താനൂർ കൊലപാതകം: മുഖ്യപ്രതി ബഷീർ കീഴടങ്ങി VIDEO

താനൂർ: അഞ്ചുടി സ്വദേശി പൗറകത്ത് സവാദിനെ (40) തലക്കടിച്ചും കഴുത്തറുത്തും കൊലപ്പെടുത്തിയ കേസിൽ വിദേശത്തേക്ക്​ കടന്ന മുഖ്യപ്രതി തെയ്യല ഓമച്ചപ്പുഴ സ്വദേശി കൊളത്തൂർ വീട്ടിൽ ബഷീർ (40) പൊലീസിൽ കീഴടങ്ങി. കൃത്യം നടത്തിയ ശേഷം ഷാർജയിലേക്ക്​ കടന്ന ബഷീറാണ്​ തിങ്കളാഴ്​ച കീഴടങ്ങിയത്​. കൊലപാതക വാർത്ത മാധ്യമങ്ങളിലും സമൂഹ മാധ്യമങ്ങളിലും വന്നതോടെ ഗൾഫിലെത്തിയ ബഷീറിന്​ മുറിയിൽനിന്ന്​ പുറത്തിറങ്ങാൻ കഴിഞ്ഞില്ല. ശനിയാഴ്ച ഷാർജയിൽനിന്ന്​ ചെന്നൈ വിമാനത്താവളത്തിൽ ഇറങ്ങിയ ബഷീർ ട്രെയിൻ മാർഗം തിങ്കളാഴ്​ച രാവിലെയാണ്​ തിരൂരിലെത്തിയത്​. തുടർന്ന്​ താനൂർ പൊലീസ്​ സ്​റ്റേഷനിലെത്തി കീഴടങ്ങി​. താനൂർ സി.ഐ എം.​െഎ. ഷാജി അറസ്​റ്റ്​ രേഖപ്പെടുത്തി​. പ്രതിയെ നാട്ടിലെത്തിക്കുന്നതിൽ പ്രവാസി സംഘടനകളുടെ സഹായവും തേടിയിരുന്നു.

ബഷീറിനെ പിന്നീട്​ സംഭവസ്ഥലത്ത്​ എത്തിച്ച്​ തെളിവെടുപ്പ്​ നടത്തി. ക്വാര്‍ട്ടേഴ്‌സിന് സമീപത്തെ വയലില്‍നിന്ന് സവാദിനെ കൊലപ്പെടുത്താന്‍ ഉപയോഗിച്ച മരത്തടി പൊലീസ് കണ്ടെടുത്തു. കൊലക്ക് ശേഷം ക്വാര്‍ട്ടേഴ്‌സില്‍നിന്നെത്തി കാറില്‍ കയറുന്നതിനിടെ ഒന്നര മീറ്ററോളം നീളമുള്ള വടി വലിച്ചെറിഞ്ഞ സ്ഥലം ഇയാള്‍ കാണിച്ചുകൊടുക്കുകയായിരുന്നു. സൗജത്തിനൊപ്പം ജീവിക്കാനാണ് ഭർത്താവ്​ സവാദിനെ കൊലപ്പെടുത്തിയതെന്ന് ഇയാള്‍ പൊലീസിന്​ മൊഴി നൽകി. വിദേശത്തേക്ക് രക്ഷപ്പെടുന്നതോടെ കേസിന് തുമ്പില്ലാതാവുമെന്നായിരുന്നു പ്രതീക്ഷ. വിദേശത്തുനിന്ന് മംഗളൂരു വഴി രണ്ടുദിവസത്തെ അവധിക്ക് താനൂരിലെത്തി സൗജത്തിനൊപ്പം ചേര്‍ന്ന് കൊല നടത്തി മംഗളൂരു വഴി രക്ഷപ്പെടുകയായിരുന്നു. മംഗളൂരുവിൽനിന്ന് താനൂരിലെത്താനും തിരിച്ചുപോകാനും ബഷീറിനെ സഹായിച്ച പ്രദേശവാസിയായ സുഫിയാനെയും അറസ്​റ്റ്​ ചെയ്തിട്ടുണ്ട്.

സവാദിനെ ഭക്ഷണത്തിൽ വിഷം കലർത്തിയും കൊലപ്പെടുത്താൻ ശ്രമിച്ചു
താനൂർ: അഞ്ചുടി സ്വദേശി പൗറകത്ത് സവാദിനെ (40) നേരത്തെയും കൊലപ്പെടുത്താൻ ശ്രമിച്ചതായി പ്രതിയുടെ മൊഴി. അറസ്​റ്റിലായ ബഷീറും സൗജത്തും ഒരു മാസം മുമ്പാണ്​ ഇതിന്​ പദ്ധതി തയാറാക്കിയത്​. ഭക്ഷണത്തിൽ വിഷം കലർത്തി കൊലപ്പെടുത്താനായിരുന്നു ആദ്യശ്രമം. എന്നാൽ, ദുർഗന്ധം വമിച്ചതോടെ സവാദ്​ ഭക്ഷണം മാറ്റിവെച്ചു. ഈ സമയം താൻ ഗൾഫിലായിരുന്നെന്നും ബഷീർ മൊഴി നൽകി. കൊലപ്പെടുത്തിയ ശേഷം കഷ​ണങ്ങളാക്കി കുഴിച്ചുമൂടാനാണ്​ ഇതിനുശേഷം ഇരുവരും​ പദ്ധതിയിട്ടത്​. ക​ു​ഴിച്ചുമൂടിയ ശേഷം കാൺമാനില്ലെന്ന്​ പൊലീസിൽ പരാതി നൽകാനായിരുന്നു പദ്ധതി. സവാദിനൊപ്പം കിടന്നുറങ്ങുകയായിരുന്ന മകൾ ഉണർ​ന്നതോടെയാണ്​ ഇൗ നീക്കം ഉപേക്ഷിച്ചത്​. കൊലപ്പെടുത്തുന്നതിന്​ മുമ്പ് സവാദിന്​ മയക്കുഗുളിക നൽകിയിരുന്നോയെന്ന കാര്യത്തിലും പൊലീസിന്​ സംശയമുണ്ട്​. ഇവരുടെ താമസസ്ഥലത്തുനിന്ന്​ മയക്കുഗുളികകൾ കണ്ടെടുത്തിട്ടുണ്ട്. വിശദമായി അന്വേഷണം നടത്തിയാലേ ഇക്കാര്യം വ്യക്​തമാകൂവെന്ന് സി.​െഎ എം.ഐ. ഷാജി പറഞ്ഞു. ബഷീറുമായുള്ള ബന്ധമറിഞ്ഞിട്ടും സവാദ് സൗജത്തിനെ ഒഴിവാക്കാൻ തയാറായിരുന്നില്ല.

ബഷീറിനെ കൂകിവിളിച്ചും ശകാരവർഷം ചൊരിഞ്ഞും ജനം
തിരൂർ: താനൂരിൽ യുവാവിനെ തലക്കടിച്ചും കഴുത്തറുത്തും കൊന്ന കേസിലെ ​പ്രതിയെ കൂകി വിളിച്ചും ശകാരവർഷം ചൊരിഞ്ഞും ജനക്കൂട്ടം. മുഖ്യപ്രതിയും യുവതിയുടെ കാമുകനുമായ ബഷീറിനെ ‍(40) വൈദ്യപരിശോധനക്കും തെളിവെടുപ്പിനും എത്തിച്ചപ്പോഴായിരുന്നു ജനക്കൂട്ടത്തി​​​െൻറ ശകാരവർഷം​. തിരൂർ ജില്ല ആശുപത്രിയിൽ തിങ്കളാഴ്ച ഉച്ചക്ക് ഒരു മണിയോടെയാണ് വൈദ്യ പരിശോധനക്ക്​ എത്തിച്ചത്​. പ്രതിയെ കൊണ്ടുവരുന്നുണ്ടെന്ന വിവരമറിഞ്ഞതോടെ ആശുപത്രി പരിസരത്ത് സ്​ത്രീകളടക്കം നിരവധി പേർ എത്തി. പ്രതിയെ കൈയേറ്റം ചെയ്യാൻ സാധ്യതയുണ്ടെന്ന വിവരത്തെ തുടർന്ന്​ പൊലീസ് കനത്ത സുരക്ഷ ഒരുക്കിയിരുന്നു. പ്രതിയെ വാഹനത്തിൽനിന്നിറക്കിയപ്പോൾ ജനം കൈയേറ്റത്തിന്​ ശ്രമിക്കുകയും ശകാരവർഷം ചൊരിയുകയും ചെയ്തു. ഏറെ പണിപ്പെട്ടാണ് ആശുപത്രിക്കകത്തെത്തിച്ചത്. മുക്കാൽ മണിക്കൂർ നീണ്ട വൈദ്യപരിശോധനക്ക് ശേഷം ബഷീറിനെ പുറത്തേക്കെത്തിക്കാനും പൊലീസ്​ പ്രയാസപ്പെട്ടു. അപ്പോഴും സ്ത്രീകളടക്കമുള്ളവർ അസഭ്യവർഷം നടത്തി. പ്രതി കീഴടങ്ങിയതറിഞ്ഞ് പൊലീസ് സ്​​േറ്റഷനിലും തെളിവെടുപ്പ് വേളയില്‍ ക്വാര്‍ട്ടേഴ്‌സ് പരിസരത്തും വന്‍ ജനാവലിയെത്തി. ഇവരെ നിയന്ത്രിക്കാനും പൊലീസ്​ ഏറെ പ്രയാസപ്പെട്ടു.