‘സമരം ചെയ്യുന്ന ആശമാരെ പിരിച്ചുവിട്ട്​ പകരക്കാരെ നിയമിക്കാൻ ​ശ്രമിച്ചാൽ കേന്ദ്ര വിഹിതം നൽകണമോ എന്ന്​ ആലോചിക്കാൻ ആവശ്യപ്പെടും’

തിരുവനന്ത​പുരം: ആശ വർക്കർമാർ നടത്തുന്ന സമരം പ്രധാനമന്ത്രിയുടെ ശ്രദ്ധയിൽപെടുത്തി പരിഹാരം കാണാൻ ശ്രമിക്കുമെന്ന്​ കേന്ദ്ര സഹമന്ത്രി സുരേഷ്​ ഗോപി. സമരം ചെയ്യുന്നവരെ പിരിച്ചുവിട്ട്​ പകരക്കാരെ നിയമിക്കാൻ ​കേരളം ശ്രമിച്ചാൽ പദ്ധതിക്ക്​ വിഹിതം നൽകണമോ എന്ന്​ ആലോചിക്കണമെന്ന്​ കേന്ദ്രത്തോട്​ ആവശ്യപ്പെടുമെന്നും അ​ദ്ദേഹം സമരവേദി സന്ദർശിക്കവേ പറഞ്ഞു.

പദ്ധതിയുടെ മാനദണ്ഡങ്ങൾ ആവശ്യമെങ്കിൽ പുനഃപരിശോധിക്കാൻ പ്രധാനമന്ത്രിയോട്​ പറയാം. തീരുമാനമെടുക്കേണ്ടത് പ്രധാനമന്ത്രിയും കാബിനറ്റുമാണെന്നും അദ്ദേഹം മാധ്യമപ്രവർത്തക​രോട്​ പറഞ്ഞു.

അതേസമയം, സമരം ചെയ്യുന്നവർക്കൊപ്പം തങ്ങളുണ്ടെന്ന്​ പ്രതിപക്ഷ നേതാവ്​ വി.ഡി. സതീശൻ ​മാധ്യമപ്രവർത്തകരോട്​ പ്രതികരിച്ചു. മിനിമം കൂലിയടക്കം ആവശ്യപ്പെട്ട്​ സമരം ചെയ്യുന്നത്​ തെറ്റാണോ. സമരം ചെയ്യുന്നവരെ സർക്കാറും ഇടതുപക്ഷവും പരിഹസിക്കുന്നു​. സമരത്തിന്​ പിന്തുണ അർപ്പിച്ചെത്തിയവർക്ക്​ പൊലീസ്​ നോട്ടീസ്​ നൽകുന്നു.

സമരം പൊളിക്കാൻ ബദൽ സമരം നടത്തുന്നു. ഇത്​ കമ്യൂണിസ്​റ്റ്​ പാർട്ടിയാ​ണോ അതോ തീവ്രവലതുപക്ഷ പാർട്ടിയാ​ണോ എന്നാണ്​ സംശയം. സംസ്ഥാന സർക്കാറിന് മുതലാളിത്ത സ്വഭാവമാണ്​​. അവർ സമരങ്ങളെ ഭയക്കുന്നെന്നും അദ്ദേഹം കൂട്ടിച്ചേർത്തു.