ബി.ജെ.പിക്ക്​ കേരളത്തിന്‍റെ ഭാവിയെക്കുറിച്ച്​ ചിന്തയില്ലെന്ന് ശശി തരൂർ

കോട്ടയം: കേരളത്തി​െൻറ ഭാവിയെക്കുറിച്ച് ബി.ജെ.പിക്ക് ചിന്തയില്ലാത്തതിനാലാണ്​ മതം വിഷയമാക്കുന്നതെന്ന്​ ശശി തരൂർ എം.പി. സംസ്ഥാനത്തെ 10ാം നൂറ്റാണ്ടിലേക്ക് കൊണ്ടുപോകാനാണ് ബി.ജെ.പി ശ്രമം. ഇതിനാണ് ഹിന്ദുത്വ രാഷ്​ട്രീയം ഉയർത്തുന്നതെന്നും അദ്ദേഹം പറഞ്ഞു. ഉമ്മൻ ചാണ്ടിയുടെ തെരഞ്ഞെടുപ്പ്​ പ്രചാരണഭാഗമായി പാമ്പാടിയിലെത്തിയതായിരുന്നു തരൂർ.

ശബരിമല വിഷയത്തിൽ സർക്കാർ ഇടപെടാൻ പാടില്ലായിരുന്നു. ലോകം ഉപേക്ഷിച്ച ആശയമാണ് കമ്യൂണിസ്​റ്റ്​ പാർട്ടി കൊണ്ടുവരാൻ ശ്രമിക്കുന്നത്. യു.ഡി.എഫ് പ്രകടനപത്രികയിൽ മാത്രമാണ് പുരോഗമനം പറയുന്നത്. നേമത്ത് ത്രികോണ മത്സരമാണെന്നും മാധ്യമപ്രവർത്തകരുടെ ചോദ്യത്തിന്​ മറുപടിയായി അദ്ദേഹം പറഞ്ഞു.

കെ.മുരളീധരനാണ്​​ മുൻ‌തൂക്കം. ഇത്തവണ യു.ഡി.എഫ് അധികാരത്തിൽ വരും. സംസ്ഥാനത്തുടനീളം യാത്ര ചെയ്തപ്പോൾ അതാണ് മനസ്സിലാകുന്നത്. വിജയം എളുപ്പമാണെന്ന് പറയുന്നില്ല. പക്ഷേ, വിജയിക്കും. എത്ര സീറ്റെന്ന്​ പറയുന്നില്ലെന്നും തരൂർ പറഞ്ഞു.