ഇതൊരു ദുരിതാശ്വാസ ക്യാമ്പല്ല, ഒരു വിദ്യാലയത്തി​െൻറ കടം വീട്ടലാണ്​..

ആലപ്പുഴ: വർഷങ്ങൾക്കു മുമ്പ്​ പഠിച്ചിറങ്ങിപ്പോയ വിദ്യാലയത്തി​േലക്ക്​ പലരും തിരികെ വരുന്നത്​ പൂർവ വിദ്യാർത്ഥി സംഗമത്തിനായാണ്​. ഇവിടെ ഇതാ ഒരു വിദ്യാലയത്തിലെ പൂർവ വിദ്യാർത്ഥികൾ മടങ്ങിവന്നിരിക്കുന്നു​, പ്രളയത്തിൽ മുങ്ങിയവർക്ക്​ തുഴയായി. സർവം നഷ്​ടമായവർക്ക്​ തുണയായി. ആലപ്പുഴ ജില്ലാ കോടതിക്ക്​ സമീപത്തെ എസ്​.ഡി.വി ഇംഗ്ലീഷ്​ മീഡിയം സ്​കൂളിൽ പ്രവർത്തിക്കുന്ന ദുരിതാശ്വാസ ക്യാമ്പ്​ കാണേണ്ടതു തന്നെയാണ്​. എല്ലാം കൊണ്ടും ഒരു മാതൃകാ ക്യാമ്പ്​.

വീട്ടിലേക്ക്​ വിരുന്നുവന്നവരെ എന്ന പോലെ ഒാരോ അഭയാർത്ഥികളെയും ക്യാമ്പിലേക്ക്​ ആദരപൂർവം സ്വീകരിക്കുന്നു.  ഒന്നിനും ഒരു കുറവും ഉണ്ടാകാൻ പാടില്ലെന്ന നിർബന്ധ ബുദ്ധിയുള്ള വീട്ടുകാരണവരെപ്പോലെ പ്രളയ ബാധിതരെ പരിചരിക്കുന്നു ക്യാമ്പിലെ ഒാരോ പ്രവർത്തകരും. അവരിൽ ഇതേ സ്​കൂളിൽ പഠിച്ച്​ ഡോക്​ടർമാരും വക്കീലുമാരും എഞ്ചിനീയർമാരും ഉദ്യോഗസ്​ഥരുമെക്കെയായവരുണ്ട്​.. അതൊന്നുമല്ലാത്ത സാധാരണക്കാരുമുണ്ട്​... ഒരു വിദ്യാലയം സംഭാവന ചെയ്​ത എല്ലാത്തരക്കാരുമുണ്ട്​... ഒപ്പം സ്​കൂൾ മാനേജ്​മ​​െൻറും പ്രിൻസിപ്പൽ ഇന്ദുദത്തി​​​​​ന്റെ നേതൃത്വത്തിൽ അധ്യാപകരും ഒരേപോലെ കൈകോർത്തുപിടിക്കുന്നു... എല്ലാ സഹായത്തിനും നാട്ടുകാരുമുണ്ട്​ കൂടെ..

ഹെലികോപ്​റ്ററിൽ രക്ഷാപ്രവർത്തനത്തിൽ നേരിട്ട്​ പ​ങ്കെടുത്ത്​ നിരവധി പേരുടെ ജീവൻ രക്ഷിച്ച സ്​ക്വാഡ്രൻ ലീഡർ റോൺ റോബർട്ട്​ ഇൗ വിദ്യാലയത്തിലെ പൂർവ വിദ്യാർത്ഥിയാണ്​. റോബർട്ടി​​​ന്റെ ഹെലിക്കോപ്​റ്ററി​​​​​നെ ശ്രദ്ധയാകർഷിച്ച്​ വരുത്തി ഒരു യുവാവ്​ സെൽഫി എടുത്ത ശേഷം തിരിച്ചയച്ചത്​ വാർത്തയായിരുന്നു. റോബർട്ടി​​​​​ന്റെയും ലോകത്തി​​​​​ന്റെ വിവിധ ഭാഗങ്ങളിലുള്ള കൂട്ടുകാരുടെയും അകമഴിഞ്ഞ പിന്തുണ ക്യാമ്പിനുണ്ട്​.. ഇതൊരു ദുരിതാശ്വാസ ക്യാമ്പല്ല, വാനോളമുയർത്തിയ വിദ്യാലയം സമൂഹത്തോടുള്ള കടം വീട്ടുകയാണ്​..

400 ഒാളം പേരാണ്​ ഇൗ ക്യാമ്പിലുള്ളത്​. സ്കൂൾ വളപ്പിലേക്ക് കടത്തിവിടുന്ന വാഹനങ്ങൾക്ക് പോലും നിയന്ത്രണങ്ങളുണ്ട്. ക്യാമ്പിലേക്ക് ആളുകളെ കൊണ്ടുവരുന്ന വാഹനങ്ങൾ, രോഗികളെ ആശുപത്രിയിലെത്തിക്കാനുള്ള ആംബുലൻസ്, മറ്റ് അത്യാവശ്യ വാഹനങ്ങൾ എന്നിവയല്ലാതെ ഒന്നും അകത്തേക്ക് കയറ്റിവിടുന്ന പ്രശ്നമില്ല. സദാസമയവും മെഡിക്കൽ സംഘത്തി​​​​​​െൻറ സജീവ സാന്നിദ്ധ്യം ക്യാമ്പിലുണ്ടാകും. ഇതേ സ്​കൂളിൽ പഠിച്ച്​ ഡോക്​ടർമാരായവരുമുണ്ട്​ ഇൗ സേവനത്തിൽ. ​ ജനങ്ങൾക്ക് ചികിത്സയും ആവശ്യത്തിന് മരുന്നുകളും ലഭിക്കുന്നുണ്ടന്ന് ക്യാമ്പ് നിവാസികൾ ഒന്നടങ്കം പറയുന്നു. സ്കൂളി​​​​​​െൻറ മുക്കും മൂലയും ശുചിത്വ പൂർണ്ണമാക്കിയിരിക്കുകയാണ്. അവർ താമസിക്കുന്ന ക്ലാസ് മുറികളിൽ ചെരുപ്പ് ഉപയോഗിച്ച് കയറുന്നത് നിരോധിച്ചിരിക്കുന്നു. വൃത്തിയോടേയും വെടിപ്പോടേയും തയ്യാറാക്കുന്ന മികച്ച ഭക്ഷണം ആവശ്യത്തിന് ഇവിടെ ലഭിക്കുന്നു.

ക്യാമ്പങ്ങൾക്ക്​ ആശ്വാസമേകാൻ വൈകുന്നേരങ്ങളിൽ കലാ പരിപാടികളും മത്സരങ്ങളും സമ്മാനദാനവുമൊക്കെ സംഘടിപ്പിക്കുന്നുണ്ട്​. ഒാണനാളിൽ വീടണയാൻ കഴിഞ്ഞി​ല്ലെങ്കിലും വേവലാതിയില്ലാതെ ഒാണം കൊള്ളാനുള്ള എല്ലാ സൗകര്യവും ഒരുക്കുമെന്ന്​ ക്യാമ്പ്​ ഭാരവാഹികൾ പറയുന്നു.