ഡോറിൽ വസ്ത്രം കുടുങ്ങി റോഡിൽ വീണ വിദ്യാർഥിനിയെയുംകൊണ്ട് ബസ്​ സഞ്ചരിച്ചത് അര കിലോമീറ്റർ

കടയ്ക്കൽ (കൊല്ലം): ഇറങ്ങുന്നതിനിടെ ഡോറിൽ വസ്ത്രംകുടുങ്ങി റോഡിൽ വീണ മൂന്നാം ക്ലാസുകാരിയെ വലിച്ചിഴച്ച് സ്കൂൾ ബസ്​ നീങ്ങിയത്​ അര കിലോമീറ്ററോളം. ഗുരുതര പരിക്കേറ്റ​ ചിതറ കുറക്കോട് സ്കൂളിലെ മൂന്നാം ക്ലാസ് വിദ്യാർഥിനി അമീറ ഫാത്തിമയെ ഗുരുതര പരിക്കുകളോടെ തിരുവനന്തപുരം മെഡിക്കൽ കോളജ്​ ആശുപത്രിയിൽ പ്രവേശിപ്പിച്ചു.

വ്യാഴാഴ്ച വൈകീട്ട്​ മൂന്നരയോടെ ചിതറ കാനൂർ-വളവുപച്ച റോഡിൽ മഹാദേവർ കുന്ന്​ കയറ്റത്തായിരുന്നു സംഭവം. വസ്ത്രം കുരുങ്ങിയതും വിദ്യാർഥിനി പുറത്തേക്ക് വീണതും ശ്രദ്ധിക്കാതെ ഡ്രൈവർ വാഹനം മുന്നോട്ടെടുത്തതാണ്​ അപകടകാരണം​. നാട്ടുകാർ ബഹളംവെച്ചതോടെയാണ്​ ഡ്രൈവർ വാഹനം നിർത്തിയത്​.

തുടർന്ന്​ കുട്ടിയെ കടയ്ക്കൽ താലൂക്കാശുപത്രിയിൽ എത്തിച്ചെങ്കിലും പരിക്ക്​ ഗുരുതരമായതിനാൽ തിരുവനന്തപുരം മെഡിക്കൽ കോളജ്​ ആശുപത്രിയിലേക്ക്​ മാറ്റുകയായിരുന്നു. സ്കൂളിനുവേണ്ടി ഓടുന്ന സ്വകാര്യ ബസാണ്​ അപകടമുണ്ടാക്കിയത്​. ബസ്​ ചിതറ പൊലീസ്​ കസ്റ്റഡിയിലെടുത്തു.