ജയിൽ ചാടിയ പ്രതി ഷർട്ടും മുണ്ടും ധരിച്ച് കോട്ടയം റെയിൽവേ സ്റ്റേഷനിൽ, സി.സി ടി.വി ദൃശ്യങ്ങൾ ലഭിച്ചു; ട്രെയിൻ കയറിയതായി സൂചന

കോട്ടയം: ജില്ല ജയിലിൽനിന്ന്​ കടന്നുകളഞ്ഞ അസം സ്വദേശിയായ മൊബൈൽ മോഷണക്കേസ്​ പ്രതി കോട്ടയം റെയിൽവേ സ്​റ്റേഷനിൽനിന്ന്​ ട്രെയിനിൽ കയറിയതായി സൂചന. ഷർട്ടും മുണ്ടും ധരിച്ച്​ ​സ്​റ്റേഷനിലെത്തിയതിന്‍റെ സി.സി ടി.വി ദൃശ്യങ്ങൾ പൊലീസിന്​ ലഭിച്ചു. ഷർട്ട്​ എവി​ടെനിന്ന്​ ലഭിച്ചെന്നോ എങ്ങനെ റെയിൽവേ സ്​റ്റേഷനിലെത്തിയെന്നോ വ്യക്തമായിട്ടില്ല. കൂടുതൽ വിവരങ്ങൾ അന്വേഷിച്ചുവരുകയാണെന്ന്​ ജയിൽ സൂപ്രണ്ട്​ വി.ആർ. ശരത്​ അറിയിച്ചു.

മധ്യമേഖല ഡി.ഐ.ജി ടി.ആർ. രാജീവ്​ ചൊവ്വാഴ്ച രാവിലെ ജില്ല ജയിലിൽ പരി​ശോധന നടത്തി. സൂപ്രണ്ടിൽനിന്നും മറ്റ്​ ജീവനക്കാരിൽനിന്നും വി​വരങ്ങൾ ശേഖരിച്ചു. ജയിൽ ഡി.ജി.പി ബൽറാം കുമാർ ഉപാധ്യായ ഡി.ഐ.ജിയിൽനിന്ന്​ റിപ്പോർട്ട്​ തേടിയിരുന്നു. വിഷയത്തിൽ സൂപ്രണ്ട്​ അടക്കം ഉദ്യോഗസ്ഥർക്കെതിരെ നടപടിവന്നേക്കും.

ശനിയാഴ്ചയാണ്​ റെയിൽവേ പൊലീസ്​ പിടികൂടിയ അമീനുൽ ഇസ്​ലാമിനെ റിമാൻഡ്​ ചെയ്ത്​ ജയിലിലെത്തിച്ചത്​. തിങ്കളാഴ്ച ഉച്ചക്കുശേഷം സൂപ്രണ്ടിനുമുന്നിൽ വെരിഫിക്കേഷൻ നടത്തി സെല്ലിലേക്ക്​ മടങ്ങുന്നതിനിടയിലാണ്​ ജീവനക്കാരുടെ കണ്ണുവെട്ടിച്ച്​ മതിൽ ചാടി കടന്നത്. കറുത്ത മുണ്ട്​ മാ​ത്രമായിരുന്നു വേഷം.

കലക്ടറേറ്റ്​, വിജിലൻസ്​ ഓഫിസ്​, എസ്​.പി ഓഫിസ്​, ഈസ്റ്റ്​ പൊലീസ് സ്​റ്റേഷൻ എന്നിവയടക്കം സ്ഥിതിചെയ്യുന്ന സുപ്രധാന മേഖലയിൽനിന്നാണ്​ പ്രതി ചാടിപ്പോയത്​. ഉടൻ തിരച്ചിൽ ആരംഭിച്ചെങ്കിലും ക​ണ്ടെത്താൻ കഴിഞ്ഞില്ല. പ്രതിക്കായി തിരച്ചിൽ ഊർജിതമാക്കിയതായി ജില്ല പൊലീസ്​ മേധാവി ഷാഹുൽഹമീദ്​ പറഞ്ഞു. മൂന്നുവർഷം മുമ്പ്​ കൊലക്കേസ്​ പ്രതി ജില്ല ജയിലിന്‍റെ മതിൽ ചാടി കട​ന്നെങ്കിലും മണിക്കൂറുകൾക്കകം പിടികൂടാനായിരുന്നു.