വിനായകി​െൻറ മരണം: ക്രൈംബ്രാഞ്ച്​ ഡി.ജി.പി മൊഴിയെടുത്തു

തൃശൂർ: പൊലീസ് കസ്​റ്റഡിയിലെടുത്ത് വിട്ടയച്ച ശേഷം വീട്ടിൽ മരിച്ച നിലയിൽ കണ്ടെത്തിയ ഏങ്ങണ്ടിയൂർ സ്വദേശി വിനായകി​​െൻറ വീട്ടിലെത്തി ക്രൈംബ്രാഞ്ച് ഡി.ജി.പി  എ. ഹേമചന്ദ്രന്‍ വീട്ടുകാരുടെ മൊഴിയെടുത്തു. വിനായകി​​െൻറ പിതാവ്​ കൃഷ്ണൻകുട്ടിയും സുഹൃത്ത് ശരത്തും മജിസ്ട്രേട്ടിന് രഹസ്യമൊഴിയും നൽകി. 

വെള്ളിയാഴ്ച രാവിലെയാണ് ഡി.ജി.പി ഹേമചന്ദ്രൻ വിനായകി​​െൻറ വീട്ടിലെത്തിയത്.  വീട്ടിലെ ഓരോരുത്തരിൽനിന്നും അദ്ദേഹം കാര്യങ്ങൾ ചോദിച്ച്​ മനസ്സിലാക്കി. പിന്നീട് ക്രൈംബ്രാഞ്ച് നിർദേശപ്രകാരമാണ്​ തൃശൂർ ഒന്നാംക്ലാസ്​ മജിസ്ട്രേട്ട് കോടതിയിൽ വിനായകി​​െൻറ അച്ഛൻ കൃഷ്ണൻകുട്ടിയും ശരത്തും മൊഴി നൽകിയത്. വിനായകിനൊപ്പം പൊലീസ് കസ്​റ്റഡിയിലെടുത്ത ശരത്ത്, മറ്റൊരു സുഹൃത്ത് വൈഷ്ണവ്, പാവറട്ടി പൊലീസ് സ്​റ്റേഷനിൽ വിനായകി​​െൻറ പിതാവിനോടൊപ്പം എത്തിയ അയൽവാസി സന്തോഷ് എന്നിവരുടെയും മൊഴി രേഖപ്പെടുത്തി. പൊലീസുകാരുടെ സമ്മര്‍ദത്തിന് വഴങ്ങി പിന്നീട് മൊഴി മാറ്റാതിരിക്കാനാണ് രഹസ്യമൊഴി രേഖപ്പെടുത്തിയത്. 

പട്ടികജാതി വർഗ അതിക്രമ വിരുദ്ധ വകുപ്പ് ചുമത്തി പൊലീസുകാര്‍ക്കെതിരെ  കേസെടുത്തിരുന്നു. ഈ കേസില്‍ മുന്‍കൂര്‍ ജാമ്യത്തിനായി പൊലീസുകാര്‍ ശ്രമം തുടരുകയാണ്. ഇതിനിടയിൽ വിവിധ കേന്ദ്രങ്ങളിൽനിന്ന്​ സമ്മർദമുണ്ടെന്ന ബന്ധുക്കളുടെ പരാതിയിലാണ്​ രഹസ്യമൊഴി എടുത്തത്​. ജൂ​ൈല 17നാണ് വിനായകിനെ പാവറട്ടി പൊലീസ് കസ്​റ്റഡിയിലെടുത്ത് വിട്ടയച്ചത്. 18ന് രാവിലെ വീട്ടിൽ തൂങ്ങി മരിച്ച നിലയിൽ കണ്ടെത്തുകയായിരുന്നു. കസ്​റ്റഡിയിലെടുത്ത് സ്​റ്റേഷനിലെത്തിച്ച വിനായകിന് ക്രൂരമർദനമേറ്റെന്നും ഇതിലെ വിഷമമാണ് മരണത്തിന് കാരണമെന്നുമാണ് കേസ്. വിനായകിന് ക്രൂര മർദനമേറ്റുവെന്ന് പോസ്​റ്റ്​മോർട്ടം റിപ്പോർട്ടിലും വ്യക്തമാക്കിയിരുന്നു.