പത്താം ക്ലാസിൽ മകന്​ മികച്ച വിജയം, പ്ലസ്​ വൺ പ്രവേശനത്തിനായി​ പിതാവിന്​ പരോൾ; ​നല്ല ഭാവിക്കായി സർവശക്തൻ അനുഗ്രഹിക്കട്ടെയെന്ന് ഹൈകോടതി

കൊച്ചി: പത്താം ക്ലാസിൽ മികച്ച വിജയം നേടിയ മകന്‍റെ പ്ലസ്​ വൺ പ്രവേശനത്തിന്​ ജീവപര്യന്തം തടവിൽ കഴിയുന്ന പിതാവിന്​ ഹൈകോടതി പരോൾ അനുവദിച്ചു. മലപ്പുറം തവനൂർ സെൻട്രൽ ജയിലിൽ കഴിയുന്ന പാലക്കാട് സ്വദേശിക്കാണ് ജസ്റ്റിസ് പി.വി. കുഞ്ഞികൃഷ്ണൻ ജൂൺ 12 മുതൽ 18 വരെ ഏഴുദിവസത്തെ പരോൾ അനുവദിച്ചത്. ആറ് എ പ്ലസും രണ്ട് എ യും നേടി പാസായ കുട്ടിയുടെ മാർക്ക്​ ലിസ്റ്റ് കൂടി പരിശോധിച്ച ശേഷമാണ് കോടതിയുടെ ഉത്തരവ്​.

പിതാവിനെ കൊലപ്പെടുത്തിയ കേസിലാണ് പാലക്കാട് സ്വദേശിയെ ജീവപര്യന്തത്തിന് ശിക്ഷിച്ചത്. പരോൾ അനുവദിക്കണമെന്ന അപേക്ഷ ജയിൽ അധികൃതർ തള്ളിയതിനെ തുടർന്നാണ് ഇയാളുടെ ഭാര്യ ഹൈകോടതിയെ സമീപിച്ചത്. മിടുക്കനായ കുട്ടി തന്‍റെ തുടർപഠനത്തിന് പ്രവേശനം നേടാൻ പിതാവിന്‍റെ സാന്നിധ്യവും അനുഗ്രഹവും ആഗ്രഹിക്കുന്നത്​ കണ്ടില്ലെന്ന് നടിക്കാനാകില്ലെന്ന്​ വിധിന്യായത്തിൽ പറഞ്ഞു.

മകന് മികച്ച വിദ്യാഭ്യാസം ലഭിക്കണമെന്നത് തടവുകാരന്‍റെയും അവകാശമാണ്. മാതാപിതാക്കളുടെ അനുഗ്രഹം വാങ്ങി പ്ലസ്ടു പഠനത്തിന്​ മകൻ പോകട്ടെയെന്നും നല്ല ഭാവിക്കായി സർവശക്തൻ അനുഗ്രഹിക്കട്ടെയെന്നും കോടതി ആശംസിച്ചു.