സിസാ തോമസിനെ സ്ഥാനത്തുനിന്ന് നീക്കി

തിരുവനന്തപുരം: സാങ്കേതിക സര്‍വകലാശാല വൈസ് ചാന്‍സലര്‍ ഡോ. സിസ തോമസിനെ സാ​ങ്കേതിക വിദ്യാഭ്യാസ വകുപ്പ്​ സീനിയർ ജോയന്‍റ്​ ഡയറക്ടർ സ്ഥാനത്തുനിന്ന്​ മാറ്റി. പകരം കെ.ടി.യു മുൻ വൈസ്​ ചാൻസലർ ഡോ. എം.എസ്​. രാജശ്രീയെ നിയമിച്ചു. രാജശ്രീക്ക്​ പകരമാണ്​ സിസ തോമസിനെ ഗവർണർ താൽക്കാലിക വി.സിയായി നിയമിച്ചത്​.

സുപ്രീംകോടതി വിധിയെ തുടർന്ന്​ വൈസ്​ ചാൻസലർ സ്ഥാനത്തുനിന്ന്​ പുറത്തായ രാജശ്രീക്ക്​ സർക്കാർ ഇതുവരെ നിയമനം നൽകിയിരുന്നില്ല. കെ.ടി.യു വിഷയത്തില്‍ സർക്കാറും ഗവർണറും തമ്മിൽ വലിയ പോര്​ നടന്നിരുന്നു. ഡോ. സിസ തോമസിനെ നിയന്ത്രിക്കാൻ ഉപസമിതി രൂപവത്​കരിച്ച സിൻഡിക്കേറ്റ്​ നടപടി ഗവർണർ കഴിഞ്ഞദിവസം തടഞ്ഞിരുന്നു.

ജീവനക്കാരെ സ്ഥലംമാറ്റിയത്​ പുനഃപരിശോധിക്കാൻ മറ്റൊരു സമിതി രൂപവത്​കരിച്ചതും ഗവർണർക്കുള്ള കത്തുകൾക്ക്​ സിൻഡിക്കേറ്റിന്‍റെ അംഗീകാരം തേടണമെന്ന തീരുമാനവും ഗവർണർ റദ്ദാക്കിയിരുന്നു. ഗവർണറും സർക്കാറും തമ്മിൽ വീണ്ടും ഭിന്നത ശക്തമാകുന്നതിനിടെയാണ്​ ഡോ. സിസ തോമസിനെ സാ​ങ്കേതിക വിദ്യാഭ്യാസ വകുപ്പിലെ ജോയന്‍റ്​ ഡയറക്ടർ സ്ഥാനത്തുനിന്ന്​ സർക്കാർ മാറ്റിയത്​.