50 രൂപ പെട്രോൾ വാഗ്​ദാനം വെറുംവാക്കായിരുന്നു -ശ്രീധരൻ പിള്ള

പത്തനംതിട്ട: തെരഞ്ഞെടുപ്പ്​ സമയത്ത്​ പാർട്ടികൾ നൽകുന്ന വാഗ്​ദാനങ്ങൾക്ക്​ ഒരു വിലയുമില്ലെന്ന്​ ബി.ജെ.പി സംസ്ഥാന അധ്യക്ഷൻ പി.എസ്​​. ശ്രീധരൻ പിള്ള പഞ്ഞു. 2014ലെ തെരഞ്ഞെടുപ്പിനെ നേരിടു​േമ്പാൾ പെട്രോൾ വില 50 രൂപയിൽ എത്തിക്കുമെന്ന്​ ബി.ജെ.പി നൽകിയ വാഗ്​ദാനം ഒാർമിപ്പിച്ചപ്പോഴാണ്​ ശ്രീധരൻ പിള്ള ഇതു പറഞ്ഞത്​. പത്തനംതിട്ടയിൽ മാധ്യമപ്രവർത്തകരോട്​ സംസാരിക്കു​കയായിരുന്നു അദ്ദേഹം.

ഇന്ത്യയിലെ തെരഞ്ഞെടുപ്പ്​ വാഗ്​ദാനങ്ങൾ എല്ലാം നോക്കിയാൽ അത്​ മനസ്സിലാകു​ം. ഗരീബി ഹടാവോ എന്നൊക്കെ പറഞ്ഞ്​ തെരഞ്ഞെടുപ്പിനെ നേരിട്ടവർ രാജ്യത്തുനിന്ന്​ ദാരിദ്ര്യം തുടച്ചുനീക്കി​യോ. തെരഞ്ഞെടുപ്പ്​ വാഗ്​ദാനവും യാഥാർഥ്യവും തമ്മിൽ പൊരുത്തപ്പെടാത്തതാണ്​ ഇന്ത്യൻ ജനാധിപത്യം നേരിടുന്ന ഏറ്റവും വലിയ വെല്ലുവിളിയെന്നും അദ്ദേഹം പറഞ്ഞു.

യു.പി.എ സർക്കാറാണ്​ എണ്ണകമ്പനികൾക്ക്​ വില നിശ്ചയിക്കാനുള്ള അധികാരം നൽകിയത്​. അതാണ്​ വിലക്കയറ്റത്തിന്​ കാരണം. ഏതായാലും ത​​​​െൻറ പാർട്ടി അധ്യക്ഷൻ വിലകുറക്കാൻ നടപടി എടുക്കുമെന്ന്​ പറഞ്ഞത്​ വിശ്വസിക്കുകയാണെന്നും ശ്രീധരൻ പിള്ള പറഞ്ഞു.

ബി.ജെ.പിയിൽ അസ്വാരസ്യങ്ങളില്ല -പി.എസ്. ശ്രീധരൻ പിള്ള
ചാരുംമൂട്: ബി.ജെ.പി സംസ്ഥാന ഘടകത്തിൽ അസ്വാരസ്യങ്ങളില്ലെന്ന് പ്രസിഡൻറ് പി.എസ്. ശ്രീധരൻ പിള്ള. നൂറനാട്ട് മാധ്യമ പ്രവർത്തകരോട് സംസാരിക്കുകയായിരുന്നു അദ്ദേഹം. ഇന്ധന നികുതി കുറക്കുന്ന നടപടി ത്വരിതപ്പെടുത്തുമെന്ന് കേന്ദ്രം അറിയിച്ചിട്ടുള്ളതായും അദ്ദേഹം പറഞ്ഞു. യു.എ.ഇയുടെ സഹായ വാഗ്ദാനം സംബന്ധിച്ച് മുഖ്യമന്തി കുപ്രചാരണമാണ് നടത്തിയിട്ടുള്ളത്​. കരിമുളയ്ക്കൽ ക്രിസ്ത്യൻ പള്ളിയിൽ അക്രമണം നടത്തിയത് ആർ.എസ്.എസുകാരും ബി.ജെ.പിക്കാരുമാണെന്നാണ് പ്രതിപക്ഷ നേതാവും, മന്ത്രിമാരുമുൾപ്പെടെ പറഞ്ഞത്.

വർഗീയ സ്പർദമൂലമുണ്ടായ സംഭവമല്ലെന്ന് പൊലീസ്‌ കോടതിയെ അറിയിക്കുകയും പ്രതികൾക്ക് ജാമ്യം ലഭിക്കുകയും ചെയ്തിരുന്നു. കമ്യൂണിസ്​റ്റ്​ പാർട്ടിയും കോൺഗ്രസുമാണ് സമുദായ സൗഹാർദത്തിന് ഭീഷണിയെന്നും, മുതലെടുപ്പിനുള്ള ശ്രമമായിരുന്നു ഇവരുടെ ആരോപണമെന്നും ശ്രീധരൻപിള്ള പറഞ്ഞു. സംഭവത്തിൽ എൽ.ഡി.എഫും, യു.ഡി.എഫും നിലപാടിലുറച്ച് നിൽക്കുകയാണെന്ന് വ്യക്തമാക്കിയാൽ കോടതിയെ സമീപിക്കുമെന്നും അദ്ദേഹം പ്രതികരിച്ചു.