സിന്ധു പറയുന്നു, മാലാഖമാരാക്കുന്നത്​ തൊഴിലിനോടുള്ള ആത്മാർഥത

കേണിച്ചിറ: തൊഴിലിനോടുള്ള ആത്മാർഥതയാണ് ഓരോ നഴ്സിനെയും മാലാഖമാരാക്കുന്നതെന്ന് കേണിച്ചിറ സാമൂഹികാരോഗ്യ കേന്ദ്രത്തിലെ നഴ്​സ്​ സിന്ധു ഉറപ്പിച്ചുപറയുന്നു. മൂന്ന് പതിറ്റാണ്ടോളം നഴ്സ് ജീവിതത്തിനിടയിൽ മറക്കാനാവാത്ത നിരവധി അനുഭവങ്ങൾ ഇവർക്കുണ്ട്. ആത്മാർഥമായി തൊഴിൽ ചെയ്യുക. ആദരവ് തേടിയെത്തും.

2004-2005 കാലത്ത് കൽപറ്റയിലെ ഒരു സ്വകാര്യ ആശുപത്രിയിലെ നഴ്സായിരുന്നു. അത്യാഹിത വിഭാഗത്തിലെ ഡ്യൂട്ടിക്കിടയിലാണ് മേപ്പാടി സ്വദേശിയായ മധ്യവയസ്കൻ നെഞ്ചുവേദനയുമായി ഗുരുതരാവസ്ഥയിൽ എത്തിയത്. അദ്ദേഹത്തിന് ഇ.സി.ജി എടുക്കുന്നതിനിടയിൽ ഹൃദയാഘാതമുണ്ടായി. ഏഴ് തവണയോളം സി.പി.ആർ കൊടുത്തതിന് ശേഷമാണ് മരണത്തിൽനിന്ന്​ രക്ഷിക്കാനായത്​.

ഡിസ്ചാർജായി പോയതിനുശേഷം അദ്ദേഹത്തെ കണ്ടിട്ടില്ല. താമസിയാതെ സിന്ധു സർക്കാർ സർവിസിലേക്ക് മാറി. 2018ൽ മീനങ്ങാടി സാമൂഹികാരോഗ്യ കേന്ദ്രത്തിൽ ജോലിചെയ്യുമ്പോൾ അദ്ദേഹത്തി​​െൻറ മകൾ പ്രസവത്തിന്​ അവിടെ അഡ്മിറ്റായി.

മകളും അമ്മയും സിന്ധുവിനെ തിരിച്ചറിഞ്ഞു. അവർ അച്ഛനെ മേപ്പാടിയിൽനിന്ന്​ വിളിച്ചുവരുത്തി. നഴ്സസ് റൂമിൽനിന്ന്​ സിസ്​റ്ററുടെ രണ്ട് കൈകളും കൂട്ടിപ്പിടിച്ച് കണ്ണുനിറഞ്ഞ് അദ്ദേഹം പറഞ്ഞു: ‘‘മരിക്കുന്നതിനുമുമ്പ് സിസ്​റ്ററെ ഒന്നു കാണണമെന്നുണ്ടായിരുന്നു. അന്ന് നിങ്ങളില്ലായിരുന്നുവെങ്കിൽ ഞാൻ മരിച്ചേനെ...’’ ഏറ്റവും വലിയ അംഗീകാരമായാണ് ആ വാക്കുകളെ സിന്ധു ഇന്നും കാണുന്നത്. 
ഇത്തരം നിരവധി അനുഭവങ്ങൾ ഉണ്ടായിട്ടുണ്ട്.

രോഗികളായി മുന്നിലെത്തുന്നവർ സ്വന്തക്കാരാണെന്ന ചിന്ത ഓരോ നഴ്സിനും ഉണ്ടാകണമെന്നാണ് സിന്ധുവി​​െൻറ നിർദേശം. 
ഒരു വർഷത്തിലേറെയായി പൂതാടി സാമൂഹികാരോഗ്യ കേന്ദ്രത്തിലാണ്​ സേവനം. മുട്ടിൽ സ്വദേശിനിയാണ്.