ക്വാറൻറീൻ ജിവിതം: ശ്രുതിയുടെ ഇടവേളകൾ വർണമനോഹരം

മാനന്തവാടി: കോവിഡ്​ പ്രതിരോധ ജോലിയുമായി ബന്ധപ്പെട്ട് നിരീക്ഷണത്തിൽ കഴിയുന്നതിനിടെ കിട്ടുന്ന ഇടവേളകളിൽ മനോഹര രൂപങ്ങള്‍ തീർക്കുകയാണ്​ ഈ മാലാഖ. വയനാട്ടിലെ കോവിഡ് രോഗബാധിതരെ ചികിത്സിക്കുന്ന മാനന്തവാടി ജില്ലാശുപത്രി കോവിഡ്‌ സ​െൻററിലെ നഴ്‌സ്​ എം.പി. ശ്രുതിയാണ് സമയം പാഴാക്കാതെ ക്വാറൻറീൻ ജിവിതം മനോഹര ശിൽപങ്ങളും മറ്റും നിർമിക്കുന്നതിന്​ ഉപയോഗിക്കുന്നത്​.

മൂന്ന്, ആറ് വയസ്സുള്ള രണ്ട് കുഞ്ഞുങ്ങളെയടക്കം കുടുംബത്തെ പിരിഞ്ഞിരിക്കുന്നതി​​െൻറ വിഷമം ഒഴിവാക്കാന്‍ കൂടിയാണ് ശ്രുതി വേറിട്ട മാര്‍ഗം സ്വീകരിച്ചത്. മുന്‍ പരിചയമില്ലാതിരുന്നിട്ടുകൂടി കളിമണ്ണ്​, ചാക്കുനൂല്‍, ഹാര്‍ഡ് ബോര്‍ഡ് തുടങ്ങിയവ ഉപയോഗിച്ച് കുപ്പികളില്‍ രൂപങ്ങള്‍ തീര്‍ത്തിരിക്കുന്നത് ഏറെ ആകര്‍ഷകമാണ്​. കുപ്പികളിലെ രൂപങ്ങള്‍ക്കൊപ്പം ബോട്ടിൽ പെയിൻറിങ്ങും ശ്രുതി പരീക്ഷിക്കുന്നു. ഏഴ് ദിവസം കോവിഡ് ആശുപത്രി ഡ്യൂട്ടിയും പിന്നെ 14 ദിവസം നിരീക്ഷണവുമായി 21 ദിവസം വീട്ടില്‍നിന്ന്​ മാറി ഹോട്ടല്‍ മുറിയിൽ നില്‍ക്കേണ്ടിവരുന്ന സാഹചര്യത്തില്‍ തിരഞ്ഞെടുത്ത മാർഗമാണിത്​.

​കുഞ്ഞുമക്കളെ പിരിഞ്ഞുനില്‍ക്കേണ്ടി വരുന്ന വിഷമവും മറ്റും താല്‍ക്കാലം മറക്കുന്നതിനായാണ് ഈ വിനോദം തിരഞ്ഞെടുത്തതെന്ന് ശ്രുതി പറയുന്നു. മാനന്തവാടി പാണ്ടിക്കടവ് അഗ്രഹാരം സ്വദേശിയായ ശ്രുതി ജില്ലാശുപത്രിയില്‍ ദേശീയ ആരോഗ്യ ദൗത്യം താല്‍ക്കാലിക നഴ്‌സാണ്. ഭര്‍ത്താവ് സജയന്‍ വയനാട്ടില്‍ ഓണ്‍ലൈന്‍ മീഡിയ നടത്തിവരുകയാണ്.