സേവ്യർ ചിറ്റിലപ്പിള്ളിക്ക്​ സ്പീക്കറുടെ ശാസന; കുറച്ചുകൂടി മാന്യത കാട്ടണമെന്ന് പ്രതികരണം

തിരുവനന്തപുരം: സി.പി.എമ്മിലെ സേവ്യർ ചിറ്റിലപ്പിള്ളിക്ക്​ നിയമസഭയിൽ സ്പീക്കറുടെ ശാസന. ശൂന്യവേളയിൽ അടിയന്തര പ്രമേയത്തിന്​ അവതരണാനുമതി തേടിയുള്ള പ്രതിപക്ഷ നോട്ടീസിൽ ചർച്ച നടക്കുമ്പോഴായിരുന്നു സ്പീക്കറുടെ ഇടപെടൽ.

വടക്കാഞ്ചേരി ലൈഫ്​ മിഷൻ ഫ്ലാറ്റ്​ നിർമാണത്തിൽ പ്രതിപക്ഷം അഴിമതി ആരോപിച്ചപ്പോൾ ശക്തമായി ഭരണപക്ഷം പ്രതി​രോധിച്ചു. പ്രതിപക്ഷത്തെ പ്രകോപിപ്പിച്ചും ബഹളംവെച്ചുമുള്ള വടക്കാഞ്ചേരി എം.എൽ.എ കൂടിയായ സേവ്യർ ചിറ്റിലപ്പിള്ളിയുടെ പ്രതിഷേധം അതിരുവിട്ടതോടെ സ്പീക്കർ പലതവണ പേരെടുത്ത്​ പറഞ്ഞ്​ സംയമനം പാലിക്കാൻ മുന്നറിയിപ്പ്​ നൽകി.

പ്രതിപക്ഷനേതാവ്​ സംസാരിക്കുന്നതിനിടെ വീണ്ടും എഴുന്നേറ്റുനിന്ന്​ ഉച്ചത്തിൽ ബഹളംവെച്ചതോടെ സ്പീക്കർ രോഷാകുലനായി. പ്രതിപക്ഷ നേതാവ്​ സംസാരിക്കുമ്പോൾ കുറച്ചുകൂടി മാന്യത കാട്ടണമെന്നും ചെയർ പറഞ്ഞാൽ അനുസരിക്കണമെന്നും പറഞ്ഞ്​ സ്പീക്കർ സ്വരം കടുപ്പിച്ചതോടെ സേവ്യർ ശാന്തനായി.