സ്കൂൾ കലോത്സവം: മലയാള പ്രസംഗത്തിൽ ഒന്നാം സ്ഥാനം നേടുന്നവർക്ക് ‘അഴീക്കോട്​ സ്മാരക പ്രസംഗ പ്രതിഭ പുരസ്കാരം’

തൃശൂർ: സംസ്ഥാന സ്കൂൾ കലോത്സവം ഹൈസ്കൂൾ, ഹയർ സെക്കൻഡറി വിഭാഗങ്ങളിലും കലിക്കറ്റ്​ സർവകലാശാല കലോത്സവത്തിലും മലയാള പ്രസംഗത്തിൽ ഒന്നാം സ്ഥാനം നേടുന്നവർക്ക്​ ഈ വർഷം മുതൽ ‘അഴീക്കോട്​ സ്മാരക പ്രസംഗ പ്രതിഭ പുരസ്കാരം’ നൽകുമെന്ന്​ സുകുമാർ അഴീക്കോട്​ സ്മാരക സമിതി ഭാരവാഹികൾ വാർത്തസമ്മേളനത്തിൽ അറിയിച്ചു. കൊല്ലത്ത്​ വ്യാഴാഴ്ച തുടങ്ങുന്ന സംസ്ഥാന സ്കൂൾ കലോത്സവം മുതൽ ഇത്​ നടപ്പാക്കും.

അര ലക്ഷം രൂപ വീതം സ്ഥിര നിക്ഷേപമുള്ള മൂന്ന്​ എൻഡോവ്​മെന്‍റുകളിൽനിന്ന്​ ലഭിക്കുന്ന തുകയാണ്​ ജനുവരി 24ന്​ അഴീക്കോടിന്‍റെ ഓർമദിനത്തിൽ സമ്മാനിക്കുക. റോളിങ്​ ട്രോഫി, സർട്ടിഫിക്കറ്റ്​ എന്നിവയും നൽകും. ടി.എൻ. പ്രതാപൻ എം.പി, മുൻ മന്ത്രി സി. രവീന്ദ്രനാഥ്​, ജയരാജ്​ വാര്യർ തുടങ്ങി 20 അംഗങ്ങളാണ്​ എൻഡോവ്​മെന്‍റിനുള്ള തുക നൽകിയത്​. അടുത്ത വർഷം മുതൽ എം.ജി സർവകലാശാല കലോത്സവത്തിലെ പ്രസംഗ മത്സര വിജയിക്കും സമ്മാനം നൽകും.

ഇത്തവണത്തെ ഓർമദിനം 24ന്​ വൈകിട്ട്​ 4.30ന്​ തൃശൂർ ഗവ. ട്രെയിനിങ്​ കോളജ്​ ഓഡിറ്റോറിയത്തിൽ നടക്കും. വാർത്ത സമ്മേളനത്തിൽ സ്മാരക സമിതി ചെയർമാൻ കെ. രാജൻ തലോർ, ട്രഷറർ കെ. വിജയരാഘവൻ, വൈസ്​ ചെയർമാൻ സലീം ടി. മാത്യൂസ്​, എൻ. രാജഗോപാൽ, പി.എ. രാധാകൃഷ്ണൻ എന്നിവർ പ​ങ്കെടുത്തു.