ഇതര സമുദായത്തിൽനിന്ന് വിവാഹം കഴിച്ചതിന് സമുദായ വിലക്ക്: കോട്ടയം അതിരൂപതക്ക്​ തിരിച്ചടി

കോട്ടയം: ക്​നാനായ സമുദായ വിലക്കുമായി ബന്ധപ്പെട്ട കേസിൽ കോട്ടയം അതിരൂപതക്ക്​ തിരിച്ചടി. ഇതര സമുദായത്തിൽനിന്ന് വിവാഹം കഴിച്ചതിനെത്തുടർന്ന് പുറത്താക്കിയവരെ തിരിച്ചെടുക്കണമെന്നതടക്കമുള്ള സബ്​ കോടതി ഉത്തരവിനെതിരെ കോട്ടയം അതിരൂപത നൽകിയ അപ്പീൽ കോട്ടയം അഡീഷനൽ ജില്ല സെഷൻസ് കോടതി തള്ളി. കോട്ടയം അതിരൂപത ആർച്​ ബിഷപ്പിന് പുറമെ, ക്നാനായ കാത്തലിക് കോൺഗ്രസ് നൽകിയതടക്കം ഏട്ട്​ അപ്പീലുകളായിരുന്നു കോടതിയുടെ പരിഗണനക്ക്​ എത്തിയത്​. ഇതെല്ലാം കോടതി തള്ളി.

സ്വസമുദായത്തിൽനിന്ന്​ വിവാഹം കഴിച്ചില്ലെന്ന കാരണത്താൽ കോട്ടയം അതിരൂപതയിൽനിന്ന്​ പുറത്താക്കിയവരെ തിരിച്ചെടുക്കണമെന്നും മറ്റ് സമുദായങ്ങളിൽനിന്ന് വിവാഹം ചെയ്യുന്നവരെ പുറത്താക്കരുതെന്നുമായിരുന്നു കോട്ടയം സബ്​ കോടതി ഉത്തരവ്​. ഇത്തരത്തിൽ ക്​നാനായ സമുദായത്തിൽനിന്ന്​ പുറത്താക്കപ്പെട്ടവരു​ടെ മക്കളുടെ വിവാഹം, മാമോദീസ ചടങ്ങുകൾ ​അനുവദിക്കണമെന്നും ഉത്തരവിലുണ്ടായിരുന്നു.

ക്​നാനായ നവീകരണ സമിതി പ്രസിഡന്‍റ്​ ടി.ഒ. ജോസഫ്​, ലൂക്കോസ്​ മാത്യു എന്നിവരാണ്​ ക്​നാനായ സമുദായ വിലക്കിനെതിരെ കോട്ടയം സബ്​ കോടതിയെ സമീപിച്ചത്​. ഇതിൽ ഇവർക്ക്​ അനുകൂല വിധിയുണ്ടായതോടെയാണ്​ അപ്പീലുമായി സഭ നേതൃത്വം ജില്ല കോടതിയെ സമീപിച്ചത്​. ക്​നാനായ സമുദായത്തിന്​ പുറത്തുനിന്ന്​ വിവാഹം കഴിക്കുന്നവരെ കോട്ടയം അതിരൂപത​ വിലക്കുന്നതാണ്​ പതിവ്​. ഇതിനെതിരെയായിരുന്നു ക്​നാനായ നവീകരണ സമിതി കോടതിയെ സമീപിച്ചത്​. ഇത്തരത്തിൽ പുറത്തുപോയവരുടെ നേതൃത്വത്തിൽ രൂപവത്​കരിച്ച സംഘടനയാണ്​ നവീകരണ സമിതി.

തുടർ നിയമ നടപടി സ്വീകരിക്കും -കോട്ടയം അതിരൂപത

കോട്ടയം: ക്​നാനായ സമുദായത്തിന്‍റെ നൂറ്റാണ്ടുകളായുള്ള പാരമ്പര്യത്തെ വിലമതിക്കാതെയും ​അതിരൂപത മുന്നോട്ടുവെച്ച വാദങ്ങൾ വേണ്ടരീതിയിൽ പരിഗണിക്കാതെയുമുള്ള വിധിക്കെതിരെ തുടർ നിയമ നടപടി സ്വീകരിക്കുമെന്ന്​ കോട്ടയം അതിരൂപത. കോട്ടയം സബ്​കോടതി വിധിക്കെതിരെ അതിരൂപതയും ക്​നാനായ കത്തോലിക്ക കോൺഗ്രസും മറ്റ്​ സംഘടനങ്ങളും വ്യക്തികളും നൽകിയ അപ്പീലുകൾ ജില്ല കോടതി അനുവദിച്ചില്ല. ഈ സാഹചര്യത്തിൽ അതിരൂപതയിലെ ആലോചന സമിതികളുമായും സമുദായ സംഘടനകളുമായും കൂടിയോലോചിച്ച്​ അതിരൂപതയുടെയും ക്​നാനായ സമുദായത്തിന്‍റെയും ഉത്തമ താൽപര്യങ്ങൾ സംരക്ഷിക്കാനുതകുന്ന നടപടികൾ ഉടൻ സ്വീകരിക്കുന്നതാണെന്നും രൂപത പി.ആർ.ഒ ഫാ. ജോർജ്​ കറുകപ്പറമ്പിൽ പ്രസ്താവനയിൽ പറഞ്ഞു.