വിദ്യാർഥികൾ വിദേശത്തേക്ക് പോകുന്നത് ആഗോളീകരണത്തിന്‍റെ ഭാഗമായി -മന്ത്രി

കൊച്ചി: ഉന്നത വിദ്യാഭ്യാസത്തിന്​ വിദ്യാർഥികൾ വിദേശ രാജ്യങ്ങളിൽ പോകുന്നത് ആഗോളീകരണത്തിന്‍റെ ഭാഗമായാണെന്ന് മന്ത്രി ഡോ. ആർ. ബിന്ദു. കേരളത്തെ നോളജ്​ സൊസൈറ്റിയായി മാറ്റിയെടുത്താൽ വിദ്യാർഥികളെ ഇവിടെത്തന്നെ പിടിച്ചുനിർത്താൻ കഴിയും. ഇതിനായി ലോകോത്തര നിലവാരത്തിലുള്ള സംവിധാനങ്ങൾ വിദ്യാഭ്യാസ രംഗത്ത് ഒരുക്കാനാണ്​ സർക്കാർ ശ്രമിക്കുന്നതെന്ന്​ അവർ മാധ്യമപ്രവർത്തകരോട്​ പറഞ്ഞു.

പണം ഇല്ലെന്ന പ്രശ്നം ഉന്നത വിദ്യാഭ്യാസ മേഖലയെ ബാധിക്കരുതെന്ന ശാഠ്യം സർക്കാറിനുണ്ട്​. പഠനത്തോടൊപ്പം ജോലി ചെയ്യാം എന്നതാണ് വിദേശ രാജ്യങ്ങളിലേക്ക് കൂടുതൽ പേരെ ആകർഷിക്കുന്നത്. എന്നാൽ, ഈ സംവിധാനം കേരളത്തിലും ആരംഭിച്ചിട്ടുണ്ട്.

കേരളത്തിൽ ഉന്നത വിദ്യാഭ്യാസം നടത്തുന്നവരുടെ എണ്ണവും വർധിച്ചിട്ടുണ്ട്. ഓൾ ഇന്ത്യ ഹയർ എജുക്കേഷൻ സർവേ അനുസരിച്ച് എൻറോൾമെന്‍റ്​ നിരക്ക് 42.3 ശതമാനമായി ഉയർന്നിട്ടുണ്ട്. 2017ൽ ഇത് 37.4 ശതമാനമായിരുന്നു.

വിദേശ രാജ്യങ്ങളിലെ സാമ്പത്തിക പ്രതിസന്ധി പരിഹരിക്കാൻ കുട്ടികളെ ചാക്കിട്ട് പിടിക്കുന്ന രീതിയുമുണ്ട്. ഗുണനിലവാരമില്ലാത്ത സർവകലാശാലകളിലാണ് പലപ്പോഴും കുട്ടികളെത്തുന്നതെന്നും മന്ത്രി പറഞ്ഞു.