്​​ ഓർഡർ കിട്ടാത്തതാണ്​ പുറത്തിറങ്ങാൻ വൈകിയതിന്‍റെ കാരണം. നാവുപിഴ സംഭവിച്ചതിൽ നിരുപാധികം ഹരജിക്കാരൻ ഖേദം അറിയിക്കുന്നതായും നേരിട്ടറിയിക്കാൻ തയാറാണെന്നും അഭിഭാഷകൻ വ്യക്തമാക്കി.

കഴിഞ്ഞ ദിവസം പ്രതി അദ്ദേഹത്തിനുവേണ്ടി ഹാജരായ മുതിർന്ന അഭിഭാഷകനെയുംകൂടിയാണ്​ അവഹേളിച്ചതെന്നും അദ്ദേഹത്തിനുവേണ്ടി കൂടിയാണ്​ കോടതിയുടെ നടപടിയെന്നും സിംഗിൾ ബെഞ്ച്​ വ്യക്തമാക്കി. സീനിയറിന്​ ലഭിച്ച അവഹേളനം നിങ്ങൾക്കും കിട്ടിയേക്കുമെന്ന്​ ഹരജിക്കാരന്‍റെ മറ്റ്​ അഭിഭാഷകർക്ക്​ കോടതി മുന്നറിയിപ്പും​ നൽകി. ഇനിമേലിൽ ഇത്തരം കാര്യങ്ങൾക്ക്​ പ്രതി വായ തുറക്കില്ലെന്ന്​ പറഞ്ഞ അഭിഭാഷകൻ, വീണ്ടും നിരുപാധികം മാപ്പപേക്ഷ അറിയിച്ചു. ഇത്​ സ്വീകരിച്ച കോടതി തുടർനടപടികൾ അവസാനിപ്പിക്കുകയായിരുന്നു. ഇതോടെയാണ്​ മണിക്കൂറുകളോളം നീണ്ട നാടകീയതക്കും അനിശ്ചിതത്വത്തിനും വിരാമമായത്​.