മധ്യവയസ്കന്‍റെ ചെവി നായ കടിച്ച് മുറിച്ച നിലയിൽ

അടൂർ: മധ്യവയസ്കനെ നായയുടെ കടിയേറ്റ നിലയിൽ കണ്ടെത്തി. ഏഴംകുളം മാങ്കൂട്ടം സ്വദേശി ടൈറ്റസ് (52)നെയാണ് നായ കടിച്ച നിലയിൽ കണ്ടെത്തിയത്. അടൂർ കെ.എസ്.ആർ.ടി.സി സ്റ്റാൻഡിന് സമീപം റോഡരികിൽ അവശനിലയിൽ കിടക്കുകയായിരുന്നു ഇയാൾ. ഇടത് ചെവി നായ കടിച്ച് മുറിച്ച നിലയിലാണ്. മുതുകിലും സാരമായ പരിക്കുണ്ട്.

തിങ്കളാഴ്ച വൈകീട്ടാണ് സംഭവം. പരിക്കേറ്റ നിലയിൽ കണ്ട നാട്ടുകാർ പൊലീസിൽ വിവരം അറിയിക്കുകയായിരുന്നു. പൊലീസെത്തി ആംബുലൻസിൽ ഇയാളെ അടൂർ ജനറൽ ആശുപത്രിയിലേക്ക് മാറ്റി.