തച്ചങ്കരിക്ക്​​ പൊലീസ് മേധാവിയുടെ പ്രവർത്തനങ്ങളിൽ ഇടപെടാനാവില്ലെന്ന്​ സർക്കാർ

കൊച്ചി: ടോമിൻ ജെ. തച്ചങ്കരിയെ പൊലീസ് ആസ്ഥാനത്ത് ഭരണച്ചുമതലയുള്ള എ.ഡി.ജി.പിയായി നിയമിച്ചു എന്നതു​കൊണ്ട്​ സംസ്ഥാന പൊലീസ് മേധാവിയുടെ പ്രവർത്തനങ്ങളിൽ ഒരുതരത്തിലും ഇടപെടാൻ സാധിക്കില്ലെന്ന്​ സർക്കാർ ഹൈകോടതിയിൽ. സർക്കാറി​​​െൻറ വിവേചനാധികാരം ഉപയോഗിച്ചാണ്​ നിയമനമെന്നും പൊതുഭരണ അണ്ടർ സെക്രട്ടറി കെ. രാജ ശശി കോടതിയിൽ നൽകിയ സത്യവാങ്​മൂലത്തിൽ പറയുന്നു. സുപ്രീംകോടതി ഉത്തരവനുസരിച്ച് ടി.പി. സെൻകുമാർ ഡി.ജി.പിയായി ചുമതല ഏറ്റെടുക്കുന്നതിനുമുമ്പ് പൊലീസ് ആസ്ഥാനത്ത് തച്ചങ്കരി ഉൾപ്പെടെയുള്ളവരെ നിയമിച്ചതിനെതിരെ ആലപ്പുഴ രാമങ്കരി സ്വദേശി ജോസ് തോമസ് നൽകിയ ഹരജിയിലാണ് വിശദീകരണം.

തച്ചങ്കരിക്ക് ക്രമസമാധാന പാലനത്തി​​​െൻറ ചുമതലയല്ല, ഭരണപരമായ ചുമതലയാണ് നൽകിയിട്ടുള്ളത്​. ഹരജിയിൽ അദ്ദേഹത്തിനെതിരെ ഉന്നയിക്കുന്ന ആരോപണങ്ങൾ ശരിയല്ല. രണ്ടു പരാതികളിൽ വിജിലൻസി​​​െൻറ ത്വരിതാന്വേഷണം മാത്രമാണ് നിലവിലുള്ളതെന്നും ഒരു ക്രിമിനൽ കേസിലും തച്ചങ്കരിക്കെതിരെ കോടതി കുറ്റം ചുമത്തിയിട്ടില്ലെന്നും സത്യവാങ്മൂലത്തിൽ പറയുന്നു.

അനധികൃത സ്വത്ത് സമ്പാദിച്ചുവെന്ന പരാതിയൊഴികെയുള്ള കേസുകളൊക്കെ സർക്കാർ അവസാനിപ്പിച്ചതാണ്. അനുമതിയില്ലാതെ ബഹ്​റൈനിലേക്ക് യാത്ര ചെയ്തെന്ന പരാതിയിൽ ശാസന നൽകി നടപടി അവസാനിപ്പിച്ചിരുന്നു. അനധികൃത സ്വത്ത് സമ്പാദനക്കേസിൽ മൂവാറ്റുപുഴ വിജിലൻസ് കോടതി തച്ചങ്കരിക്കെതിരെ കുറ്റം ചുമത്തിയിട്ടില്ല. തീവ്രവാദ സംഘടനയായ ലശ്​കറെ ത്വയ്യിബയിൽ അംഗമായ തടിയൻറവിട നസീറുമായി തച്ചങ്കരിക്ക് ബന്ധമുണ്ടെന്ന ആക്ഷേപം തെളിയിക്കാൻ എൻ.ഐ.എക്ക്​ ഒരു തെളിവും കിട്ടിയിട്ടില്ല. 

പകപോക്കാൻ കോയമ്പത്തൂർ സ്വദേശി മണികണ്ഠനെ പറവൂർ പീഡനക്കേസിൽ പ്രതിയാക്കിയെന്ന ആരോപണവും വസ്​തുതവിരുദ്ധമാണ്​. തച്ചങ്കരിക്കെതിരെ വകുപ്പുതല അന്വേഷണമൊന്നും നിലവിലില്ല. സർവിസിൽ 30 വർഷം പൂർത്തിയാക്കിയ അദ്ദേഹത്തിന് ഐ.പി.എസ് മാർഗനിർദേശമനുസരിച്ച് സ്ഥാനക്കയറ്റത്തിന് അർഹതയുണ്ട്​. പൊലീസ് ആസ്ഥാനത്ത് എട്ട് ഐ.പി.എസ് ഉദ്യോഗസ്ഥരടക്കമുള്ളവരെ സ്ഥലംമാറ്റിയിട്ടും തച്ചങ്കരിയെ മാത്രം കക്ഷിയാക്കിയാണ് ഹരജി നൽകിയിട്ടുള്ളത്.

പൊതുതാൽപര്യത്തി​​​െൻറ മറവിൽ വ്യക്തിതാൽപര്യമാണ്​ ഇതിനു പിന്നിലുള്ളത്​​. സർവിസ് വിഷയത്തിൽ പൊതുതാൽപര്യ ഹരജി നിലനിൽക്ക​ുകയുമില്ല. പൊലീസ് ആസ്ഥാനത്ത് പിടിമുറുക്കാനുള്ള സർക്കാറി​​​െൻറ ശ്രമഫലമായാണ് തച്ചങ്കരിയെ എ.ഡി.ജി.പിയാക്കിയതെന്ന ഹരജിക്കാര​​​െൻറ വാദം ഭാവനയിൽനിന്നുള്ളതാണ്​. ചരിത്രത്തിലില്ലാത്ത വിധം പൊലീസ് ആസ്ഥാനത്ത് അഴിച്ചുപണി നടത്തിയെന്ന ആരോപണം അടിസ്ഥാനരഹിതമാ​െണന്നും സത്യവാങ്മൂലത്തിൽ പറയുന്നു.