സീരിയല്‍ മേക്കപ്​ മാന്‍ പൊലീസ് ജീപ്പുമായി മുങ്ങി

പാറശ്ശാല: പൊലീസിന്​ മാനക്കേടായി സിനിമ - സീരിയൽ മേക്കപ്​ മാന്‍റെ ജീപ്പ്​ മോഷണം. ചൊവ്വാഴ്ച രാത്രി 11ഓടെ പരശുവക്കലിന്​ സമീപത്താണ് നാടകീയരംഗങ്ങള്‍ അരങ്ങേറിയത്. ജീപ്പുമായി മുങ്ങിയ മേക്കപ്​ മാനെ കണ്ടെത്താന്‍ പൊലീസിന് കഴിഞ്ഞില്ല. പ്രതിയെ നാട്ടുകാര്‍ പിടികൂടി പൊലീസിന്‌ കൈമാറുകയായിരുന്നു. ഉദിയന്‍കുളങ്ങര കരീമാംവിള വീട്ടില്‍ ഗോകുലാണ്​ (25) പിടിയിലായത്.

പാറശ്ശാല സ്‌റ്റേഷന്‍ പരിധിയിൽ നൈറ്റ് പെട്രോളിങ്ങിനിറങ്ങിയ പൊലീസ് സംഘം സഞ്ചരിച്ച ജീപ്പാണ്​ മോഷണം പോയത്​. പരശുവയ്ക്കല്‍ കുണ്ടുവിള ഭാഗത്ത്​ ഒരുകൂട്ടം യുവാക്കള്‍ സംശയകരമായ സാഹചര്യത്തില്‍ നില്‍ക്കുന്നതുകണ്ട് പൊലീസ് വാഹനം നിര്‍ത്തി. പൊലീസുകാര്‍ ഇറങ്ങിയതോടെ നാലംഗ സംഘം ഓടി രക്ഷപ്പെട്ടു. ജീപ്പിലുണ്ടായിരുന്ന രണ്ട് പൊലീസുകാര്‍ അവരെ പിന്തുടര്‍ന്നു. പിന്നാലെ ഡ്രൈവറും പ്രതികളെ തേടി പോയി.

സമീപത്ത്​ മറഞ്ഞുനിന്ന യുവാക്കളിലൊരാൾ ജീപ്പോടിച്ച്​ പോവുകയായിരുന്നു. പൊലീസുകാര്‍ ജീപ്പിന്​ പിന്നാലെ ഓടിയെങ്കിലും നിർത്താതെപോയി. പുലിവാല് പിടിച്ച പൊലീസ് സംഘം അതുവഴി കടന്നുവന്ന ബൈക്കുകാരനെ കൂട്ടി ജീപ്പിന്​ പിന്നാലെ പാഞ്ഞു. ഇതിനിടെ ആലംമ്പാറയിലെത്തിയ യുവാവ്​ സ്വകാര്യ വ്യക്തിയുടെ മതിലിൽ ജീപ്പ്​ ഇടിച്ചുനിർത്തി.

വന്‍ ശബ്ദം കേട്ട് ഓടിക്കൂടിയ നാട്ടുക്കാര്‍ യുവാവിനെ പിടികൂടുകയായിരുന്നു. ബൈക്കിലും ഓട്ടോറിക്ഷയിലുമായി സംഭവസ്ഥലത്തെത്തിയ പൊലീസുകാര്‍ പ്രതിയെ പിടികൂടി സ്‌റ്റേഷനിലേക്ക് കൊണ്ടുപോയി. യുവാവ് മദ്യലഹരിയിലായിരുന്നെന്നാണ് പൊലീസ് പറയുന്നത്. ജീപ്പിന് കാര്യമായ കേടുപാടുണ്ട്​.

ജീപ്പിന്റെ താക്കോല്‍ എടുക്കാതെ ഡ്രൈവറും യുവാക്കളെ തെരഞ്ഞ്​ പോയതാണ്​ നാടകീയ രംഗങ്ങൾക്കും പൊലീസിന്​ മാനക്കേടുണ്ടാകാനും കാരണമെന്ന്​ നാട്ടുകാർ പറയുന്നു.