എ ടു ഇസഡ്​, ഫൊ​ൽക്രം, ജിൽജിൽ, വനസാഗര വ്യോമറാണി -ഒരച്​ഛൻ മക്കൾക്കിട്ട വിചിത്ര പേരുകൾ...

ഒരു പേരിലെന്തിരിക്കുന്നു? ഈ ചോദ്യം ഇനി ഉന്നയിക്കുംമുമ്പ്​ ഈ കഥയൊന്നു വായിക്കണം. ഒരിടത്തൊരിടത്ത്​ ഒരു അച്​ഛനുണ്ടായിരുന്നു. അദ്ദേഹം മക്കൾക്കിട്ട പേര്​ ഇങ്ങനെയാണ്​. മൂത്ത മകൻ എ ടു ഇസഡ്​, രണ്ടാമത്തെയാൾ ഫൊ​ൽക്രം, മൂന്നാമത്തെയാൾ ജിൽജിൽ, ഏറ്റവും ഇളയ മകൾ വനസാഗര വ്യോമറാണി... ജാതി, മത ചിഹ്നങ്ങൾ 'ശരീരത്തിൽ കെട്ടി' നടക്കുന്നവരുടെ കാലത്ത്, ത​ൻെറ മക്കൾ ജാതിയുടെയോ മതത്തി​ൻെറയോ പേരിൽ അറിയപ്പെടരുതെന്ന് ആഗ്രഹിച്ചാണ്​ അദ്ദേഹം ഈ വിചിത്ര പേരുകൾ മക്കൾക്ക്​ സമ്മാനിച്ചത്​.

കാസർകോട്​ ഗവ. കോളജിൽ ലൈബ്രേറിയനായിരുന്ന ജെ. മാണിക്കം ആയിരുന്നു ആ പിതാവ്​. നല്ല ഉദ്ദേശ്യത്തോടെയാണ്​ അദ്ദേഹം മക്കൾക്ക്​ ഈ​ പേരിട്ടതെങ്കിലും പേരി​ൻെറ വിചിത്ര സ്വഭാവം മൂലം ഏറെ ദുരനുഭവങ്ങൾ നേരിടേണ്ടി വന്നിട്ടുണ്ട്​ ഈ മക്കൾക്ക്​. 'പേര്​ പുറത്തുപറയാൻ പറ്റാത്ത അവസ്​ഥ ഞങ്ങൾക്ക്​ ജീവിതത്തി​ൻെറ പല ഘട്ടങ്ങളിൽ ഉണ്ടായിട്ടുണ്ട്​. സാധാരണയായി ക്രിസ്​ത്യാനികൾക്ക്​ പള്ളിയിലും വീട്ടിലുമായി രണ്ട്​ പേരുകൾ ഉണ്ടാകാറുണ്ട്​. പക്ഷേ, ഞങ്ങൾക്ക്​ സ്​കൂൾ രേഖകളിലും സർട്ടിഫിക്കറ്റുകളിലും ഒരേ പേരാണ്​. ഇതുകാരണം എന്നെക്കാളുപരി സഹോദരങ്ങൾക്ക്​ പിൽക്കാലത്ത്​ പല പ്രയാസങ്ങളുമുണ്ടായി'- മാണിക്കത്തിൻെറ മക്കളിലൊരാളായ കവിയും എഴുത്തുകാരനും സാംസ്കാരിക പ്രവർത്തകനുമായ എം.പി. ജിൽ ജിൽ പറയുന്നു.

കാസർകോട് ജില്ലാ സെഷൻസ് കോടതിയിൽ ജീവനക്കാരനായിരുന്നു ജിൽജിൽ. തപാൽ വകുപ്പിൽ താത്​ക്കാലിക ജീവനക്കാരനായിരുന്ന മൂത്തയാൾ എ ടു ഇസഡ്​ ജീവിച്ചിരിപ്പില്ല. പേരുകാരണമുണ്ടായ പ്രശ്​നങ്ങൾ മൂലം സഹോദരി വനസാഗര വ്യോമറാണിക്ക്​​ മാനസികാസ്വാസ്​ഥ്യം വരെയുണ്ടായി. കലക്​ടേറ്റിൽ താത്​ക്കാലിക ജീവനക്കാരിയായിരുന്നു അവർ. ഒരിക്കൽ, മേലധികാരി പേര്​ മുഴുവനായി വിളിച്ചപ്പോൾ ഓഫിസിൽ എല്ലാവരും ചിരിച്ചു. ഇത്​ ചില പ്രശ്​നങ്ങൾക്കിടയായതോടെ അവർക്ക്​ ജോലിയും നഷ്​ടമായി.

'ഇത്തരം പേരുള്ളവർക്ക്​ ഇക്കാലത്ത്​ ജീവിക്കാൻ പ്രയാസമാണ്​. അച്​ഛ​ൻെറ സ്വദേശം തിരുവനന്തപുരത്തിനടുത്ത്​ പാറശ്ശാലയാണ്. ഞങ്ങൾ ജനിച്ചത് കാസർകോടും. അച്​ഛ​െൻറ പിതാവ് ജീവനായകം, അമ്മ മറിയക്കൻ. ഞങ്ങൾ ക്രിസ്ത്യൻ നാടാർ സമുദായത്തിൽപ്പെട്ടവരാണ്. നാടാർ വിഭാഗത്തിൽ ഒരു കുടുംബത്തിൽ തന്നെ രണ്ടു സമുദായങ്ങളിൽ ഉൾപ്പെട്ടവരുണ്ടാകും. ചേട്ടൻ പള്ളിയിൽ പോകുമ്പോൾ അനുജൻ അമ്പലത്തിൽ പോകും. മതസൗഹാർദത്തിൻെറ അന്തരീക്ഷത്തിൽ വളർന്നത്​ കൊണ്ടായിരിക്കാം അച്​ഛൻ ഇങ്ങനെ വേറിട്ട പേരുകൾ ക​ണ്ടെത്തിയത്​. നല്ലൊരു വായനക്കാരനായിരുന്നു അച്​ഛൻ. സാഹിത്യത്തിൽ തൽപരനായിരുന്നെങ്കിലും പുസ്​തകങ്ങളൊന്നും എഴുതിയിട്ടില്ല. മക്കളുടെ ജാതി തിരിച്ചറിയേണ്ട എന്നു കരുതിയാകും അച്​ഛൻ ഇത്തരം പേരുകൾ കണ്ടെത്തിയത്. ഞങ്ങളുടെ പേരുകളുടെ വിചിത്രസ്വഭാവത്തെ കുറിച്ച്​ പല തവണ പത്രങ്ങളിൽ പ്രസിദ്ധീകരിച്ചിട്ടുണ്ട്​. അപ്പോൾ കുറേ ദിവസത്തേക്ക്​ ഞങ്ങൾ പുറത്തിങ്ങാറില്ല' -ജിൽജിൽ പറയുന്നു.

തങ്ങളുടെ ബുദ്ധിമുട്ട്​ മക്കൾ അനുഭവിക്കാതിരിക്കാൻ ആകണം, സ്വന്തം മക്കൾക്ക്​ ഇവർ സാധാരണ പേരാണ്​ ഇട്ടത്​. ജിൽജിലി​ൻെറ സഹോദരന്മാരുടെ മക്കൾക്ക് സാധാരണ പേരുകളാണ്. ഡാനി, ഡബോറ എന്നിങ്ങനെ. വനസാഗര വ്യോമറാണിയുടെ മകളുടെ പേര്​ ശ്രദ്ധ എന്നാണ്​. ജിൽജിലി​ൻെറ മകള​ുടെ പേര്​ മേഴ്​സി എന്നും​. മേഴ്​സി ഇപ്പോൾ ഡൽഹി സർവകലാശാലയിൽ ഇംഗ്ലീഷ് സാഹിത്യത്തിൽ ഗവേഷണം നടത്തുന്നു. മകൾക്ക്​ പേരിട്ടതിന്​ പിന്നിലും ഒരു കഥയുണ്ടെന്ന്​ പറയുന്നു ജിൽജിൽ. ഭാര്യ ഷീബ (കാസർകോട് ജനറൽ ആശുപത്രി ജീവനക്കാരി) ഗർഭം ധരിച്ച കാലത്ത്​ തന്നെ അദ്ദേഹം മക്കൾക്കുള്ള പേര്​ കണ്ടുപിടിച്ചിരുന്നു. അച്​ഛൻ വിചിത്രമായ പേര്​ കണ്ടുപിടിച്ചാലോ എന്ന പേടി മൂലമായിരുന്നു അത്​. ആ പേടിയുമായി കുറേനാൾ ജിൽജിൽ നടന്നു. ഒടുവിൽ, പ്രസവത്തിന്​ മുമ്പ്​ അച്​ഛനോട്​ പറഞ്ഞു ജനിക്കുന്നത്​ മകൾ ആണെങ്കിൽ മേഴ്​സി എന്ന്​ പേരിടാനാണ്​ തീരുമാനമെന്ന്​. 'ശരി നിങ്ങളുടെ ഇഷ്​ടം പോലെയാക​ട്ടെ, ഞാനൊന്നും പറയുന്നില്ല. ഞാൻ പല പേരുകളും കണ്ടെത്തി വെച്ചിരുന്നു. എന്നായിരുന്നു അച്​ഛ​ൻെറ മറുപടി'- ജിൽജിൽ പറയുന്നു.