ഷാരോൺ വധം: പ്രതികൾ ഹൈകോടതിയിൽ

കൊച്ചി: കാമുകനായിരുന്ന ഷാരോണിനെ കഷായത്തിൽ വിഷം ചേർത്ത് നൽകി കൊലപ്പെടുത്തിയ കേസിലെ ഒന്നാം പ്രതിയായ കാമുകി ഗ്രീഷ്മയുടെ മാതാവും അമ്മാവനും ഹൈകോടതിയിൽ ജാമ്യ ഹരജി നൽകി.

വിഷം കലർന്ന കഷായക്കുപ്പി മാറ്റി തെളിവ് നശിപ്പിച്ചു എന്ന കേസ് മാത്രമാണ് തങ്ങൾക്കെതിരെയുള്ളതെന്നും ജാമ്യം അനുവദിക്കണമെന്നും ആവശ്യപ്പെട്ട് രണ്ടും മൂന്നും പ്രതികളായ കന്യാകുമാരി സ്വദേശിനി സിന്ധു (52), നിർമല കുമാരൻ നായർ (62) എന്നിവരാണ് ജാമ്യ ഹരജി നൽകിയത്.

മറ്റൊരാളുമായി വിവാഹം നിശ്ചയിച്ചതിനെത്തുടർന്ന് ബന്ധത്തിൽനിന്ന് പിന്മാറണമെന്ന് ആവശ്യപ്പെട്ടിട്ടും സമ്മതിക്കാതിരുന്നതിനെത്തുടർന്ന് ഗ്രീഷ്മ ഷാരോണിനെ വീട്ടിൽ വിളിച്ചുവരുത്തി വിഷം കലർന്ന കഷായം നൽകിയെന്നും തുടർന്ന് ആശുപത്രിയിൽ മരണപ്പെട്ടുവെന്നുമാണ് കേസ്. നെയ്യാറ്റിൻകര മജിസ്ട്രേറ്റ് കോടതി നേരത്തേ ജാമ്യഹരജി തള്ളിയിരുന്നു.