അനധികൃത പണമിടപാട്: പി.ടി.എ റഹീം എം.എൽ.എയുടെ മകനും മരുമകനുമടക്കം മൂന്നു പേർ പിടിയിൽ

ദമ്മാം: അനധികൃത സാമ്പത്തിക ഇടപാട് കേസിൽ പി.ടി.എ റഹീം എം.എൽ.എയുടെ മകനും മകളുടെ ഭർത്താവും മറ്റൊരു ബന്ധുവും സൗദി അറേബ്യയിൽ അറസ്​റ്റിലായതായി റിപ്പോർട്ട്. എം.എൽ.എയുടെ മകന്‍ പി.ടി ഷബീർ, മകളുടെ ഭര്‍ത്താവ് ഷബീര്‍ വായോളി, ഇവരുടെ ബന്ധു എന്നിവരാണ് പിടിയിലായത്.

ഷബീർ ദമ്മാമിൽ ജി.ബി.എസ് ഗ്ലോബൽ സൊലൂഷൻ എന്ന പേരിൽ സ്ഥാപനം നടത്തിവരുകയായിരുന്നു. അറസ്​റ്റിലായ ബന്ധു കൊടുവള്ളി മുനിസിപ്പാലിറ്റി ഇടതു കൗൺസിലർ വായോളി മുഹമ്മദ് മാസ്​റ്ററുടെ സഹോദരൻ നാസർ വായോളിയാണ്. ഇദ്ദേഹത്തി​​​െൻറ ഇടപാടു സംബന്ധിച്ച കേസിലാണ് മറ്റ് രണ്ട് പേരും പിടിയിലായത്. ബഹ്റൈൻ പാലം വഴി കടക്കുന്നതിനിടെ ഒരു വാഹനത്തിൽനിന്ന് സൗദി അധികൃതർ പണം പിടികൂടിയതിനെ തുടർന്നു നടത്തിയ അന്വേഷണമാണ് ഇവരെല്ലാം അറസ്​റ്റിലാവാൻ കാരണമായത്.

എന്നാൽ, ഇതു സംബന്ധിച്ച് സൗദിയിൽ ഒൗദ്യോഗിക വിശദീകരണങ്ങളൊന്നും പുറത്തു വന്നിട്ടില്ല. ഇത്തരം കേസുകളിൽ സാധാരണ ഒരു മാസം വരെ അറസ്​റ്റിലാവുന്ന പ്രതികളെ കുറിച്ച് ഒരു സൂചനയും ലഭിക്കില്ല. അതിനു ശേഷമേ നിയമസഹായ നടപടികളുമായി ബന്ധുക്കൾക്കോ സുഹൃത്തുക്കൾക്കോ പ്രതികളെ സമീപിക്കാനാവൂ. പത്തു ദിവസം മുമ്പാണ് ഇവർ കസ്​റ്റഡിയിലായത്.

മകനും മരുമകനും ഹവാല ഇടപാടില്ലെന്ന് പി.ടി.എ. റഹീം
​കൊടുവള്ളി: സൗദി ​അറേബ്യയിൽ അറസ്​റ്റിലായ മകനും മരുമകനും ഹവാല ഇടപാടില്ലെന്ന് അഡ്വ. പി.ടി.എ. റഹീം എം.എൽ.എ. പറഞ്ഞുകേൾക്കുന്ന ആരോപണങ്ങൾ തെറ്റാണെന്ന്​ അദ്ദേഹം ‘മാധ്യമ’ത്തോട്​ പറഞ്ഞു. 15 വർഷമായി മകൻ ഗൾഫിലാണ് ജോലിചെയ്യുന്നത്​. മക​​​​െൻറയും മരുമക​​​​െൻറയും അറസ്​റ്റിനെക്കുറിച്ച് കൂടുതൽ അറിയില്ല. മൂന്നുദിവസം മുമ്പും വിളിച്ചിരുന്നു. അവസാനം വിളിച്ചപ്പോൾ ഒരു അന്വേഷണം തനിക്കെതിരെ നടക്കുന്നു​െണ്ടന്ന്​ മകൻ പറഞ്ഞിരുന്നതായും എം.എൽ.എ പ്രതികരിച്ചു.

പി.ടി.എ. റഹീം എം.എൽ.എക്കെതിരെ മുസ്​ലിം ലീഗ് മുഖ്യമന്ത്രിക്ക് പരാതി നൽകി
കൊടുവള്ളി: കുന്ദമംഗലം എം.എല്‍.എ പി.ടി.എ. റഹീമി​​​​െൻറ സ്വത്ത് വിവരങ്ങളും സാമ്പത്തിക ഇടപാടുകളും സംബന്ധിച്ച്​ അന്വേഷണം ആവശ്യപ്പെട്ട് മുഖ്യമന്ത്രി പിണറായി വിജയന് കൊടുവള്ളി നഗരസഭ മുസ്​ലിം ലീഗ് കമ്മിറ്റി പരാതി നൽകി. പണമിടപാടുമായി ബന്ധപ്പെട്ട്​ എം.എൽ.എയുടെ മകനും മകളുടെ ഭർത്താവും മറ്റൊരു ബന്ധുവും സൗദി അറേബ്യയിൽ അറസ്​റ്റിലായ സാഹചര്യത്തിൽ എം.എൽ.എയുടെയും പിടിയിലായവരുടെയും സ്വത്തുവിവരങ്ങൾ അന്വേഷിക്കണമെന്നാണ്​ ആവശ്യം.

സൗദിയിൽ പിടിയിലായ ഷബീര്‍ വായോളിയുടെ പിതാവ് മുഹമ്മദ് കൊടുവള്ളി നഗരസഭയിലെ ഇടത് കൗണ്‍സിലറാണ്. കരിപ്പൂർ സ്വർണക്കടത്ത് കേസിൽ പ്രതിചേർക്കപ്പെട്ടവരുടെ കൂടെ പി.ടി.എ. റഹീം നിൽക്കുന്ന ഫോട്ടോ മാധ്യമങ്ങളിൽ പ്രചരിക്കപ്പെട്ടത് നേരത്തേ ഏറെ രാഷ്​ട്രീയ ചർച്ചക്ക് വഴിവെച്ചിരുന്നു. കോടിയേരി ബാലകൃഷ്ണൻ കൊടുവള്ളിയിലെ സ്വീകരണ പരിപാടിയിൽ മിനി കൂപ്പറിൽ യാത്ര ചെയ്​തതും വിവാദമായി. പുതിയ സംഭവം രാഷ്​ട്രീയമായി ഉപയോഗപ്പെടുത്താനാണ് ലീഗ് നേതൃത്വം അലോചിക്കുന്നത്. പ്രതിഷേധ പരിപാടികൾ സംഘടിപ്പിക്കാനുള്ള ഒരുക്കത്തിലാണ് അവർ.