Begin typing your search above and press return to search.
exit_to_app
exit_to_app
Homechevron_rightNewschevron_rightKeralachevron_rightഭൂമി ഇടപാട്​:...

ഭൂമി ഇടപാട്​: കർദിനാളിനെതിരെ പരസ്യ പോർവിളിയുമായി വൈദികസമിതി

text_fields
bookmark_border
ഭൂമി ഇടപാട്​: കർദിനാളിനെതിരെ പരസ്യ പോർവിളിയുമായി വൈദികസമിതി
cancel

കൊച്ചി: സീറോ മലബാർ സഭ ഭൂമിവിവാദത്തിൽ കർദിനാളിനെതിരെ പരസ്യ പോർവിളിയുമായി വൈദികസമിതി. കർദിനാൾ മാർ ജോർജ് ആലഞ്ചേരിയടക്കമുള്ളവർക്കെതിരെ കേസെടുത്ത് അന്വേഷണം നടത്തണമെന്ന ഹൈകോടതി വിധിയുടെ പശ്ചാത്തലത്തിൽ അദ്ദേഹം സ്ഥാനത്യാഗം ചെയ്​ത്​ അന്വേഷണം നേരിടണമെന്നാവശ്യപ്പെട്ട് അതിരൂപതയിലെ വൈദികർ യോഗം ചേർന്ന് പ്രമേയം പാസാക്കി. വിഷയം മാർപാപ്പയെയും സിനഡിനെയും ധരിപ്പിക്കണമെന്നാവശ്യപ്പെട്ട് വൈദികർ ജാഥയായി രൂപത ആസ്​ഥാനത്ത് എത്തി. കർദിനാൾ അതിരൂപത കാര്യാലയമായ​ കാക്കനാട്​ സ​​െൻറ് ​തോമസ്​ മൗണ്ടിലായിരുന്നതിനാൽ സഹായമെത്രാൻ മാർ സെബാസ്​റ്റ്യൻ എടയന്ത്രത്തിന് പ്രമേയം കൈമാറി. പ്രമേയം മാർ സെബാസ്​റ്റ്യൻ എടയന്ത്രത്ത് പിന്നീട്​ മാർ ജോർജ് ആലഞ്ചേരിക്ക് നൽകുകയും വൈദിക കൂട്ടായ്​മയുടെ ​െപാതുവികാരം അദ്ദേഹത്തെ അറിയിക്കുകയും ​െചയ്​തു. വരും ദിവസങ്ങളിൽ മാർപാപ്പക്കും സിനഡിനും പ്രമേയം കൈമാറും. 

വെള്ളിയാഴ്​ച രാവിലെ എറണാകുളം-^അങ്കമാലി അതിരൂപതയിലെ വൈദികസമിതിയുടെ നേതൃത്വത്തിൽ എറണാകുളം സ​​െൻറ് മേരീസ്​ ബസലിക്കയുടെ പാരിഷ് ഹാളിലാണ്​  200ഓളം വൈദികർ യോഗം ചേർന്നത്. കോടതി ഉത്തരവി​​െൻറ പശ്ചാത്തലത്തിൽ മാർ ജോർജ് ആലഞ്ചേരി സ്​ഥാനത്യാഗം ചെയ്യണമെന്ന്​ യോഗം ​െഎകക​​ണ്​ഠ്യേന ആവശ്യപ്പെട്ടു. ഇക്കാര്യം മാർപാപ്പയെയും മാർ ജോർജ് ആലഞ്ചേരി, സീറോ മലബാർ സഭ സ്​ഥിരം സിനഡിലെ മെത്രാന്മാർ എന്നിവരെയും അറിയിക്കാനും തീരുമാനിച്ചു. ഈ ആവശ്യം ഉന്നയിച്ച്​ യോഗം പ്രമേയം പാസാക്കിയശേഷമാണ്​ ഉച്ചയോടെ വൈദികർ ജാഥയായി സമീപത്തുതന്നെയുള്ള അതിരൂപത ആസ്​ഥാനത്തെത്തിയത്​. 

വൈദിക സമിതി മുമ്പ്​ കർദിനാളി​​​െൻറ വീഴ്​ച സ്ഥിരീകരിക്കുകയും അന്വേഷണം പൂർത്തിയാകുംവരെ മാറിനിൽക്കണമെന്ന്​ ആവശ്യപ്പെടുകയും​ ചെയ്​തിരു​െന്നന്ന്​ വൈദിക സമിതി സെക്രട്ടറി ഫാ. കുര്യാക്കോസ്​ മുണ്ടാടൻ പിന്നീട് മാധ്യമപ്രവർത്തകരോട് പറഞ്ഞു. ഇത് ഏതാനും വൈദികരുടെ മാത്രം പ്രശ്നമല്ല. എറണാകുളം-അങ്കമാലി അതിരൂപത ചരിത്രത്തിലെതന്നെ ഏറ്റവും വലിയ പ്രതിസന്ധിയാണിത്​. സഭാസംവിധാനങ്ങളും ചട്ടക്കൂടുകളും നിഷ്​കർഷിക്കുന്ന നിയമങ്ങൾ അട്ടിമറിച്ചുള്ള രഹസ്യ ഇടപാടിൽ അതിരൂപതക്ക്​ 50 കോടിയാണ്​ നഷ്​ടപ്പെട്ടത്​. രണ്ടാമത്തെ ഇടപാടും​ നടന്നിരുന്നെങ്കിൽ 100 കോടിയുടെ നഷ്​ടം വരുമായിരുന്നു. 

ഇന്ത്യയിൽതന്നെ ഏറ്റവും സാമ്പത്തിക ഭദ്രതയുണ്ടായിരുന്നതും മൂന്നുവർഷം മുമ്പുവരെ ബാങ്ക്​ വായ്​പകൾ ഇല്ലാതിരുന്നതുമായ അതിരൂപത ഇപ്പോൾ 86 ലക്ഷം രൂപ പ്രതിമാസ തിരിച്ചടവ്​ നടത്തേണ്ട പരിതാപകരമായ അവസ്ഥയിലെത്തി​യിരിക്കുകയാണ്. ഇടപാടുകളിൽ സിവിൽ നിയമങ്ങളുടെ ലംഘനവും നടന്നിട്ടുണ്ടെന്ന്​ ഹൈകോടതി ​കണ്ടെത്തിയിരിക്കുകയാണ്​. യഥാർഥത്തിൽ സംഭവിച്ചതെന്താണെന്ന്​ വൈദികസമിതിയിലോ ഇതര സഭാ വേദികളിലോ വെളി​െപ്പടുത്താൻ കർദിനാളിനോടും ബന്ധപ്പെട്ട മറ്റ്​ കക്ഷി​കളോ​ടും ആവശ്യപ്പെട്ടിരുന്നു. ഇത്​ കർദിനാൾ തള്ളിയതാണ്​ വിവാദത്തെ ഹൈകോടതിയി​െലത്തിച്ചത്​. ഇക്കാര്യത്തില്‍ സിനഡ്​ സ്വീകരിച്ച നിലപാട് ദൗര്‍ഭാഗ്യകരമാണെന്നും സിനഡിലുള്ള വിശ്വാസം തങ്ങള്‍ക്ക് നഷ്​ടപ്പെട്ടെന്നും വൈദികര്‍ പറഞ്ഞു. രൂപതയിൽ 458 വൈദികരുള്ളതിൽ 448 പേരും ചേർന്നെടുത്ത തീരുമാനപ്രകാരമാണ്​ കർദിനാൾ മാറിനിൽക്കണമെന്ന​ ആവശ്യമെന്നും വൈദികസമിതി സെക്രട്ടറി ഫാ. കുര്യാക്കോസ്​ മുണ്ടാടൻ മാധ്യമങ്ങളോട്​ പറഞ്ഞു​. 


ഭൂമി ഇടപാടിനെ ആരാധനാക്രമവുമായി ബന്ധപ്പെടുത്താൻ​ ഗൂഢശ്രമമെന്ന്​ വൈദിക കൂട്ടായ്​മ

ഭൂമിവിവാദവുമായി ബന്ധപ്പെട്ട്​ സീറോ മലബാർ സഭയിലുണ്ടാകുന്ന എതിർശബ്​ദങ്ങളെ ആരാധന​ക്രമവുമായി കൂട്ടിക്കെട്ടാൻ ഗൂഢശ്രമമെന്ന് വൈദികസമിതിയുടെ നേതൃത്വത്തിലുള്ള​ വൈദിക കൂട്ടായ്​മ. ഹൈകോടതി വിധിയുണ്ടായിട്ടും എന്തുകൊണ്ടാണ് പൊലീസ്​ കേസെടുക്കാത്തതെന്ന് തങ്ങൾക്കറിയില്ല. ആരാധന ക്രമവുമായി ബന്ധപ്പെട്ട പ്രശ്നമല്ല ഇത്. അങ്ങനെ വരുത്താൻ ചിലർ ശ്രമിക്കുന്നുണ്ട്. തങ്ങൾ മാർ ജോർജ് ആലഞ്ചേരിക്കെതിരല്ല. ഭൂമി വിൽപന എന്തുകൊണ്ടാണ്​ രഹസ്യമാക്കിയതെന്നും അദ്ദേഹം ചോദിച്ചു.

വിഷയങ്ങൾ എല്ലാം വത്തിക്കാനിൽ അറിയാം. മാർപാപ്പക്കും അറിയാം. നടപടിയെടുക്കേണ്ടത്് സിനഡാണ്. സിനഡിലെ ബിഷപ്പുമാർ മാർ ജോർജ് ആലഞ്ചേരിയെ വേണ്ടവിധം ഉപദേശിക്കണം. നിയമത്തിന്​ മുന്നിൽ എല്ലാവരും തുല്യരാണ്. കർദിനാളിന് പ്രത്യേക ആനുകൂല്യം ഇല്ല. കർദിനാളിൽ തങ്ങൾക്ക് വിശ്വാസം നഷ്​ടപ്പെട്ടിട്ടില്ല. അദ്ദേഹം അഗ്​നിശുദ്ധി വരുത്തി തിരിച്ചെത്തിയാൽ തങ്ങൾ പിന്തുണക്കും. പക്ഷേ അദ്ദേഹം തങ്ങളെ വിശ്വാസത്തിലെടുക്കുന്നില്ല. അതിരൂപതയിലെ വൈദിക സമിതി, ആലോചന സമിതി, സാമ്പത്തിക കാര്യസമിതി തുടങ്ങിയ ഒരു വേദിയിലും ചർച്ച ചെയ്യാതെയായിരുന്നു ഭൂമി ഇടപാട്​​. 

പട്ടിയും പശുവും ചത്താൽ ചോദിക്കാറുള്ള നാട്ടിൽ 25 വർഷം നാടും വീടും ഉപേക്ഷിച്ച്​ സഭയെ ശുശ്രൂഷിച്ച മലയാറ്റൂർ റെക്​ടർ ഫാ. സേവ്യർ തേലക്കാട്ട്​ കുത്തേറ്റ്​ മരിച്ചപ്പോൾ സ​ഭാനേതൃത്വം സ്വീകരിച്ച നിലപാട്​ പ്രതിഷേധാർഹമാണ്​. സംഭവത്തെ അപലപിക്കാൻ പോലും തയാറായില്ല എന്നുമാത്രമല്ല മറ്റുപലരും പറയുന്നതുകേട്ട്​ അദ്ദേഹത്തെ മരണശേഷവും ​കുറ്റവാളിയായി കാണുകയായിരുന്നു. ഫാ. സേവ്യർ തേലക്കാടി​​​െൻറ മരണത്തിന്​ പിന്നിൽ ഗൂഢാലോചനയുണ്ട്​. മുമ്പ്​ അദ്ദേഹത്തി​​​െൻറ കാർ തല്ലിത്തകർത്തിരുന്നു. ജീവന്​ ഭീഷണിയുള്ളതായി അദ്ദേഹം മുമ്പ്​ പറഞ്ഞിട്ടു​ണ്ട്​. ഇൗ വിഷയത്തി​ൽ പൊലീസ്​ കാര്യക്ഷമമായ അന്വേഷണം നടത്തണമെന്നും ഫാ. കുര്യാക്കോസ്​ മുണ്ടാടൻ ആവശ്യപ്പെട്ടു.

Show Full Article
TAGS:mar alencherry Syro-Malabar Sabha land issue kerala news malayalam news 
News Summary - Syro Malabar Sabha Land Issue: Mar Alencherry -Kerala News
Next Story