വിദ്യാർഥിയുടെ മുടി മുറിച്ച കേസ്:​ പ്രധാനാധ്യാപികക്ക്​ മുൻകൂർ ജാമ്യം

കൊച്ചി: സ്കൂൾ അസംബ്ലിയിൽ പട്ടികവർഗ വിദ്യാർഥിയുടെ മുടി മുറിച്ച കേസിൽ പ്രധാനാധ്യാപികക്ക്​ ഹൈകോടതിയുടെ മുൻകൂർ ജാമ്യം. അച്ചടക്കബോധം ഉണ്ടാക്കുകയെന്ന ലക്ഷ്യത്തോടെ ദുരുദ്ദേശ്യപരമല്ലാതെ നടത്തിയ പ്രവൃത്തിയാണ്​ ഇതെന്ന്​ വിലയിരുത്തിയാണ്​ കാസർകോട്​ കോട്ടമല എം.ജി.എം യു.പി സ്കൂൾ പ്രധാനാധ്യാപിക ഷേർളി ജോസഫിന്​ ​ജസ്റ്റിസ്​ ​കെ. ബാബു ഉപാധികളോടെ ജാമ്യം അനുവദിച്ചത്​.

ജനുവരി 27ന് അന്വേഷണ ഉദ്യോഗസ്ഥൻ മുമ്പാകെ ഹാജരാകണമെന്നും അറസ്റ്റ് ചെയ്താൽ ലക്ഷം രൂപ ബോണ്ടിന്‍റെയും തുല്യ തുകയുടെ ആൾജാമ്യത്തിന്റെയും അടിസ്ഥാനത്തിൽ ജാമ്യം നൽകണമെന്നുമാണ്​ ഉത്തരവ്.​ ഒക്ടോബർ 19നുണ്ടായ സംഭവത്തിൽ വിദ്യാർഥിയുടെ മൊഴിയുടെ അടിസ്ഥാനത്തിൽ പട്ടികജാതി /പട്ടികവർഗ പീഡന നിരോധന നിയമപ്രകാരവും ബാലനീതി നിയമപ്രകാരവുമാണ്​ കേസെടുത്തത്.

പട്ടികവിഭാഗ പീഡന നിരോധന നിയമം ബാധകമല്ലെങ്കിലും ബാലനീതി നിയമപ്രകാരമുള്ള കേസ് നിലനിൽക്കുമെന്ന് വിലയിരുത്തി സെഷൻസ് കോടതി മുൻകൂർജാമ്യം നിഷേധിച്ചിരുന്നു. തുടർന്നാണ്​ ഹൈകോടതിയെ സമീപിച്ചത്​.