സുധീരന്‍റെ രാജി സ്വീകരിച്ചിട്ടില്ലെന്ന്​ താരിഖ്​ അൻവർ

തിരുവനന്തപുരം: കോൺഗ്രസ്​ നേതാവ്​ വി.എം.സുധീരന്‍റെ രാജി സ്വീകരിച്ചിട്ടില്ലെന്ന്​ കേരളത്തിന്‍റെ ചുമതലയുള്ള കോൺഗ്രസ്​ ജനറൽ സെക്രട്ടറി താരിഖ്​ അൻവർ. നേതാക്കൾ തമ്മിലുള്ള അഭിപ്രായ ഭിന്നത ഇല്ലാതാക്കാൻ ശ്രമിക്കുമെന്നും താരിഖ്​ അൻവർ പ്രതികരിച്ചു. എങ്കിലും കോൺഗ്രസിലെ മാറ്റങ്ങളുമായി മുന്നോട്ട്​ പോകുമെന്ന വ്യക്​തമായ സൂചനയാണ്​ താരിഖ്​ അൻവറിലൂടെ ഹൈക്കമാൻഡ്​ നൽകുന്നത്​.

എ.ഐ.സി.സിയിൽ നിന്നുള്ള വി.എം.സുധീരന്‍റെ രാജിയിൽ ഹൈക്കമാൻഡിന്​ കടുത്ത അതൃപ്​തിയുണ്ടെന്ന റിപ്പോർട്ടുകൾ പുറത്ത്​ വരുന്നുണ്ട്​. ഹൈ​ക്കമാൻഡ്​ സുധീരനുമായി ആശയവിനിമയത്തിന്​ ശ്രമിച്ചപ്പോൾ അദ്ദേഹം പ്രതികരിച്ചില്ലെന്നും ആരോപണമുണ്ട്​​. നിലവിൽ കേരളത്തിൽ സന്ദർശനം നടത്തുന്ന രാഹുൽ ഗാന്ധി ഈ വിഷയങ്ങൾ നേതാക്കളുമായി സംസാരിക്കുമെന്നാണ്​ സൂചന.

അതേസമയം, പുനഃസംഘടനയുമായി ബന്ധപ്പെട്ട് വി.എം സുധീരന് അതൃപ്തിയുണ്ടെങ്കില്‍ രാഷ്ട്രീയ കാര്യ സമിതി വിളിക്കണമെന്ന് അദ്ദേഹത്തിന് ആവശ്യപ്പെടാമായിരുന്നുവെന്ന്​ കെ.മുരളീധരൻ എം.പി പറഞ്ഞു. പാര്‍ട്ടി ചട്ടക്കൂട് വിട്ട് സുധീരന്‍ പുറത്തു പോകില്ലെന്നാണ് പ്രതീക്ഷ. പാര്‍ട്ടിയുടെ നന്മക്കേ അദ്ദേഹം ശ്രമിക്കൂ. സുധീരനെ നേരിട്ട് കാണുമെന്നും മുരളീധരന്‍ വ്യക്​തമാക്കി.