തനിക്കെതിരെ നീങ്ങുന്നത്​ ആറു പേർ; ആത്​മഹത്യ ചെയ്യില്ല -നമ്പർ 18 ഹോട്ടൽ കേസ്​ പ്രതി അഞ്ജലി

കൊച്ചി: തനിക്കെതിരെ നീങ്ങുന്നത്​ ആറ്​ പേരടങ്ങിയ സംഘമാണെന്ന്​ നമ്പർ 18 ഹോട്ടൽ പോക്​സോ കേസ്​ പ്രതി അഞ്ജലി റീമാദേവ്​. ഇൻസ്റ്റഗ്രാമിൽ പോസ്റ്റ്​ ചെയ്ത വിഡിയോ സന്ദേശത്തിലാണ്​ റീമയുടെ പ്രതികരണം. ആത്​മഹത്യ ചെയ്യില്ലെന്നും താൻ മരണപ്പെട്ടാൽ അത്​ കൊലപാതകമായിരിക്കുമെന്നും അതിനുത്തരവാദി ഈ ആറ്​ പേർ ആയിരിക്കുമെന്നും അഞ്ജലി പറഞ്ഞു.

രാഷ്ട്രീയം, സന്നദ്ധ പ്രവർത്തനം, ബിസിനസ്​, ട്രസ്റ്റ്​ എന്നീ മേഖലകളിൽ നിന്നുള്ളവരാണ്​ ഈ ആറ്​ പേർ. ഇവരെ സംബന്ധിക്കുന്ന വിവരങ്ങൾ എത്തിക്കേണ്ടിടത്ത്​ എത്തിച്ചിട്ടുണ്ട്​. എന്നാൽ, ഇതറിയാതെ ഈ ആറ്​ പേർ ഇപ്പോഴും തന്നെ കുടുക്കാൻ നോക്കുകയാണ്​.

തന്നെ മോശപ്പെട്ട സ്ത്രീയായാണ്​ ചിത്രീകരിക്കുന്നത്​. ഇതിനെല്ലാം കാരണം ഒരു സ്ത്രീ ഉന്നയിച്ചിട്ടുള്ള ആരോപണങ്ങളാണ്​. തന്നെ നമ്പർ 18 ഹോട്ടലിൽ കാണാൻ പാടില്ലാത്ത സാഹചര്യത്തിൽ കണ്ടു, ലഹരി ഉപയോഗിച്ചിരുന്നു എന്നിങ്ങനെയുള്ള ആരോപണങ്ങളെല്ലാം സമൂഹമാധ്യമങ്ങളിൽ പ്രചരിക്കുന്നുണ്ട്​. കടുത്ത മാനസിക സമ്മർദ്ദമാണ്​ അനുഭവിക്കുന്നത്​​. ആത്​മഹത്യ ചെയ്യണോയെന്ന്​ പോലും ഒരുഘട്ടത്തിൽ ആലോചിച്ചു.

രണ്ട്​ പേരാണ്​ തനിക്കെതിരെ പരാതി ഉന്നയിച്ചിരിക്കുന്നത്​. മറ്റു പെൺകുട്ടികളുടേയും മൊഴിയെടുക്കണം. വർഷങ്ങളായി കൂടെ ജോലി ചെയ്തവരോടും ചോദിക്കണം. ലൈവ്​ പോളിഗ്രാഫ്​ ടെസ്റ്റിന്​ തയാറാണെന്നും അഞ്ജലി വ്യക്​തമാക്കി.

താൻ മരിച്ച്​ പോയാലും ഇങ്ങനെ ആക്കിയവരെ നിയമവും കോടതിയും വെറുതെ വിടരുത്​. ഇനി ഒരു പെൺകുട്ടിയുടെ ജീവിതവും തുലക്കാൻ പാടില്ല. ഇപ്പോഴും പിടിച്ചുനിൽക്കുന്നത്​ തെറ്റ്​ ചെയ്തിട്ടില്ലെന്ന ഉത്തമ ധൈര്യത്തിലാണെന്നും അഞ്ജലി പറഞ്ഞു.