ചിത്രയെയും സൂരജിനെയും പിന്തുണച്ചിട്ടില്ലെന്ന്​ ഗായകരുടെ സംഘടന

തിരുവനന്തപുരം: ഗായിക കെ.എസ്​. ചിത്രയുടെ പരാമർശങ്ങളും അതിനെ വിമർശിച്ച ഗായകൻ സൂരജ്​ സ​ന്തോഷിന്‍റെ നിലപാടുകളും സംഘടനയുടേതല്ലെന്നും രണ്ടു​പേർക്കും പിന്തുണ നൽകിയിട്ടില്ലെന്നും പിന്നണി ഗായകരുടെ സംഘടനയായ സമം വ്യക്തമാക്കി. ഇരുവ​രുടെയും വ്യക്തിപരമായ നിലപാടുകളാണ്​. തങ്ങൾ​ തൊഴിലാളി സംഘടനയല്ലെന്നും പിന്നണി ഗായകരുടെ ക്ഷേമത്തിന്​ നിലകൊള്ളുന്ന ചാരിറ്റി കൂട്ടായ്മയാണെന്നും ഭാരവാഹികൾ പറഞ്ഞു.

ഞങ്ങൾക്ക്​ രാഷ്ട്രീയ ചായ്​വില്ല. എല്ലാ രാഷ്​ട്രീയവുമുള്ളവർ കൂട്ടായ്മയിലുണ്ട്​. രാഷ്​ട്രീയ വിഷയമായതിനാൽ​ സംഘടന എന്ന നിലയിൽ ഈ വിഷയത്തിൽ സമത്തിന്​ അഭിപ്രായമില്ല. പറഞ്ഞത്​ വ്യക്തിപരമായ അഭിപ്രായമാണെന്ന്​ ചിത്ര ഭാരവാഹികളോട്​ വ്യക്തമാക്കിയിട്ടുണ്ട്​. സംഘടന എന്ന രീതിയിൽ ഇടപെടേണ്ടതില്ലെന്നും അറിയിച്ചിരുന്നു. സൂരജിന്‍റെ രാജി വികാര വിക്ഷോഭത്തിൽ സംഭവിച്ചതാണെന്നാണ്​ തോന്നുന്നത്​. അദ്ദേഹം ഉന്നയിച്ച വിഷയത്തി​ന്‍റെ ഗൗരവം വ്യക്തിപരമായി എല്ലാവർക്കും ബോധ്യമുണ്ട്​. പിന്തുണ വേണമെന്ന്​ സൂരജ്​ ആവശ്യപ്പെട്ടിട്ടുമില്ല.

‘പിന്തുണ കിട്ടാത്തതിനാൽ സംഘടനയിൽ നിന്ന്​ രാജിവെക്കുന്നു’വെന്ന ​വാട്​സആപ്​​ സന്ദേശമാണ്​ ലഭിച്ചത്​. ഇത്​ വീട്ടിനുള്ളിലെ ചെറിയ പ്രശ്നമായാണ് കാണുന്നത്​. പ്രശ്നം പരിഹരിച്ച്​ പിണക്കം മാറ്റും. സമത്തിന്‍റെ വേദികളിൽ സൂരജ്​ ഇനിയും പാടാനുണ്ടാകുമെന്നും ഭാരവാഹികളായ കെ.എസ്​. സുദീപ്​ കുമാർ, ആർ. രവിശങ്കർ, വിജയ്​ യേശുദാസ്​, രാജലക്ഷ്മി, അഫ്​സൽ, ജി. ശ്രീറാം, ​കെ.കെ. നിഷാസ്​ എന്നിവർ വ്യക്തമാക്കി. പെരുമ്പാവൂർ ജി. രവീന്ദ്രനാഥിന്​ സമം നൽകുന്ന ആദരം വിശദീകരിക്കാൻ വാർത്തസമ്മേളനത്തിൽ സംസാരിക്കുകയായിരുന്നു അവർ.

സമം വൈസ്​ ചെയർപേഴ്​സണാണ്​ ചിത്ര. രാമക്ഷേത്രവുമായി ബന്ധപ്പെട്ട്​ കെ.എസ്.​ ചിത്രയുടെ പോസ്റ്റിനെതിരെ​ സൂരജ്​ രംഗത്തെത്തിയിരുന്നു. ചിത്രയെപ്പോലെയുള്ള കപടമുഖങ്ങൾ ഇനിയും അഴിഞ്ഞുവീഴാനുണ്ടെന്നും എത്ര ചിത്രമാർ തനിസ്വരൂപം കാട്ടാനിരിക്കുന്നെന്നുമായിരുന്നു സൂരജിന്റെ പ്രതികരണം. തുടർന്ന്​, വ്യാപക സൈബർ ആക്രമണത്തിനിരയായ സൂരജ്​ സമത്തിൽ നിന്ന്​ പിന്തുണ കിട്ടിയില്ലെന്നാരോപിച്ച്​ രാജിവെക്കുകയായിരുന്നു.